Nothing Phone 4b: बजेट स्मार्टफोन मार्केटमध्ये खळबळ! नथिंग आणणार 'हा' नवा हँडसेट; पाहा काय आहे सोशल मीडियावरील टीझर

Nothing Phone 4b स्मार्टफोन कंपनी 'नथिंग' (Nothing) भारतात एक नवीन हँडसेट लाँच करण्याच्या तयारीत आहे. सोशल मीडियावर शेअर केलेल्या एका टीझरमुळे हा फोन 'नथिंग फोन 4b' असू शकतो आणि तो फ्लिपकार्टवर विकला जाईल, अशी जोरदार चर्चा सुरू झाली आहे. हा नवीन बजेट मॉडेल भारतातील एन्ट्री-लेव्हल स्मार्टफोन मार्केटमध्ये नथिंगची पकड आणखी मजबूत करेल अशी अपेक्षा आहे.

स्मार्टफोन बनवणारी कंपनी 'नथिंग' (Nothing) भारतात लवकरच एक नवीन हँडसेट लाँच करणार असल्याचे संकेत मिळत आहेत. कंपनीने शेअर केलेल्या एका नवीन टीझरमुळे, हा फोन ‘नथिंग फोन 4b’ या नावाने येऊ शकतो, अशी चर्चा सुरू झाली आहे. हा मॉडेल कंपनीच्या एन्ट्री-लेव्हल स्मार्टफोन सिरीजमधील नवीन फोन असेल, असा अंदाज वर्तवला जात आहे.

नथिंगने सोशल मीडिया प्लॅटफॉर्म 'X' वर एक टीझर व्हिडिओ शेअर केला आहे, ज्यामुळे या नव्या फोनबद्दल उत्सुकता वाढली आहे. व्हिडिओच्या शेवटी "4b" असं लिहिलेली एक पेन्सिल दिसते, ज्यामुळे 'फोन 4b' हे नाव जवळपास निश्चित मानलं जात आहे. यासोबतच, फ्लिपकार्टवर या नवीन ‘b’ सिरीजच्या फोनसाठी एक खास मायक्रोसाइट (microsite) सुद्धा लाईव्ह करण्यात आली आहे. यावरून हे स्पष्ट होतं की हा फोन भारतात फ्लिपकार्टवरून विकला जाईल.

टीझरमध्ये दिसलेल्या डिझाइननुसार, फोनच्या मागच्या बाजूला फक्त एकच कॅमेरा असेल. नथिंगची खासियत असलेलं पारदर्शक डिझाइन (transparent design) या फोनमध्येही कायम राहील, असं दिसतंय. फोनच्या मागच्या बाजूला स्क्रू आणि इतर भाग दिसतील अशाप्रकारे डिझाइन तयार केलं आहे. याशिवाय, फ्लॅट बॅक पॅनल आणि गोलाकार कडा असलेलं डिझाइन कंपनीच्या महागड्या मॉडेल्सची आठवण करून देतं.

नुकत्याच आलेल्या काही रिपोर्ट्सनुसार, नथिंगचा सब-ब्रँड असलेल्या CMF चे स्मार्टफोन प्लॅन्स आता नथिंग ब्रँडकडेच देण्यात आले आहेत. त्यामुळे पुढच्या महिन्यात भारतात लाँच होणारा हा फोन त्याच प्लॅनमधला एक मॉडेल असू शकतो. अर्थात, हाच फोन ‘नथिंग फोन 4b’ आहे की नाही, याबाबत कंपनीने अद्याप कोणतीही अधिकृत माहिती दिलेली नाही.

दरम्यान, यावर्षी कोणताही नवीन फ्लॅगशिप स्मार्टफोन लाँच करणार नाही, असं नथिंगचे सह-संस्थापक आणि सीईओ कार्ल पे (Carl Pei) यांनी आधीच स्पष्ट केलं होतं. त्याऐवजी, कंपनीने यावर्षी मार्चमध्ये भारतात नथिंग फोन 4a आणि फोन 4a प्रो हे दोन फोन लाँच केले होते. मिड-रेंज सेगमेंटमधील या मॉडेल्सना ग्राहकांकडून चांगला प्रतिसाद मिळाला. आता या नवीन 4b मॉडेलमुळे भारतातील बजेट स्मार्टफोन सेगमेंटमध्ये नथिंगची उपस्थिती आणखी मजबूत होईल, अशी अपेक्षा आहे.