Nissan Gravite: मध्यमवर्गीयांसाठी लॉटरी; मारुती अल्टोच्या किंमतीत 7 सीटर गाडी

Nissan Gravite: निस्सारने भारतात आपली सर्वात स्वस्त 7 सीटर MPV 'Gravite' लाँच केली आहे. 1.0-लिटर पेट्रोल इंजिनसह येणारी ही गाडी लवकरच ड्युअल-सिलेंडर CNG पर्यायातही उपलब्ध होणार आहे. जाणून घ्या या गाडीबद्दल अधिक

निसान ग्रॅविट इंजिन

भारतीय बाजारात 7-सीटर MPV सेगमेंटमध्ये आपली जागा मजबूत करण्यासाठी Nissan ने नवीन Gravite लाँच केली आहे. ही देशातील सर्वात स्वस्त 7-सीटर MPV असून तिची सुरुवातीची एक्स-शोरूम किंमत फक्त ₹5.65 लाख आहे. सध्या ही कार 1.0-लिटर, 3-सिलेंडर पेट्रोल इंजिन पर्यायात उपलब्ध आहे, जे 72 bhp पॉवर आणि 96 Nm टॉर्क निर्माण करते. यात 5-स्पीड मॅन्युअल आणि EZ-Shift AMT गिअरबॉक्सचा पर्याय मिळतो. कंपनीच्या दाव्यानुसार, मॅन्युअल व्हेरिएंट 19.3 kmpl आणि AMT व्हेरिएंट 19.6 kmpl मायलेज देतं. लवकरच येणाऱ्या CNG मॉडेलमुळे गाडी चालवण्याचा खर्च आणखी कमी होईल. CNG मध्ये गाडीने 25 ते 27 km/kg मायलेज दिल्यास, ती या सेगमेंटमधील मोठ्या गाड्यांना जोरदार टक्कर देईल.

ड्युअल CNG सिलेंडर व्हेरिएंट

कंपनी लवकरच या गाडीत ड्युअल-सिलेंडर CNG व्हेरिएंट आणणार आहे. निसानचा दावा आहे की, ड्युअल-सिलेंडर CNG किटसह येणारी Gravite ही तिच्या सेगमेंटमधील पहिली गाडी असेल. या सिस्टीममुळे पारंपरिक सिंगल-सिलेंडर CNG गाड्यांच्या तुलनेत जास्त बूट स्पेस मिळेल. CNG पर्यायामुळे गाडी चालवण्याचा खर्च लक्षणीयरीत्या कमी होईल. लाँच झाल्यावर, ही गाडी मारुती Ertiga CNG शी स्पर्धा करेल. निसान ग्रॅविट Visia, Acenta, N-Connecta, Tekna आणि लिमिटेड लाँच एडिशनसह एकूण आठ व्हेरिएंटमध्ये उपलब्ध आहे. तिची ₹5.65 लाखांची सुरुवातीची किंमत पहिल्या 5,000 बुकिंगसाठीच आहे. कंपनी 5 वर्षांसाठी शून्य सर्व्हिस कॉस्ट आणि 5.55% व्याजदरापासून सुरू होणारे फायनान्स पर्याय देत आहे. गाडीवर तीन वर्षे किंवा एक लाख किमीची स्टँडर्ड वॉरंटी आहे, जी 10 वर्षे किंवा दोन लाख किमीपर्यंत वाढवता येते.

डिझाइन

ही गाडी रेनॉ ट्रायबरच्या प्लॅटफॉर्मवर आधारित असली तरी, तिची स्टाइलिंग निसानने खास स्वतःची ठेवली आहे. समोरच्या बाजूला एक मोठी ग्रील, आकर्षक बंपर आणि वेगळ्या प्रकारची LED DRL डिझाइन दिली आहे. ही कार फॉरेस्ट ग्रीन, ओनिक्स ब्लॅक, मेटॅलिक ग्रे, ब्लेड सिल्व्हर आणि स्टॉर्म व्हाइट या रंगांच्या पर्यायांमध्ये उपलब्ध आहे. गाडीमध्ये LED सेगमेंट्स नसले तरी, ट्रायबरच्या काही डिझाइनची झलक यात दिसते. ग्रॅविटची लांबी 3987 मिमी आहे.

7 सीटर एमपीव्ही लेआउट

ही गाडी एक व्यावहारिक 7-सीटर MPV लेआउटसह येते. तिचं मुख्य वैशिष्ट्य म्हणजे गाडीतून पूर्णपणे काढता येणारी तिसऱ्या रांगेतील सीट्स. दुसऱ्या रांगेतील सीट्सना पुढे-मागे सरकवण्यासाठी आणि मागे झुकवण्यासाठी स्लायडिंग आणि रिक्लाइनिंग फंक्शन दिलं आहे, ज्यामुळे गाडीतील जागा आणि आराम वाढतो. कंपनीचा दावा आहे की, या सीट्स 100 पेक्षा जास्त प्रकारे ऍडजस्ट करता येतात. तिसऱ्या रांगेतील सीट्स काढल्यावर बूट स्पेस लक्षणीयरीत्या वाढते.

फीचर्स

गाडीत वायरलेस अँड्रॉइड ऑटो आणि ऍपल कारप्लेसह 8-इंचाची (20.32 सेमी) इन्फोटेनमेंट सिस्टीम आणि JBL स्पीकर्स दिले आहेत. याशिवाय ड्युअल डॅश कॅम, ॲम्बियंट लायटिंग, एअर प्युरिफायर, वायरलेस चार्जर, रेन-सेन्सिंग वायपर्स, पुढचे आणि मागचे पार्किंग सेन्सर्स, क्रूझ कंट्रोल आणि ऑटो LED हेडलॅम्प्स यांसारखे फीचर्सही मिळतात. लिमिटेड लाँच एडिशनमध्ये मानेला आणि कमरेला आधार देण्यासारखे अतिरिक्त आरामदायी फीचर्स आहेत.

सेफ्टी फीचर्स

निसान ग्रॅविटमध्ये 30 पेक्षा जास्त स्टँडर्ड सेफ्टी फीचर्स दिले आहेत. यात 6 एअरबॅग्ज, EBD सह ABS, इलेक्ट्रॉनिक स्टॅबिलिटी कंट्रोल (ESC) आणि टायर प्रेशर मॉनिटरिंग सिस्टीम (TPMS) यांचा समावेश आहे. याशिवाय, रिअर पार्किंग सेन्सर्स, रिव्हर्स कॅमेरा, हिल स्टार्ट असिस्ट आणि लहान मुलांच्या सुरक्षेसाठी आयसोफिक्स चाइल्ड सीट माउंट्स मिळतात. गाडीला अद्याप BNCAP किंवा इतर कोणत्याही NCAP द्वारे क्रॅश-टेस्ट रेटिंग मिळालेली नाही. पण ही गाडी ट्रायबरच्या प्लॅटफॉर्मवर बनवली आहे, ज्याला GNCAP मध्ये 4-स्टार रेटिंग मिळाली होती.