Money Plant : घरात मनी प्लांटमुळे खरंच किडे येतात? जाणून घ्या सत्य आणि सोप्या टिप्स

Money Plant Pest Control Guide : घरात सजावटीसाठी अनेक जण मनी प्लांट लावतात. हे झाड घरात लावल्याने नशीब उजळतं, असंही काही जण मानतात. पण मनी प्लांटमुळे घरात किडे येतात, असा एक समज आहे. यात खरंच किती तथ्य आहे? चला जाणून घेऊया.

मनी प्लांट खरंच किड्यांना आकर्षित करतं का?

अनेकजण समजतात तसं मनी प्लांट स्वतःहून किड्यांना आकर्षित करत नाही. तर झाडाच्या आजूबाजूचं वातावरण किड्यांना आमंत्रण देतं. जिथे जास्त ओलसरपणा, लपायला जागा आणि कमी सूर्यप्रकाश असतो, तिथे किडे येतात. मनी प्लांटजवळ अशी परिस्थिती निर्माण झाल्यास किडे येऊ शकतात.

मनी प्लांट वाढवताना घ्यायची काळजी

मनी प्लांट निरोगी ठेवण्यासाठी काही सोप्या टिप्स फॉलो करा. झाडाला जास्त पाणी घालू नका. कुंडीतील मातीचा वरचा थर सुकल्यावरच पाणी द्या. झाडाला अधूनमधून सूर्यप्रकाशात ठेवा आणि त्याची पानं नियमितपणे स्वच्छ पुसा. झाडाच्या आजूबाजूला स्वच्छता ठेवा, यामुळे किडे दूर राहतील.

किड्यांना दूर ठेवण्यासाठी सोपे उपाय

झाडावरचे छोटे किडे घालवणं अवघड नाही. गरज वाटल्यास नैसर्गिक कीटकनाशक स्प्रे वापरा. झाडाची पानं पाण्याने धुवा. झाडाच्या आसपास पाणी साचू देऊ नका आणि हवा खेळती राहील अशा ठिकाणी झाड ठेवा. यामुळे किड्यांची वाढ थांबवता येते.

पाण्यात वाढणाऱ्या मनी प्लांटची विशेष काळजी

अनेक जण मनी प्लांट पाण्यातही वाढवतात. अशावेळी पाणी नियमितपणे बदलणं खूप महत्त्वाचं आहे. दर ५ ते ७ दिवसांनी पाणी बदला. भांडं किंवा काचेचा ग्लास स्वच्छ धुवा आणि सुकलेली पानं काढून टाका. असं केल्याने पाणी खराब होत नाही आणि बुरशी किंवा किडे येण्याची शक्यता कमी होते.