Maruti Victoris: मारुती सुझुकीचा मोठा धक्का! सर्व गाड्या महाग होत असताना 'या' प्रीमियम SUV ची किंमत केली स्वस्त

Maruti Victoris मारुती सुझुकीने आपली प्रीमियम SUV 'व्हिक्टोरिस'ची किंमत तब्बल 38,900 रुपयांपर्यंत कमी केली आहे. नवीन डिझाइन, 10.25-इंचाची टचस्क्रीन आणि ADAS लेव्हल 2 सारख्या सेफ्टी फीचर्ससह ही कार येते. व्हिक्टोरिसमध्ये माइल्ड-हायब्रीड, स्ट्रॉंग-हायब्रीड आणि सीएनजी असे तीन इंजिन पर्याय मिळतात.

मारुती सुझुकी इंडियाने आपल्या ग्राहकांना एक मोठं सरप्राईज दिलं आहे. कंपनीने आपली प्रीमियम SUV 'व्हिक्टोरिस'ची किंमत कमी केली आहे. व्हिक्टोरिस ही कंपनीची एरिना शोरूममधून विकली जाणारी सर्वात प्रीमियम कार आहे. विशेष म्हणजे, जून महिन्यात आपल्या गाड्यांच्या किमती वाढवणार असल्याचं कंपनीने जाहीर केलं होतं. पण आता व्हिक्टोरिसची किंमत कमी करून मारुतीने सर्वांनाच आश्चर्याचा धक्का दिला आहे. या गाडीच्या काही व्हेरिअंट्सची किंमत 38,900 रुपयांपर्यंत कमी करण्यात आली आहे. मात्र, व्हिक्टोरिसची सुरुवातीची एक्स-शोरूम किंमत पूर्वीप्रमाणेच 10,49,900 रुपये कायम राहील.

मारुती व्हिक्टोरिस: एक्सटीरियर, इंटीरियर आणि इंजिन

मारुती सुझुकी व्हिक्टोरिसमध्ये कंपनीने नवीन डिझाइन लँग्वेज वापरली आहे, जी ई-व्हिटारा इलेक्ट्रिक एसयूव्हीपासून प्रेरित आहे. गाडीच्या समोरच्या बाजूला क्रोम स्ट्रिप असलेली स्लिम ग्रिल, मोठे LED हेडलॅम्प्स, जाड प्लॅस्टिक क्लेडिंग आणि सिल्व्हर स्किड प्लेट दिली आहे. साईड प्रोफाईलमध्ये 18-इंची अलॉय व्हील्स, ब्लॅक पिलर्स, सिल्व्हर रूफ रेल्स आणि अधिक चौकोनी बॉडी क्लेडिंगमुळे गाडीला दमदार लुक मिळतो. मागच्या बाजूला सेगमेंटेड LED लाईट बार आणि 'Victoris' असं लिहिलेलं दिसतं.

व्हिक्टोरिसचं इंटीरियर ग्रँड व्हिटारापेक्षा बरंच वेगळं आहे. याचा डॅशबोर्ड जास्त टेक्नॉलॉजी-फोकस्ड बनवला आहे. डॅशबोर्डच्या वरच्या बाजूला एक मोठी 10.25-इंचाची इन्फोटेनमेंट टचस्क्रीन, उजवीकडे डिजिटल ड्रायव्हर डिस्प्ले आणि थ्री-स्पोक स्टीयरिंग व्हील आहे. मारुतीच्या या व्हिक्टोरिस एसयूव्हीमध्ये पाच प्रवासी आरामात बसू शकतात.

आता याच्या फीचर्सबद्दल बोलायचं झालं तर, व्हिक्टोरिसमध्ये वायरलेस ऍपल कारप्ले आणि अँड्रॉइड ऑटो, डॉल्बी ॲटमॉससह 8-स्पीकर साउंड सिस्टीम, व्हेंटिलेटेड फ्रंट सीट्स, ॲम्बियंट लायटिंग, कनेक्टेड कार टेक्नॉलॉजी, लेदरेट अपहोल्स्ट्री, ऑटोमॅटिक क्लायमेट कंट्रोल, पॅनोरॅमिक सनरूफ, वायरलेस चार्जर, 8-वे इलेक्ट्रिकली ॲडजस्टेबल ड्रायव्हर सीट, हेड्स-अप डिस्प्ले, केबिन एअर फिल्टर आणि पॉवर्ड टेलगेट यांसारखे अनेक प्रीमियम फीचर्स मिळतात.

व्हिक्टोरिसमध्ये तीन इंजिन पर्याय दिले आहेत: एक 1.5-लिटर, 4-सिलेंडर माइल्ड-हायब्रीड पेट्रोल इंजिन जे 103 bhp पॉवर निर्माण करतं. दुसरं 1.5-लिटर, 3-सिलेंडर स्ट्रॉंग-हायब्रीड सेटअप जे 116 bhp पॉवर देतं आणि तिसरं 1.5-लिटर पेट्रोल-सीएनजी ऑप्शन जे 89 bhp पॉवर देतं. गिअरबॉक्स पर्यायांमध्ये पेट्रोल इंजिनसोबत 5-स्पीड मॅन्युअल आणि 6-स्पीड टॉर्क कन्व्हर्टर ऑटोमॅटिक, स्ट्रॉंग-हायब्रीडसोबत e-CVT आणि सीएनजी व्हेरिअंटसोबत 5-स्पीड मॅन्युअल गिअरबॉक्स मिळतो. व्हिक्टोरिसमध्ये ऑल-व्हील ड्राइव्हचा पर्यायही देण्यात आला आहे.

सुरक्षेच्या बाबतीतही व्हिक्टोरिस जबरदस्त आहे. यात सहा एअरबॅग्ज, EBD सह ABS, ट्रॅक्शन कंट्रोल, ब्रेक असिस्ट, हिल होल्ड कंट्रोल आणि आयसोफिक्स चाइल्ड सीट अँकरेज यांसारखी फीचर्स आहेत. टॉप व्हेरिअंटमध्ये 360-डिग्री कॅमेरा आणि टायर प्रेशर मॉनिटरिंग सिस्टीमही मिळते. विशेष म्हणजे, सुरक्षितता आणखी वाढवण्यासाठी या एसयूव्हीमध्ये ADAS लेव्हल 2 टेक्नॉलॉजी देण्यात आली आहे. यामध्ये ऑटोमॅटिक इमर्जन्सी ब्रेकिंग, ॲडॉप्टिव्ह क्रूझ कंट्रोल, लेन कीप असिस्ट, हाय बीम असिस्ट, रिअर क्रॉस-ट्रॅफिक अलर्ट, ब्लाइंड स्पॉट मॉनिटर आणि लेन चेंज अलर्ट यांसारखी अनेक स्मार्ट फीचर्स आहेत. व्हिक्टोरिसला भारत NCAP क्रॅश टेस्टमध्ये 5-स्टार सेफ्टी रेटिंग मिळालं आहे. प्रौढांच्या सुरक्षेसाठी 32 पैकी 31.66 आणि मुलांच्या सुरक्षेसाठी 49 पैकी 43 गुण मिळाले आहेत.