Maruti 7-Seater SUV : मध्यमवर्गीयांसाठी नवा धमाका, सफारी-XUV700 ला देणार थेट टक्कर!

Maruti Suzuki Prepares New 7 Seater SUV : मारुती सुझुकी लवकरच ग्रँड विटारावर आधारित एक नवीन 7-सीटर SUV (कोडनेम Y17) लाँच करणार आहे. 2026-27 मध्ये येणारी ही गाडी महिंद्रा XUV700 आणि टाटा सफारीसारख्या गाड्यांना टक्कर देईल. 

Maruti Suzuki Prepares New 7 Seater SUV : मारुती सुझुकी भारतीय बाजारात एक नवीन प्रीमियम 7-सीटर SUV आणण्याच्या तयारीत आहे. या गाडीला सध्या 'Y17' असं कोडनेम देण्यात आलं आहे. कंपनीने गाडीच्या लाँचची नेमकी तारीख आणि फीचर्सबद्दल अजून काहीही सांगितलेलं नाही, पण 2026 च्या अखेरीस किंवा 2027 च्या सुरुवातीला ही गाडी बाजारात दाखल होण्याची शक्यता आहे. महत्त्वाची गोष्ट म्हणजे, मारुतीच्या या नव्या 7-सीटर SUV ची टेस्टिंग सुरू झाली असून, ती अनेकदा रस्त्यावर दिसली आहे. समोर आलेल्या फोटोंवरून असं दिसतंय की ही गाडी बऱ्याच अंशी ग्रँड विटारावर आधारित असेल. म्हणजेच, डिझाइन, फीचर्स आणि इंजिनमध्ये बरंच साम्य असेल.

बाजारात आल्यानंतर या गाडीची थेट स्पर्धा महिंद्रा XUV700, ह्युंदाई अल्काझार, टाटा सफारी आणि एमजी हेक्टर प्लस यांसारख्या गाड्यांशी होईल. इतकंच नाही, तर भविष्यात येणाऱ्या 7-सीटर रेनॉ डस्टर, किया सोरेंटोवर आधारित SUV आणि ह्युंदाईच्या NI1i (कोडनेम) गाडीकडूनही याला आव्हान मिळेल. मारुती सुझुकीच्या खरखोडा येथील प्लांटमध्ये या नवीन मॉडेलची निर्मिती केली जाईल.

डिझाइन कसं असेल?

मारुती Y17 SUV चं डिझाइन आणि स्टायलिंग मोठ्या प्रमाणात ग्रँड विटारासारखंच असेल. पण तिला वेगळं दाखवण्यासाठी कंपनी काही बदल नक्कीच करेल. यामध्ये eVitara-प्रेरित लाईटिंग सिग्नेचर, नवीन डिझाइनचे पुढचे आणि मागचे बंपर दिले जाऊ शकतात. टेस्टिंग दरम्यान दिसलेल्या मॉडेलचा मागचा भाग (ओव्हरहँग) लांब होता, ज्यामुळे हे स्पष्ट होतं की तिसऱ्या रांगेतील सीटसाठी गाडीचा व्हीलबेस वाढवला जाईल.

प्रीमियम इंटिरियर आणि फीचर्स

गाडीच्या आतल्या भागाबद्दल अजून माहिती समोर आलेली नाही. पण असं मानलं जातंय की या 7-सीटर ग्रँड विटारामध्ये नवीन डिझाइनचा डॅशबोर्ड आणि मोठी फ्री-स्टँडिंग टचस्क्रीन इन्फोटेनमेंट सिस्टीम मिळू शकते. ग्रँड विटाराप्रमाणेच यात लेव्हल 2 ADAS (ॲडव्हान्स्ड ड्रायव्हर असिस्टन्स सिस्टीम), व्हेंटिलेटेड फ्रंट सीट्स, पॅनोरॅमिक सनरूफ, पूर्णपणे डिजिटल इन्स्ट्रुमेंट क्लस्टर, वायरलेस चार्जर, HUD (हेड्स-अप डिस्प्ले), 360-डिग्री कॅमेरा आणि टायर प्रेशर मॉनिटरिंग सिस्टीम (TPMS) सारखे अनेक प्रीमियम फीचर्स मिळण्याची शक्यता आहे.

हायब्रीड इंजिनचे पर्याय

ग्रँड विटाराप्रमाणेच, मारुतीची ही नवीन 7-सीटर SUV सुद्धा ग्लोबल सी प्लॅटफॉर्मवर तयार केली जाईल. इंजिनबद्दल बोलायचं झाल्यास, यात दोन पर्याय मिळण्याची शक्यता आहे. एक म्हणजे 1.5-लिटर नॅचरली ॲस्पिरेटेड पेट्रोल इंजिन, जे 104 bhp पॉवर देईल. दुसरा पर्याय 1.5-लिटर पेट्रोल-हायब्रीड असेल, जो 116 bhp पॉवर जनरेट करेल. गाडीमध्ये मॅन्युअल आणि ऑटोमॅटिक गिअरबॉक्सचे पर्याय मिळतील. तर, टॉप व्हेरिएंटमध्ये AWD (ऑल-व्हील ड्राइव्ह) सिस्टीम दिली जाण्याची शक्यता आहे.