Maruti S-Presso : कमी किंमत, जबरदस्त मायलेज, चांगले सेफ्टी फीचर्स... तरी ही कार कोणीच का घेत नाही?

Maruti S Presso Sales : मारुतीची लोकप्रिय हॅचबॅक एस-प्रेसोच्या विक्रीला मोठा फटका बसला आहे. जुलै २०२६ मध्ये या गाडीचे फक्त १०० युनिट्स विकले गेले, ज्यामुळे वार्षिक विक्रीत तब्बल ८९ टक्क्यांची घट झाली. कमी किंमत आणि जास्त मायलेज असूनही ग्राहक या गाडीकडे का पाठ फिरवत आहेत?

मुंबई : भारतीय कार बाजारात मारुती सुझुकीच्या गाड्यांचा दबदबा असतो. पण आता मारुतीच्याच एका लोकप्रिय गाडीला मोठा धक्का बसला आहे. ही गाडी आहे एस-प्रेसो. जुलै २०२६ मध्ये एस-प्रेसोचे फक्त १०० युनिट्स विकले गेले. गेल्या वर्षी याच महिन्यात ९१२ गाड्या विकल्या गेल्या होत्या. म्हणजेच, वार्षिक विक्रीत तब्बल ८९ टक्क्यांची मोठी घट झाली आहे.

किंमत फक्त ३.४९ लाखांपासून सुरू

मारुती सुझुकी एस-प्रेसोची एक्स-शोरूम किंमत ३.४९ लाख ते ५.२५ लाख रुपयांपर्यंत आहे. कमी बजेटमध्ये चांगली मायलेज देणारी गाडी शोधणाऱ्यांसाठी हा एक उत्तम पर्याय मानला जातो.

मायक्रो-एसयूव्ही सारखा लूक

उंच डिझाइन आणि मायक्रो-एसयूव्ही सारखा लूक हे एस-प्रेसोचं मुख्य वैशिष्ट्य आहे. बॉक्सी डिझाइन, बोल्ड ग्रील आणि जास्त ग्राउंड क्लिअरन्समुळे ही गाडी रस्त्यावर वेगळी दिसते. गाडीच्या आतही डिझाइनमध्ये वेगळेपण आहे. मिनी कूपरची आठवण करून देणारा गोल आकाराचा सेंटर कन्सोल सर्वांचं लक्ष वेधून घेतो. यात डिजिटल स्पीडोमीटरसह अँड्रॉइड ऑटो आणि ॲपल कारप्लेला सपोर्ट करणारी ७ इंचाची टचस्क्रीन इन्फोटेनमेंट सिस्टमही आहे.

सुरक्षेचं काय?

सुरक्षेसाठी यात ड्युअल एअरबॅग, EBD सह ABS, रिअर पार्किंग सेन्सर्स, स्पीड अलर्ट सिस्टीम आणि सीट बेल्ट रिमाइंडर यांसारखे फीचर्स स्टँडर्ड मिळतात. पूर्वी ग्लोबल NCAP क्रॅश टेस्टमध्ये एस-प्रेसोला चांगलं रेटिंग मिळालं नव्हतं. पण आता नवीन मॉडेल्समध्ये इलेक्ट्रॉनिक स्टॅबिलिटी प्रोग्राम (ESP) आणि हिल होल्ड असिस्टसारखे सेफ्टी फीचर्स देण्यात आले आहेत. ही गाडी मारुतीच्या हलक्या 'हार्टेक्ट' प्लॅटफॉर्मवर बनवली आहे, ज्यामुळे शहरातील गर्दीच्या रस्त्यांवर गाडी चालवणं सोपं होतं.

पेट्रोल आणि सीएनजी दोन्ही पर्याय

एस-प्रेसोमध्ये १.० लिटरचं K10C पेट्रोल इंजिन आहे, जे 66 bhp पॉवर आणि 89 Nm टॉर्क जनरेट करतं. यात ५-स्पीड मॅन्युअल आणि AMT गिअरबॉक्सचा पर्याय मिळतो. पेट्रोल मॉडेल २४.१२ ते २५.३० किमी/लिटर मायलेज देतं. तर सीएनजी मॉडेलचं मायलेज तब्बल ३२.७३ किमी/किलोग्रॅम आहे.

३२ पेक्षा जास्त मायलेज

कमी किंमत आणि जबरदस्त मायलेज हे एस-प्रेसोचं सर्वात मोठं आकर्षण आहे. सीएनजीवर तर ही गाडी ३२.७३ किमी/किलोग्रॅम मायलेज देते. पण एवढं सगळं असूनही जुलै महिन्यात फक्त १०० गाड्या विकल्या गेल्या. यावरून बाजारात एस-प्रेसोला किती मोठ्या स्पर्धेला सामोरं जावं लागत आहे, हे स्पष्ट होतं. ३.४९ लाखांपासून किंमत आणि ३२ किमी पेक्षा जास्त मायलेज असूनही ग्राहक या गाडीकडे का पाठ फिरवत आहेत, हा मारुती सुझुकीसाठी नक्कीच एक चिंतेचा विषय आहे.