Kitchen Tips: काचेच्या बाटल्या आणि भांडी चमकवायची आहेत? हे करून पाहा..

Kitchen Tips : तुमच्या घरातही काचेची भांडी आहेत का? ती तेलकट आणि जुनाट दिसू लागली आहेत? खूप घासूनही त्यावरचे डाग जात नाहीत का? काळजी करू नका, या काही सोप्या टिप्स खास तुमच्यासाठीच आहेत. एकदा वापरून पाहा -

काचेच्या बाटल्या अन् बरण्या

आपल्या प्रत्येकाच्या घरात काचेच्या बाटल्या आणि बरण्या असतात. काहीजण तर सजावटीसाठीही काचेच्या वस्तू वापरतात. पण वापरल्या किंवा न वापरल्या तरी त्यावर डाग जमा होतात आणि त्यांची चमक कमी होते. याचं एक कारण म्हणजे 'हार्ड वॉटर' (क्षारयुक्त पाणी). या पाण्याने भांडी धुतल्यास त्यावर क्षार जमा होतात आणि हळूहळू त्यांची चमक नाहीशी होते. साध्या साबणाने हे हट्टी डाग काढता येत नाहीत.

व्हिनेगर अन् बेकिंग सोडा

व्हिनेगर : काचेच्या बाटल्या स्वच्छ करण्यासाठी तुम्ही व्हिनेगर वापरू शकता. यासाठी अर्धा कप व्हाईट व्हिनेगर कोमट पाण्यात मिसळा आणि त्यात काचेची भांडी १५ ते २० मिनिटं भिजवून ठेवा. नंतर ब्रशने हलक्या हाताने घासून स्वच्छ करा. व्हिनेगरमधील ॲसिडमुळे काचेवर जमा झालेले डाग सहज निघून जातात आणि भांडी नव्यासारखी चमकतात.

बेकिंग सोडा आणि लिंबाचा रस: जर डाग खूप जुने आणि हट्टी असतील, तर बेकिंग सोडा आणि लिंबाचा रस वापरा. बेकिंग सोडा आणि लिंबाचा रस एकत्र करून पेस्ट बनवा. हे मिश्रण डाग असलेल्या ठिकाणी लावा आणि १० मिनिटं तसंच ठेवा. त्यानंतर स्पंज किंवा ब्रशने हलक्या हाताने घासून स्वच्छ करा. यामुळे हट्टी डागही सहज निघून जातील.

तांदूळ, मीठ आणि...

काचेच्या भांड्यांची बाहेरची बाजू स्वच्छ करणं सोपं असतं, पण आतून साफ करणं खूप अवघड असतं, कारण आपला हात आतपर्यंत पोहोचत नाही. अशावेळी ही सोपी ट्रिक वापरा. बाटलीमध्ये थोडे तांदूळ, मीठ आणि डिश सोपचे काही थेंब टाका. त्यानंतर, त्यात थोडं पाणी घालून बाटली चांगली हलवा. तांदळाचे दाणे नैसर्गिक स्क्रबरप्रमाणे काम करतात आणि कुठलेही डाग सहज काढून टाकतात. यामुळे बाटली आतूनही अगदी स्वच्छ होते.