Driving Test: ड्रायव्हिंग टेस्टमध्ये मोठा बदल! आता 'H' टेस्टसाठी रिव्हर्स कॅमेरा वापरता येणार; केरळ MVD चा निर्णय
सार
Driving Test केरळमध्ये लाईट मोटर व्हेईकल (LMV) ड्रायव्हिंग टेस्टच्या 'H' प्रकारात आता रिव्हर्स कॅमेरा वापरण्यास मोटार वाहन विभागाने परवानगी दिली आहे. पण, फक्त कॅमेऱ्यावर अवलंबून न राहता साईड आणि इनसाईड मिरर वापरणं बंधनकारक असेल, असंही स्पष्ट करण्यात आलं आहे. आधुनिक गाड्यांमधील नवीन तंत्रज्ञान लक्षात घेऊन हा बदल करण्यात आला आहे.
केरळच्या मोटार वाहन विभागाने (MVD) ड्रायव्हिंग लायसन्सच्या टेस्टमध्ये एक मोठा आणि महत्त्वाचा बदल केला आहे. आता लाईट मोटर व्हेईकल (LMV) लायसन्ससाठी 'H' टेस्ट देताना, रिव्हर्स गिअरमध्ये गाडी चालवताना रिव्हर्स कॅमेरा वापरता येणार आहे. केंद्रीय मोटार वाहन कायद्यातील नव्या दुरुस्तीमुळे केरळमध्ये हा बदल लागू करण्याचा निर्णय घेण्यात आल्याचं समजतंय.
आतापर्यंत ड्रायव्हिंग टेस्टमध्ये फक्त गाडीच्या बाजूचे आणि आतले आरसे (मिरर) वापरूनच गाडी मागे घेण्याची परवानगी होती. रिव्हर्स कॅमेऱ्याची मदत घेता येत नव्हती. पण आता नव्या गाड्यांमध्ये रिव्हर्स कॅमेरा आणि पार्किंग सेन्सरसारखे सेफ्टी फीचर्स सर्रास पाहायला मिळतात. त्यामुळेच हा नवीन निर्णय घेण्यात आला आहे.
सध्या बाजारात येणाऱ्या बहुतेक नवीन गाड्यांमध्ये कंपनीकडूनच रिव्हर्स कॅमेरा बसवलेला असतो. गाडीच्या तंत्रज्ञानात झालेल्या या बदलांमुळे ड्रायव्हिंग टेस्टमध्येही काळानुसार बदल करण्याची मागणी अनेक दिवसांपासून होत होती. याच पार्श्वभूमीवर ही नवीन सूट देण्यात आल्याचं कळतंय.
पण रिव्हर्स कॅमेरा वापरण्यावर मोटार वाहन विभागाने काही महत्त्वाच्या अटी घातल्या आहेत. टेस्ट देणाऱ्या उमेदवाराने फक्त कॅमेऱ्यावर अवलंबून राहून गाडी मागे घेऊ नये. पारंपरिक पद्धतीने साईड मिरर आणि आतला रिव्हर्स मिरर व्यवस्थित बघूनच गाडी चालवायला हवी. रिव्हर्स कॅमेरा फक्त एक अतिरिक्त मदत म्हणून वापरायचा आहे.
टेस्टच्या वेळी उमेदवार पूर्णपणे कॅमेऱ्याच्या डिस्प्लेवर लक्ष देऊन गाडी चालवत असल्याचं आढळल्यास त्याला अपात्र ठरवलं जाऊ शकतं, असंही विभागाने स्पष्ट केलं आहे. सुरक्षित ड्रायव्हिंगच्या सवयी वाढवण्यासोबतच नवीन तंत्रज्ञानाचा फायदा उमेदवारांना मिळावा, हा या बदलामागचा उद्देश असल्याचं अधिकाऱ्यांनी सांगितलं.