तांत्रिक बिघाडामुळे IAF विमान कोसळले, स्थानिकांच्या धाडसामुळे दोघांची सुटका

तांत्रिक बिघाडामुळे IAF विमान कोसळले, प्रयागराजमध्ये हा अपघात झाला. आवाज ऐकून धावत आलेल्या स्थानिकांनी धाडस दाखवले. त्यांनी धैर्याने दोन्ही पायलटना वाचवले.

प्रयागराज (जाने. २२) भारतीय हवाई दलाचे एक छोटे विमान कोसळले आहे. उत्तर प्रदेशातील प्रयागराजमध्ये उड्डाण करत असताना हा अपघात झाला. हे हवाई दलाचे प्रशिक्षण विमान होते, जे तांत्रिक बिघाडामुळे कोसळले. उड्डाणादरम्यान दोन पायलटना तांत्रिक बिघाड असल्याचे लक्षात आले. त्यांनी विमान तातडीने उतरवण्याचा प्रयत्न केला. पण विमान चिखल आणि पानांनी भरलेल्या तलावात कोसळले. त्यामुळे अपघाताची तीव्रता कमी झाली. विमान तलावात कोसळताच मोठा आवाज झाला. त्यामुळे घटनास्थळी धाव घेतलेल्या स्थानिकांनी हवाई दलाच्या दोन्ही पायलटना वाचवले.

पायलट विमानातच अडकले होते

हवाई दलाचे विमान एका मोठ्या तलावात कोसळले. मोठा आवाज ऐकून स्थानिक घटनास्थळी धावले. तलावाच्या मध्यभागी विमान हळूहळू बुडू लागले होते. तलाव चिखलाने भरलेला असल्याने विमानाला आग लागली नाही. इतकेच नाही तर विमानात असलेले पायलटही बचावले. पण कोसळलेल्या विमानात पायलट अडकून पडले होते. त्यांना बाहेर येता येत नव्हते. आवाज ऐकून घटनास्थळी धावलेल्या स्थानिकांनी चिखलाने भरलेल्या तलावाच्या मध्यभागी जाऊन दोन्ही पायलटना विमानातून सुखरूप बाहेर काढले. त्यानंतर दोन्ही पायलटना तलावाच्या काठावर आणले.

हवाई दलाच्या अधिकाऱ्यांचे आगमन

माहिती मिळताच हवाई दलाचे अधिकारी घटनास्थळी दाखल झाले. त्यानंतर स्थानिकांच्या मदतीने तलावाच्या मध्यभागी बुडणारे हवाई दलाचे विमान दोरीच्या साहाय्याने काठावर ओढण्यात आले. अथक प्रयत्नांनंतर विमान काठावर आणण्यात आले.

तांत्रिक समस्येमुळे इमर्जन्सी लँडिंग

तांत्रिक समस्या निर्माण झाल्याने दोन्ही पायलटने इमर्जन्सी लँडिंग करण्याचा निर्णय घेतला. मोकळ्या मैदानात लँडिंग केल्यास जीवाला धोका होण्याची शक्यता जास्त असल्याने त्यांनी तलावात लँडिंग केले. त्यामुळे पायलटचे प्राण वाचले. पण स्थानिकांनी वेळीच धाव घेतल्याने चिखलाच्या पाण्यात बुडून होणारा संभाव्य धोका टळला. स्थानिकांच्या या धाडसाचे मोठे कौतुक होत आहे. दुसरीकडे, हवाई दलाच्या अधिकाऱ्यांनी विमान अपघाताची चौकशी सुरू केली आहे.