सोन्याचे दागिने चमकवण्यासाठी अनेक जण टूथपेस्ट किंवा बेकिंग सोडा वापरतात. पण हे प्रत्येक दागिन्यासाठी सुरक्षित नसतं. मग घरच्या घरी सोन्याचे दागिने सुरक्षितपणे कसे साफ करायचे? जाणून घ्या योग्य पद्धत.
रोजच्या वापरामुळे सोन्याचे दागिने काळे पडणं साहजिक आहे. त्वचेवरील तेल, घाम, साबण आणि सौंदर्यप्रसाधनांमुळे दागिन्यांची चमक कमी होते. ही चमक परत आणण्यासाठी अनेक जण टूथपेस्ट किंवा बेकिंग सोड्याने दागिने घासतात.
पण दागिन्यांना चमकवण्यासाठी कोणतीही गोष्ट वापरून ते घासणं योग्य नाही. 'जेमोलॉजिकल इन्स्टिट्यूट ऑफ अमेरिका' (GIA) च्या मते, टूथपेस्टमधील खरखरीत घटकांमुळे दागिन्यांच्या पृष्ठभागाचं नुकसान होऊ शकतं.
25
बेकिंग सोडा आणि टूथपेस्ट दागिन्यांसाठी घातक!
सोन्याच्या दागिन्यांवर टूथपेस्टचा वापर टाळलेलाच बरा. यातील खरखरीत पदार्थ सोने आणि इतर धातूंच्या पृष्ठभागाला हानी पोहोचवू शकतात.
तसंच, बेकिंग सोड्याने दागिने घासणंही सुरक्षित मानलं जात नाही. विशेषतः खडे असलेल्या दागिन्यांवर घरगुती प्रयोग केल्यास त्यांचं मोठं नुकसान होऊ शकतं.
शिवाय, सोन्याचे दागिने १००% शुद्ध सोन्याचे नसतात. दागिन्यांच्या दर्जानुसार त्यात इतर धातूंचं मिश्रण असतं. त्यामुळे कठोर रसायने किंवा खरखरीत वस्तूंचा वापर टाळायला हवा.
35
घरच्या घरी सोन्याचे दागिने कसे साफ करावेत?
घरच्या घरी सोन्याचे दागिने साफ करण्याची पद्धत अतिशय सोपी आहे. एका छोट्या भांड्यात कोमट पाणी घ्या. त्यात सौम्य डिशवॉश लिक्विडचे काही थेंब टाका.
दागिने थोडा वेळ या पाण्यात भिजत ठेवा. त्यानंतर मऊ ब्रशने दागिन्यांवरील घाण हलक्या हाताने काढा. शेवटी स्वच्छ पाण्याने धुवून मऊ कापडाने दागिने पुसून कोरडे करा.
GIA च्या मते, बहुतांश दागिने आणि खड्यांसाठी कोमट पाणी, सौम्य साबण आणि मऊ ब्रश वापरणं हीच सर्वात सुरक्षित पद्धत आहे.
सगळेच सोन्याचे दागिने एकाच पद्धतीने साफ करता येत नाहीत. हिरा, मोती, पोवळे, टर्क्युइज अशा वेगवेगळ्या खड्यांसाठी वेगळी काळजी घ्यावी लागते.
विशेषतः मोत्यांसारखे नाजूक किंवा सच्छिद्र खडे रसायनांमुळे खराब होऊ शकतात. जुने दागिने किंवा ज्यांचे खडे सैल झाले आहेत, असे दागिने जास्त घासू नयेत.
जर खडे हलत असतील, हुक सैल असेल किंवा दागिन्यांमध्ये खूप घाण साचली असेल, तर घरी प्रयोग करण्यापेक्षा ज्वेलर्सकडे जाऊन ते साफ करून घेणं जास्त सुरक्षित ठरतं.
55
दागिन्यांची चमक टिकवण्यासाठी या गोष्टी लक्षात ठेवा!
सोन्याचे दागिने साफ करण्यासाठी टूथपेस्ट, कठोर पावडर किंवा खरखरीत वस्तूंचा वापर टाळा. रोजच्या वापरातील दागिन्यांवर साचलेला घाम, तेल आणि घाण वेळोवेळी मऊ कापडाने पुसून काढल्यास फायदा होतो.
दागिने साफ करताना बेसिनजवळ विशेष काळजी घ्या. छोटे खडे किंवा दागिने चुकून ड्रेनेजमध्ये पडण्याचा धोका असतो.
थोडक्यात सांगायचं तर, दागिन्यांना चमकवण्यासाठी टूथपेस्ट किंवा बेकिंग सोड्यासारख्या घरगुती वस्तूंचे प्रयोग करण्यापेक्षा कोमट पाणी, सौम्य साबण आणि मऊ ब्रश वापरणं हाच सर्वात सुरक्षित पर्याय आहे.
