Health Tips: उन्हाळ्यात काय खावं आणि काय टाळावं, याबाबत अनेकांच्या मनात गोंधळ असतो. भोपळ्याच्या बिया आरोग्यासाठी चांगल्या आहेत हे सर्वांनाच माहीत आहे, पण उन्हाळ्यात त्या खाणं योग्य आहे का? खाल्ल्यास काय परिणाम होतो? यावर तज्ज्ञ काय म्हणतात ते पाहूया.
उन्हाळ्यात शरीराला थंडावा देणारे पदार्थ खाणं महत्त्वाचं असतं. पण अनेकांना प्रश्न पडतो की भोपळ्याच्या बिया खाव्यात की नाही. तज्ज्ञांच्या मते, उन्हाळ्यात योग्य प्रमाणात भोपळ्याच्या बिया खाल्ल्यास अनेक आरोग्य फायदे मिळतात. यामध्ये प्रोटीन, फायबर, हेल्दी फॅट्स, मॅग्नेशियम, झिंक आणि आयर्न यांसारखी खनिजं भरपूर प्रमाणात असतात. विशेषतः उन्हाळ्यात जाणवणारा थकवा आणि अशक्तपणा दूर करून या बिया शरीराला ऊर्जा देतात आणि सक्रिय ठेवतात.
24
या समस्या होतील दूर
तज्ज्ञांच्या मते, भोपळ्याच्या बियांमधील मॅग्नेशियम शरीराचं तापमान नियंत्रणात ठेवायला मदत करतं. यामुळे स्नायू रिलॅक्स होतात आणि उष्णतेमुळे येणारा ताण कमी होतो. तसेच, यातील हेल्दी फॅट्स हृदयाच्या आरोग्यासाठी फायदेशीर ठरतात. उन्हाळ्यात डिहायड्रेशनमुळे हृदयावर येणारा ताण कमी करण्यासाठीही या बिया काही प्रमाणात उपयुक्त ठरतात, असं तज्ज्ञ सांगतात. भोपळ्याच्या बिया अँटीऑक्सिडंट्सने परिपूर्ण असतात. त्या शरीरातील फ्री रॅडिकल्सचा प्रभाव कमी करून रोगप्रतिकारशक्ती वाढवतात. उन्हाळ्यात वारंवार येणारा थकवा आणि इन्फेक्शन्स दूर ठेवण्यासाठी या बिया उत्तम काम करतात.
34
प्रमाण महत्त्वाचं
आरोग्य तज्ज्ञ सांगतात की उन्हाळ्यात भोपळ्याच्या बिया जास्त प्रमाणात खाऊ नयेत. कारण या बियांचा प्रभाव थोडा उष्ण असतो. त्यामुळे, त्या जास्त खाल्ल्यास शरीरातील उष्णता वाढू शकते आणि पोटात दुखणे किंवा अपचनासारख्या समस्या येऊ शकतात. म्हणून, दिवसाला फक्त 20-30 ग्रॅम बिया खाणं योग्य आहे. तसेच, या बिया थेट खाण्याऐवजी भिजवून किंवा हलक्या भाजून खाल्ल्यास त्या सहज पचतात. ज्यांना ऍलर्जीची समस्या आहे, त्यांनी डॉक्टरांचा सल्ला घेणे महत्त्वाचे आहे.
भोपळ्याच्या बिया झोपेची गुणवत्ता सुधारण्यास मदत करतात. यामध्ये 'ट्रिप्टोफॅन' नावाचं अमिनो ऍसिड असतं, जे मेंदूमध्ये सेरोटोनिन आणि मेलाटोनिन या हार्मोन्सची निर्मिती वाढवतं. उन्हाळ्यात उष्णतेमुळे ज्यांना निद्रानाशाची समस्या जाणवते, त्यांच्यासाठी हा एक नैसर्गिक उपाय आहे. याशिवाय, या बिया वजन नियंत्रणात ठेवण्यासही मदत करतात. यामध्ये फायबर जास्त असल्यामुळे पोट बराच वेळ भरलेलं राहतं आणि लवकर भूक लागत नाही.
