Gardening Tips: फुकटात उगवा लिंबाचं झाड, एका साध्या ट्रिकने घरातच येईल लिंबांचा मळा!

Gardening Tips पुढच्या वेळी सरबत किंवा सॅलडसाठी लिंबू कापल्यावर त्याच्या बिया फेकून देऊ नका. थोडीशी मेहनत घेतली तर तुम्ही घरच्या घरी ताज्या, सेंद्रिय लिंबांचं झाड उगवू शकता.

आजकाल प्रत्येकालाच किचन गार्डनची (kitchen garden) आवड लागली आहे, पण अनेकांना वाटतं की रोपटी विकत आणणं खूप महाग पडतं. पण खरं तर तुम्ही एक रुपयाही खर्च न करता घरात वापरलेल्या लिंबाच्या (lemon) बियांपासून झाड उगवू शकता. जर तुम्हाला हेल्दी लाईफस्टाईल, ऑरगॅनिक फूड आणि नैसर्गिक वाढीवर विश्वास असेल, तर ही पद्धत तुमच्यासाठी अगदी योग्य आहे. घरात स्वतःचं झाड असल्यामुळे तुम्हाला केमिकल-फ्री आणि ताजी लिंबं मिळतील. चला तर मग, लिंबाचं झाड लावण्याची संपूर्ण प्रक्रिया स्टेप-बाय-स्टेप जाणून घेऊया.

लिंबू वापरल्यानंतर बिया तयार करण्याच्या ३ सोप्या ट्रिक्स

1. लिंबू कापल्यावर त्यातून ज्या बिया निघतात, त्यापैकी जाड आणि निरोगी बिया निवडा. खूप बारीक किंवा सुकलेल्या बिया घेऊ नका.
2. बिया स्वच्छ पाण्याने धुवून घ्या आणि त्यांच्यावरचा गर (pulp) पूर्णपणे काढून टाका. जर गर तसाच राहिला, तर त्याला बुरशी लागू शकते.
3. जर तुम्हाला लवकर अंकुर (sprout) हवा असेल, तर तुम्ही नखाच्या मदतीने बियांचं बाहेरचं साल हळूवारपणे काढू शकता. यामुळे जर्मिनेशन (germination) म्हणजे बी रुजण्याची प्रक्रिया लवकर होते.

या गार्डनिंग ट्रिकने तयार करा लिंबाचं रोप

घरात पडलेली १ लिटरची पाण्याची बाटली किंवा एखादा तुटलेला कप घ्या. पाणी बाहेर जाण्यासाठी त्याच्या तळाला एक छोटं छिद्र पाडा. बागेतील मातीत थोडं शेणखत किंवा किचनमधील ओल्या कचऱ्यापासून बनवलेलं कंपोस्ट (compost) मिसळा. जर तुमच्याकडे यापैकी काहीच नसेल, तर साधी माती वापरली तरी चालेल. आता बी लावण्यापूर्वी, तिला कोरफडीच्या गरात (aloe vera pulp) बुडवून घ्या आणि हलक्या ओल्या मातीत लावा. बी साधारण १ ते १.५ इंच खोल दाबा आणि वरून हलकी माती टाकून पाण्याने स्प्रे करा.

रोप उगवायला किती दिवस लागतील?

साधारणपणे ७ ते १४ दिवसांत लहान-लहान अंकुर फुटायला लागतील. रोप कडक उन्हात ठेवू नका, त्याला हलकं ऊन मिळेल आणि हवा खेळती राहील अशा जागी ठेवा. माती सुकू नये याची काळजी घ्या. जेव्हा रोप ४-५ इंच उंच होईल, तेव्हा त्याला मोठ्या कुंडीत लावा (transfer). यासाठी ८-१२ इंच आकाराची कुंडी घ्या, ज्यात पाणी जाण्यासाठी चांगली सोय (ड्रेनेज) असेल. महिन्यातून एकदा सेंद्रिय खत घाला. बियांपासून लावलेल्या झाडाला फळं यायला साधारणपणे २-३ वर्षं लागतात. जर तुम्हाला लवकर फळं हवी असतील, तर नंतर या रोपावर ग्राफ्टिंग (grafting) म्हणजे कलमसुद्धा करता येतं.