Google Pixel 10a: लाँचपूर्वीच फीचर्स लीक; फास्ट चार्जिंगसह अनेक अपग्रेड

Google चा नवीन स्मार्टफोन Pixel 10a १८ फेब्रुवारी रोजी लाँच होणार आहे. अधिकृत लाँचपूर्वी समोर आलेल्या माहितीनुसार, या फोनला अधिक मजबूत गोरिला ग्लास 7i संरक्षण मिळेल.

नवी दिल्ली: Google आपला नवीन स्मार्टफोन Pixel 10a येत्या १८ फेब्रुवारी रोजी लाँच करण्याच्या तयारीत आहे. अधिकृत लाँचपूर्वीच Pixel 10a फोनची प्रमुख वैशिष्ट्ये ऑनलाइन समोर आली आहेत. बिझनेस स्टँडर्ड्सच्या रिपोर्टनुसार, टेक वेबसाइट जीएसएमअरेनाने प्रसिद्ध केलेल्या अहवालात Pixel 10a च्या फीचर्ससह नवीन माहिती उघड झाली आहे. Google Pixel 10a मध्ये त्याच्या आधीच्या Pixel 9a मध्ये वापरलेल्या गोरिला ग्लास 3 ऐवजी अधिक मजबूत गोरिला ग्लास 7i संरक्षण मिळण्याची शक्यता आहे. यामुळे स्क्रीन अधिक मजबूत होईल, असा अंदाज आहे. याशिवाय, चार्जिंगचा वेग आणि ब्लूटूथ व्हर्जनमध्येही मोठे बदल अपेक्षित आहेत.

Google Pixel 10a: अपेक्षित वैशिष्ट्ये

रिपोर्ट्सनुसार, Google Pixel 10a मध्ये 45 वॅट फास्ट चार्जिंग सपोर्ट मिळेल. याआधीच्या Pixel 9a मॉडेलमध्ये 23 वॅट चार्जिंग सपोर्ट होता. त्यामुळे नवीन फोनमध्ये चार्जिंगच्या वेळेत मोठी घट होण्याची शक्यता आहे. ब्लूटूथ 5.4 ऐवजी नवीन मॉडेलमध्ये ब्लूटूथ 6 समाविष्ट केले जाऊ शकते. डिव्हाइसच्या वजनातही थोडी घट होईल. सध्याच्या 186 ग्रॅम वजनाच्या मॉडेलच्या तुलनेत नवीन फोनचे वजन तीन ग्रॅम कमी असेल. रिपोर्ट्सनुसार, त्याच्या आकारातही थोडा बदल आहे. नवीन मॉडेलचे माप 153.9 x 73 x 9 मिलिमीटर असेल.

Google Pixel 10a कॅमेरा

प्रोसेसरच्या बाबतीत कोणताही मोठा बदल होणार नाही. Pixel 10a मध्ये Pixel 9a प्रमाणेच Google Tensor G4 चिप वापरली जाऊ शकते. 8 GB LPDDR5X रॅम आणि 128 GB किंवा 256 GB UFS 3.1 स्टोरेजचे पर्याय कायम राहतील, असे रिपोर्ट्समध्ये म्हटले आहे. जुन्या मॉडेलप्रमाणेच 6.3-इंचाचा pOLED डिस्प्ले आणि 120Hz रिफ्रेश रेट मिळेल. कॅमेरा वैशिष्ट्यांमध्येही कोणताही बदल होणार नाही, असे रिपोर्ट्स सांगतात. यात 48-मेगापिक्सेलचा मुख्य कॅमेरा, 13 MP अल्ट्रावाइड लेन्स आणि 13 MP फ्रंट कॅमेरा असेल. फोन Android 16 वर चालेल. तसेच, सात वर्षांपर्यंत सॉफ्टवेअर आणि सुरक्षा अपडेट्स मिळण्याची अपेक्षा आहे. १८ फेब्रुवारीपासून प्री-ऑर्डर सुरू होईल. कंपनीने कळवले आहे की, १३ फेब्रुवारी रोजी दुपारी १:२९ पूर्वी Google Store वर नोंदणी करणाऱ्या ग्राहकांना एक विशेष ऑफर ईमेल प्राप्त होईल.