FASTag Annual Pass : आता फक्त 1500 रुपयांत मिळणार वार्षिक पास; 1 तारखेपासून नवा नियम

राष्ट्रीय महामार्गांवर फास्टॅगचा (FASTag) वार्षिक पास आतापर्यंत ३०७५ रुपयांना मिळत होता. पण आता नियमांत मोठा बदल झाला असून, पात्र वाहनचालकांना हाच पास अवघ्या १५०० रुपयांत मिळणार आहे.

१ नोव्हेंबरपासून नवे नियम लागू

राष्ट्रीय महामार्गावरील टोल नाक्यांवरून रोज प्रवास करणाऱ्या वाहनचालकांसाठी एक दिलासादायक बातमी आहे. केंद्रीय रस्ते वाहतूक आणि महामार्ग मंत्रालयाने २६ ऑक्टोबर २०२६ रोजी एका नव्या अधिसूचनेद्वारे फास्टॅगच्या नियमांत मोठा बदल केला आहे.

राष्ट्रीय महामार्ग शुल्क (दर निश्चिती आणि वसुली) नियम, २००८ मध्ये पाचवी दुरुस्ती करून हे नवे नियम आणले आहेत. यानुसार, टोल नाक्याजवळ राहणाऱ्या पात्र खासगी वाहनचालकांना आता सवलतीच्या दरात वार्षिक पास काढता येणार आहे.

वार्षिक पासची फी किती असणार?

टोल नाका नेमका कुठे आहे, यावर तुमच्या वार्षिक पासची फी ठरणार आहे.

• नगरपालिका किंवा स्थानिक शहराच्या हद्दीबाहेर टोल नाका असल्यास: वर्षाला १५०० रुपये.

• नगरपालिका किंवा स्थानिक शहराच्या हद्दीत टोल नाका असल्यास: वर्षाला ३००० रुपये.

हे नवे दर १ नोव्हेंबर २०२६ पासून लागू होतील. पण हा पास मिळवण्यासाठी अधिसूचनेत दिलेल्या इतर अटीही पूर्ण कराव्या लागतील.

हा पास नेमका कुणाला मिळणार?

ही सवलत मिळवण्यासाठी काही महत्त्वाच्या अटी पूर्ण करणं गरजेचं आहे.

• तुमचं घर टोल नाक्यापासून २० किलोमीटरच्या आत असावं.

• तुमचं वाहन व्यावसायिक (कमर्शियल) कामासाठी वापरलं जात नसावं.

• गाडीवर चालू स्थितीतला आणि वैध फास्टॅग (FASTag) लावलेला असावा.

• संबंधित टोल नाका आणि वाहनासाठीचे सरकारी नियम पाळलेले असावेत.

सर्वात महत्त्वाची गोष्ट म्हणजे, हा वार्षिक पास फक्त एकाच विशिष्ट टोल नाक्यासाठी चालेल. या पासवर तुम्ही देशभरातले सगळे टोल नाके फ्रीमध्ये ओलांडू शकणार नाही.

📢 Live Within 20 km of a Toll Plaza? Know the New Local Pass Rules!

The Government of India has introduced a Concessional Local Pass for eligible private vehicle owners residing within 20 km of a National Highway fee plaza, effective 1 November 2026, under the National Highways Fee (Determination of Rates and Collection) (Fifth Amendment) Rules, 2026.

Eligible vehicle owners with valid, functional FASTags registered for non-commercial use can opt for an annual pass for the specific toll plaza at the following rates:

🛣️ ₹1,500 per annum for toll plazas outside municipal or local town limits.

🏙️ ₹3,000 per annum for toll plazas within municipal or local town limits.

The pass is subject to specified conditions. It will not be available on National Highways or Expressways using a closed user fee collection system, or where a service road or alternative road is available for use.

📄 Read the official notification for complete details: https://t.co/khgErWhgtT

@PMOIndia @MORTHIndia @PIBMoRTH #NHAI #BuildingANation

— NHAI (@NHAI_Official) October 27, 2026

२० किमीच्या आत राहूनही सवलत का मिळणार नाही?

होय, तुम्ही टोल नाक्यापासून २० किमीच्या आत राहता, एवढी एकच अट सवलत मिळवण्यासाठी पुरेशी नाही.

ज्या राष्ट्रीय महामार्गांवर किंवा एक्स्प्रेस वेवर 'क्लोज्ड युझर फी कलेक्शन सिस्टीम' (Closed User Fee Collection System) द्वारे टोल वसूल केला जातो, तिथे ही सवलत मिळणार नाही.

तसंच, जर प्रवासासाठी सर्व्हिस रोड (Service Road) किंवा दुसरा पर्यायी रस्ता (Alternative Route) उपलब्ध असेल, तर तिथेही हा पास चालणार नाही, असं सरकारने स्पष्ट केलं आहे.

वाहनचालकांनी कोणती काळजी घ्यावी?

तुम्ही जर रोज जवळच्या टोल नाक्यावरून ये-जा करत असाल, तर तुमची गाडी आणि तो टोल नाका या नव्या नियमांत बसतोय का, हे आधी तपासून पाहा. तुमच्या गाडीवरचा फास्टॅग चालू असावा आणि गाडी कमर्शियल नसावी.

१ नोव्हेंबरपासून ही सुविधा सुरू होत असली, तरी ती सर्वांना आपोआप मिळणार नाही. टोल नाक्याचं लोकेशन, पर्यायी रस्त्याची उपलब्धता आणि इतर अटी तपासल्यानंतरच तुम्हाला हा पास दिला जाईल.

त्यामुळे, रोज टोल नाका ओलांडणाऱ्या वाहनचालकांनी वार्षिक पास काढण्यापूर्वी संबंधित टोल नाका किंवा राष्ट्रीय महामार्ग प्राधिकरणाकडे (NHAI) जाऊन नियमांची खात्री करून घेणं फायद्याचं ठरेल.