Self-Watering Plants: आता सुट्टीत झाडांना पाणी घालण्याचं नो-टेंशन! १५ दिवस पुरेल असं 'वॉटर बँक' घरीच बनवा

Self-Watering Plants सुट्टीत फिरायला जाताय पण झाडांची काळजी वाटतेय? आता टेंशन घेऊ नका. प्लॅस्टिकच्या बाटलीपासून 'सेल्फ वॉटरिंग सिस्टीम' बनवण्याच्या ५ सोप्या आयडिया, ज्या ४ ते १५ दिवस झाडांना पाणी पुरवतील.

उन्हाळ्याच्या सुट्ट्या लागल्या की फिरायला जायचे प्लॅन सुरू होतात. पण बाहेरगावी जाताना घरातल्या झाडांना पाणी कोण देणार, ही चिंता अनेकांना सतावते. झाडं सुकली तर सगळी मेहनत वाया जाते. पण आता काळजी करू नका. आम्ही तुम्हाला एक सोपी ट्रिक सांगणार आहोत, ज्यामुळे तुम्ही नसतानाही झाडांना आपोआप पाणी मिळत राहील आणि माती ओली राहील. प्लॅस्टिकच्या बाटलीचा वापर करून 'सेल्फ वॉटरिंग सिस्टीम' बनवण्याचे ५ सोपे मार्ग खाली दिले आहेत.

बाटलीपासून वॉटर सिस्टीम बनवा

ही पद्धत लहान-मोठ्या सर्व प्रकारच्या झाडांसाठी एकदम सोपी आहे. यासाठी एक प्लॅस्टिकची बाटली घ्या. तिच्या झाकणाला एक छिद्र पाडा आणि त्यात एक इअरबड अर्धा आत आणि अर्धा बाहेर राहील असा अडकवा. बाटलीला आधार देण्यासाठी दोन सुक्या काड्या टेपने चिकटवा. आता बाटलीत पाणी भरून ती झाडाच्या कुंडीत लावा. यातून ४-५ दिवस झाडाला हळूहळू पाणी मिळत राहील.

रिव्हर्स बॉटल ड्रिप सिस्टीम

मोठ्या कुंड्या आणि बागेतील झाडांसाठी ही पद्धत उत्तम आहे. यासाठी १-२ लिटरची प्लॅस्टिकची बाटली घ्या. झाकणाला ५-६ छिद्रं पाडा आणि बाटलीचा खालचा भाग कापून टाका. आता कुंडीत खड्डा करून बाटली उलटी गाडा आणि त्यात पाणी भरा. पाणी लवकर संपत असेल तर झाकणावर कापड किंवा जाळी लावू शकता.

प्लॅस्टिक बॉटल सब-इरिगेशन

घरातील लहान झाडं आणि हर्ब्ससाठी ही वॉटर सिस्टीम बेस्ट आहे. २ लिटरची बाटली मधोमध कापा. झाकण काढून त्याजागी सुती कापड बांधा. बाटलीचा वरचा भाग कापलेल्या खालच्या भागात उलटा ठेवा आणि त्यात माती भरून रोप लावा. खालच्या भागात पाणी भरा. कापडामधून पाणी हळूहळू मातीपर्यंत पोहोचेल.

स्लो रिलीज वॉटर सिस्टीम

जर तुम्ही १०-१५ दिवसांसाठी बाहेर फिरायला जात असाल, तर ही पद्धत तुमच्यासाठी आहे. यात पाणी हळूहळू मातीत पोहोचतं आणि झाड लवकर सुकत नाही. यासाठी बाटलीच्या तळाला लहान छिद्रं पाडा. नंतर बाटली सरळ मातीत अशी गाडा की फक्त तिचं तोंड बाहेर दिसेल. आता बाटलीत पाणी भरून झाकण सैल लावा. यातून पाणी हळूहळू झिरपत राहील आणि झाडांना ओलावा मिळेल.

हँगिंग ड्रिप वॉटर सिस्टीम

व्हर्टिकल गार्डन आणि लहान कुंड्यांसाठी हँगिंग ड्रिप वॉटर सिस्टीम एक चांगला पर्याय आहे. २ लिटरची बाटली झाडांच्या वर लटकवा. तिच्या झाकणाला एक लहान छिद्र पाडा. बाटलीत पाणी भरून ती उलटी करा. थेंब-थेंब पाण्यामुळे झाडांना ओलावा मिळत राहील.