Car Market: नव्या स्वरुपात येणार मारुतीची फ्रॉन्क्स कार, याची वैशिष्ट्ये आहेत...

Car Market : मारुती सुझुकी फ्रॉन्क्स लवकरच अपडेट होणार आहे. ताज्या रिपोर्ट्सनुसार, या कॉम्पॅक्ट क्रॉसओव्हरमध्ये 35 किमी पेक्षा जास्त मायलेज देणारे नवीन हायब्रीड पॉवरट्रेन आणि ADAS सारखे सेफ्टी फीचर्स दिले जाऊ शकतात. 

Car Market : भारतातील ऑटोमोबाइल इंडस्ट्री विस्तारत आहे. बड्या कार उत्पादक कंपन्यांच्या विविध मॉडेल्सना चांगली मागणी असून दररोज नवनव्या गाड्यांची नोंदणी मोठ्या प्रमाणावर होत आहे. अत्याधुनिक नव्या तंत्रज्ञानाचा वापर आणि आरामदायी प्रवास याच उद्देशाने कंपन्यांकडून विविध मॉडेल्सची निर्मिती केली जात आहे. याशिवाय, ग्राहकांच्या गरजा ओळखून सध्या उपलब्ध असलेल्या मॉडेल्समध्ये बदल केले जात आहेत. अशा अपग्रेडेड मॉडेल्सनाही ग्राहकांकडून चांगला प्रतिसाद मिळत आहे.

आता मारुती सुझुकी फ्रॉन्क्समध्ये लवकरच मोठे बदल होणार आहेत. ताज्या स्पाय फोटोंमध्ये या कॉम्पॅक्ट क्रॉसओव्हरवर हायब्रीड बॅज, रूफ रॅकवर लावलेला सेन्सर आणि मागील एक्सलवर एक अतिरिक्त सिस्टीम दिसत आहे. यावरून असे सूचित होते की, अपडेटेड मॉडेलमध्ये हायब्रीड पॉवरट्रेन, ADAS (ऑटोनॉमस ड्रायव्हर असिस्टन्स सिस्टीम) आणि ऑल-व्हील ड्राइव्ह सिस्टीम दिली जाऊ शकते. चला प्रत्येक अपडेटबद्दल सविस्तरपणे जाणून घेऊया.

नवी मारुती फ्रॉन्क्स हाय ब्रीड

मारुती सुझुकी स्वतःच्या सीरीज-हायब्रीड पॉवरट्रेनवर (कोडनेम HEV) काम करत आहे. हे 2027 मध्ये सादर केले जाईल. ही नवीन शक्तिशाली हायब्रीड सिस्टीम मिळवणारे फ्रॉन्क्स पहिले मॉडेल असेल. यात 1.2L Z12, 3-सिलेंडर पेट्रोल इंजिन, एक इलेक्ट्रिक मोटर आणि 1.5kWh-2kWh क्षमतेचा बॅटरी पॅक असेल. मारुती सुझुकीची ही हायब्रीड सिस्टीम सध्या ग्रँड विटारा आणि इनव्हिक्टोमध्ये वापरल्या जाणाऱ्या टोयोटाच्या हायब्रीड पॉवरट्रेनपेक्षा अधिक कार्यक्षम आणि किफायतशीर असल्याचे म्हटले जाते. रिपोर्ट्सनुसार, ही नवीन हायब्रीड पॉवरट्रेन 35 किमी प्रति लिटरपेक्षा जास्त मायलेज देऊ शकते.

नवी मारुती फ्रॉन्क्स ADAS

अपडेटेड फ्रॉन्क्समध्ये अ‍ॅडॉप्टिव्ह क्रूझ कंट्रोल, लेन डिपार्चर वॉर्निंग सिस्टीम, लेन कीप असिस्ट, लेन डिपार्चर प्रिव्हेन्शन, ब्लाइंड स्पॉट मॉनिटरिंग सिस्टीम, रिअर क्रॉस ट्रॅफिक अलर्ट आणि हाय बीम असिस्ट यांसारखे ADAS सेफ्टी फीचर्स दिले जातील. या कॉम्पॅक्ट क्रॉसओव्हरमध्ये 360-डिग्री कॅमेरा देखील दिला जाऊ शकतो.

नवी मारुती फ्रॉन्क्स AWD

मागील एक्सलवर दिसणारी सिस्टीम या कॉम्पॅक्ट क्रॉसओव्हरमध्ये AWD सिस्टीम दिली जाण्याचे संकेत देऊ शकते. फ्रॉन्क्सचे AWD व्हर्जन आधीपासूनच जपान आणि युरोपमध्ये विकले जात आहे. हे AWD सेटअप ग्रँड विटारामध्ये दिल्या जाणाऱ्या सिस्टीमसारखेच असेल, जे पूर्ण 4X4 वापराऐवजी हलक्या ऑफ-रोडिंगसाठी डिझाइन केलेले आहे.

आणखी काय?

एकूण एक्सटीरियर स्टायलिंग आणि केबिन लेआउटमध्ये कोणताही मोठा बदल अपेक्षित नाही. तथापि, नवीन फीचर्स आणि मेकॅनिकल अपग्रेडमुळे अपडेटेड फ्रॉन्क्स सध्याच्या मॉडेलपेक्षा महाग होण्याची शक्यता आहे.