Car Market: मारुती सुझुकीने 2025-26 या आर्थिक वर्षात 23.4 लाख गाड्यांचे उत्पादन करून एक नवा विक्रम रचला आहे. कंपनीच्या इतिहासातील हे एका वर्षातील सर्वाधिक उत्पादन आहे.
मारुती सुझुकी इंडियाने 2025-2026 या आर्थिक वर्षात तब्बल 23.4 लाख गाड्यांचे उत्पादन करून नवा विक्रम केला आहे. कंपनीने गुरुवारी ही माहिती दिली. सुझुकी मोटर कॉर्पोरेशनच्या जगभरातील कंपन्यांमध्ये हा टप्पा गाठणारी मारुती सुझुकी ही एकमेव कंपनी आहे. यावर्षी डिझायर, फ्रॉन्क्स, स्विफ्ट, अर्टिगा आणि बलेनो या पाच मॉडेल्सनी प्रत्येकी 2 लाख युनिट्सपेक्षा जास्त विक्री करून टॉप 5 मध्ये स्थान मिळवले आहे.
24
ऑटोमोबाईल इकोसिस्टम
मारुती सुझुकी इंडियाचे व्यवस्थापकीय संचालक आणि सीईओ, हिसाशी ताकेउची म्हणाले, 'हा आमच्यासाठी अत्यंत अभिमानाचा क्षण आहे. जगात फार कमी कंपन्यांनी एकाच देशात इतक्या मोठ्या संख्येने गाड्यांचे उत्पादन केले आहे. आम्ही ग्राहकांच्या बदलत्या गरजा आणि आवडीनुसार उत्पादने आणि तंत्रज्ञान देण्यावर नेहमीच विश्वास ठेवला आहे. गेल्या साडेचार दशकांत आम्ही तयार केलेल्या ऑटोमोबाईल इकोसिस्टममुळेच हे शक्य झाले आहे.'
34
एकूण स्थापित उत्पादन क्षमता
ताकेउची पुढे म्हणाले, 'आमची मूळ कंपनी सुझुकी मोटर कॉर्पोरेशनचा भारताच्या विकासावर दृढ विश्वास आहे. भारताला एक निर्यात केंद्र बनवण्यावर त्यांचा भर आहे, ज्यामुळे आम्हाला आमची उत्पादन क्षमता वाढविण्यात मदत होत आहे. आमचे लक्ष्य वार्षिक उत्पादन क्षमता सुमारे 40 लाख युनिट्सपर्यंत वाढवण्याचे आहे.' सध्या, मारुती सुझुकी हरियाणातील गुरुग्राम आणि खरखोडा आणि गुजरातमधील हंसलपूर येथे उत्पादन प्लांट चालवते. यांची एकूण स्थापित उत्पादन क्षमता वार्षिक सुमारे 24 लाख युनिट्स आहे.
कंपनीने आपल्या विस्तार योजनेचा भाग म्हणून मार्च 2026 मध्ये गुजरातमधील सानंद येथील खोराज इंडस्ट्रियल इस्टेटमध्ये पाचव्या उत्पादन प्लांटसाठी जमीन निवडली. हा प्लांट पूर्ण क्षमतेने सुरू झाल्यावर त्याची वार्षिक उत्पादन क्षमता 10 लाख युनिट्स असेल, अशी अपेक्षा आहे. कंपनी सध्या देशांतर्गत आणि निर्यातीसाठी 17 मॉडेल्समध्ये 650 हून अधिक व्हेरिएंट्सचे उत्पादन करत आहे, असेही या अहवालात म्हटले आहे.
