Car Insurance: पावसाळ्यात झाड पडल्यामुळे, गारपीट, वादळ किंवा पुरामुळे तुमच्या कारचं नुकसान झालंय का? अशावेळी इन्शुरन्सचे पैसे मिळतील की नाही? क्लेम मिळवण्यासाठी काय करावं लागेल, हे समजून घ्या.
पावसाळा सुरू होताच रस्त्यावर पाणी साचणं, जोराचा वारा आणि झाडं पडण्याच्या घटना वाढतात. अनेकांच्या गाड्या घराबाहेर किंवा रस्त्याच्या कडेला पार्क केलेल्या असतात. अशावेळी काही मिनिटांत हजारो रुपयांचं नुकसान होऊ शकतं. मग प्रश्न पडतो की, इन्शुरन्स कंपनी अशा नुकसानीची भरपाई देईल का?
25
कोणता इन्शुरन्स असल्यास पैसे मिळतील?
तुमच्या कारचा फक्त थर्ड-पार्टी इन्शुरन्स असेल, तर झाड पडल्यामुळे, गारपीट, पूर किंवा वादळामुळे झालेल्या नुकसानीसाठी क्लेम मिळणार नाही. कारण ही पॉलिसी फक्त दुसऱ्या व्यक्तीच्या जीवाला किंवा मालमत्तेला झालेल्या नुकसानीसाठी असते. पण तुमच्याकडे कॉम्प्रिहेन्सिव्ह इन्शुरन्स (Comprehensive Insurance) असेल, तर नैसर्गिक आपत्तीमुळे झालेल्या नुकसानीसाठीही संरक्षण मिळतं.
35
कारचं नुकसान झाल्यावर लगेच काय करावं?
सर्वात आधी, गाडीच्या नुकसानीचे वेगवेगळ्या अँगलने फोटो आणि व्हिडिओ काढा. त्यानंतर लगेचच इन्शुरन्स कंपनीला संपर्क करून क्लेम रजिस्टर करा. कंपनीचा सर्वेयर येण्यापूर्वी गाडीच्या स्थितीत कोणताही बदल करू नका, हे खूप महत्त्वाचं आहे.
जर ही घटना सार्वजनिक ठिकाणी घडली असेल, तर पोलीस किंवा स्थानिक प्रशासनाकडून घेतलेला रिपोर्ट क्लेम प्रक्रियेसाठी खूप उपयोगी ठरू शकतो. विशेषतः झाड पडण्यासारख्या घटनांमध्ये, अधिकृत कागदपत्रं तुमच्या क्लेमची विश्वासार्हता वाढवतात.
55
कार इन्शुरन्स रिन्यू करताना काय लक्षात ठेवावं?
अनेकजण कमी प्रीमियममुळे फक्त थर्ड-पार्टी इन्शुरन्स निवडतात. पण नैसर्गिक आपत्तीमुळे होणारा मोठा खर्च लक्षात घेता, कॉम्प्रिहेन्सिव्ह इन्शुरन्स (Comprehensive Insurance) घेण्याचा विचार करणं हा एक चांगला निर्णय ठरू शकतो. योग्य पॉलिसी आणि वेळेवर उचललेली पावलं तुम्हाला आर्थिक संकटातून वाचवू शकतात.
