Bike Market: होंडाने आपल्या प्रसिद्ध NX500 मॉडेलमध्ये आता रायडर्सना क्लच न दाबता गिअर बदलण्याची सोय उपलब्ध केली आहे. कंपनीने यात 'ई-क्लच' (E-Clutch) टेक्नॉलॉजी दिली आहे. 471cc इंजिन आणि दमदार सेफ्टी फीचर्ससह येणाऱ्या या बाईकबद्दल सविस्तर जाणून घेऊया.
बाईकप्रेमींसाठी, विशेषतः लांब पल्ल्याच्या प्रवासाची आवड असणाऱ्यांसाठी, होंडाने आपली प्रसिद्ध NX500 मॉडेल एका क्रांतीकारी 'ई-क्लच' तंत्रज्ञानासह सादर केली आहे. या बाईकची एक्स-शोरूम किंमत ७.४४ लाख रुपये ठेवण्यात आली आहे. चला पाहूया, या बाईकचं मुख्य वैशिष्ट्य काय आहे.
25
वैशिष्ट्ये काय?
या बाईकचं सर्वात मोठं वैशिष्ट्य म्हणजे तिची क्लच सिस्टीम. सामान्यपणे गिअर बदलताना आपल्याला क्लच लिव्हर दाबावा लागतो. पण या नव्या मॉडेलमध्ये तुम्ही क्लचला हात न लावता अगदी सहजपणे गिअर बदलू शकता. यात असलेले दोन इलेक्ट्रॉनिक अॅक्ट्युएटर्स गिअर बदलताना आपोआप क्लचचं काम करतात. तुम्हाला जुन्या पद्धतीने क्लच दाबून बाईक चालवायची असेल, तर ती सोयही यात आहे. या तंत्रज्ञानामुळे बाईकचं वजन 3 किलोने वाढून आता 199 किलो झालं आहे. होंडाने याआधी आपल्या CB650R मॉडेल्समध्येही हे फीचर दिलं आहे.
35
वेगाच्या बाबतीत कोणतीही तडजोड नाही
कंपनीने वेगाच्या बाबतीत कोणतीही तडजोड केलेली नाही. यात 471cc क्षमतेचं ट्विन-सिलिंडर, लिक्विड-कूल्ड इंजिन दिलं आहे. हे इंजिन 47 हॉर्सपॉवर (HP) आणि 43 Nm टॉर्क निर्माण करतं. ६-स्पीड गिअरबॉक्स असलेली ही बाईक खडबडीत रस्त्यांवरही सुसाट धावण्यासाठी तयार केली आहे. रस्त्यावर चांगली पकड मिळावी यासाठी पुढच्या बाजूला 19-इंच आणि मागच्या बाजूला 17-इंचाची अलॉय व्हील्स दिली आहेत.
पुढच्या बाजूला 'अप-साइड डाउन' (USD) फोर्क्स आणि मागच्या बाजूला 'मोनोशॉक' सस्पेन्शन असल्यामुळे प्रवास खूपच आरामदायी होतो. सुरक्षेसाठी ड्युअल चॅनल एबीएस (Anti-lock Braking System) आणि पुढच्या चाकाला ड्युअल डिस्क ब्रेक देण्यात आले आहेत.
55
TFT स्क्रीन
रायडरला आवश्यक माहिती देण्यासाठी या बाईकमध्ये 5-इंचाची TFT स्क्रीन आहे. यात ट्रॅक्शन कंट्रोल फीचर दिलं असलं तरी, रायडिंग मोड्ससारखे महागडे फीचर्स वगळण्यात आले आहेत. ही बाईक शहरातल्या ट्रॅफिकमध्ये वारंवार क्लच दाबून थकलेल्या रायडर्ससाठी आणि लांबच्या प्रवासाला जाणाऱ्यांसाठी एक उत्तम पर्याय आहे. होंडाच्या या 'क्रेझी' अपडेटची सध्या बाईकप्रेमींमध्ये जोरदार चर्चा सुरू आहे.
