Yuzvendra Chahal : 'खासगी आयुष्य उद्ध्वस्त झालं, दारूच्या आहारी गेलो होतो'; युझवेंद्र चहलचा मोठा खुलासा

भारताचा फिरकीपटू युझवेंद्र चहलने त्याच्या खासगी आयुष्यातील संघर्ष आणि दारूच्या व्यसनाबद्दल मोठा खुलासा केला आहे. घटस्फोटानंतर मानसिकदृष्ट्या खचलेल्या चहलने रिहॅब सेंटरमध्ये उपचार घेतले आणि आता तो पुन्हा एकदा नव्या जोमाने आयुष्यात परतला आहे.

नवी दिल्ली : भारताचा स्टार फिरकीपटू युझवेंद्र चहलने त्याच्या आयुष्यातील सर्वात कठीण काळाबद्दल मनमोकळ्या गप्पा मारल्या आहेत. भारताचा माजी सलामीवीर आकाश चोप्राच्या पॉडकास्टवर बोलताना या ३६ वर्षीय खेळाडूने त्याच्या खासगी आयुष्यातील वाईट काळ आणि त्यातून तो कसा बाहेर पडला, यावर प्रकाश टाकला. चहलने आयपीएलच्या १८८ सामन्यांमध्ये २३३ विकेट्स घेतल्या आहेत. तसेच, त्याने भारतासाठी ७२ एकदिवसीय आणि ८० टी-२० सामने खेळले आहेत.

आंतरराष्ट्रीय क्रिकेटमध्ये एवढी मोठी मजल मारूनही त्याला अद्याप एकही कसोटी सामना खेळण्याची संधी मिळालेली नाही. व्यावसायिक कारकिर्दीत यश मिळवत असतानाच, खासगी आयुष्यात मात्र त्याला मोठ्या संकटांचा सामना करावा लागला. घटस्फोटानंतर मानसिक स्थिती बिघडल्याने आपण दारूच्या आहारी गेलो होतो, असा धक्कादायक खुलासा चहलने केला.

तो म्हणाला, "गेल्या वर्षी काउंटी क्रिकेट खेळून आल्यावर माझं दारू पिणं सर्व मर्यादा ओलांडून गेलं होतं. त्यानंतर मी रिहॅब सेंटरमध्ये जाण्याचा निर्णय घेतला आणि तिथे २६ दिवस काढले. या एका निर्णयाने माझ्या आयुष्यात खूप मोठा बदल घडवला. माझ्यात अधिक प्रगल्भता आली आणि भावनांवर नियंत्रण ठेवायला मी शिकलो. गेल्या आयपीएलमध्ये मला माझं शरीर पुन्हा एखाद्या ३० वर्षांच्या तरुणासारखं तंदुरुस्त वाटू लागलं होतं."

२०११ मध्ये जेव्हा चहलने पहिल्यांदा आयपीएल खेळायला सुरुवात केली, तेव्हा एबी डिव्हिलियर्सने दिलेला एक सल्लाही त्याने यावेळी आठवला. "आयुष्यात समतोल राखणं खूप महत्त्वाचं असतं, असं एबीने मला सांगितलं होतं. हे ऐकायला सोपं वाटतं, पण प्रत्यक्षात अमलात आणणं खूप कठीण आहे. माझ्या घटस्फोटानंतर गोष्टी हाताबाहेर गेल्या होत्या. जर मी असाच वागत राहिलो, तर ज्या क्रिकेटवर मी सर्वात जास्त प्रेम करतो, तेच क्रिकेट उद्ध्वस्त होईल, याची मला जाणीव झाली," असंही तो पुढे म्हणाला.

आपल्या खासगी आयुष्याची लोकांमध्ये चर्चा होत असल्याने आपण मानसिकदृष्ट्या खचलो होतो आणि त्याचा परिणाम खेळावरही झाला, असं चहलने स्पष्ट केलं. अँझायटी आणि पॅनिक अटॅकचा आपल्याला खूप मोठा त्रास सहन करावा लागला, असंही त्याने सांगितलं. गेल्या काही हंगामांपासून आयपीएलमध्ये दमदार कामगिरी करणाऱ्या चहलने २०२५ मध्ये १६ आणि २०२६ मध्ये १२ विकेट्स घेतल्या होत्या. आता या सर्व संकटांवर मात करून आपण सध्या खूप आनंदी असल्याचं त्याने स्पष्ट केलं.