Virat Kohli Delhi Match : दिल्लीत विराट कोहलीची प्रतीक्षा वाढणार; श्रीलंका वनडेची जागा बदलणार?

१३ डिसेंबरला दिल्लीत होणारा भारत-श्रीलंका पहिला वनडे सामना दुसरीकडे हलवला जाण्याची शक्यता आहे. अरुण जेटली स्टेडियमच्या आऊटफिल्डचं काम सुरू असल्यामुळे हा निर्णय घेतला जाऊ शकतो. यामुळे विराट कोहलीला घरच्या मैदानावर खेळताना पाहण्याची चाहत्यांची प्रतीक्षा आणखी वाढणार आहे.

नवी दिल्ली : दिल्लीत विराट कोहलीला घरच्या मैदानावर खेळताना पाहण्यासाठी चाहत्यांना आणखी थोडी वाट पाहावी लागणार आहे. १३ डिसेंबरला भारत आणि श्रीलंका यांच्यात पहिला वनडे सामना होणार आहे. पण दिल्लीच्या अरुण जेटली स्टेडियमवर हा सामना होण्याची शक्यता खूपच कमी आहे. स्टेडियमच्या आऊटफिल्डचं काम सध्या सुरू असल्यामुळे हा सामना दिल्लीतून दुसऱ्या शहरात हलवण्याचा विचार सुरू आहे.

बीसीसीआयने (BCCI) गेल्या मार्च महिन्यात जेव्हा वेळापत्रक जाहीर केलं होतं, तेव्हा दिल्लीला या सामन्याचं यजमानपद दिलं होतं. पण स्टेडियममध्ये सध्या सुरू असलेल्या कामाचा वेग पाहता, पुढच्या महिन्यापर्यंत मैदान तयार होईल की नाही, यावर प्रश्नचिन्ह आहे. दिल्ली अँड डिस्ट्रिक्ट क्रिकेट असोसिएशन (DDCA) सध्या आऊटफिल्ड सुधारण्याचं काम करत आहे. पाऊस पडल्यावर पाणी लवकर वाहून जावं आणि मैदानावर पाणी साचू नये, यासाठी हे काम सुरू आहे.

सूत्रांनी दिलेल्या माहितीनुसार, हे काम पूर्ण व्हायला साधारण चार महिने लागतील. आयपीएल २०२७ (IPL 2027) पर्यंतच हे स्टेडियम क्रिकेट सामन्यांसाठी पूर्णपणे तयार होईल, असा अंदाज आहे. मुल्लानपूर आणि लखनौच्या स्टेडियममध्ये जशी अत्याधुनिक ड्रेनेज सिस्टीम आहे, तशीच सिस्टीम आता इथेही बसवली जात आहे. हे नवीन तंत्रज्ञान आल्यावर पाऊस पडला तरी संपूर्ण मैदान कव्हरने झाकण्याची गरज पडणार नाही आणि पाणीही साचणार नाही, असं तज्ज्ञांचं म्हणणं आहे.

जर १३ डिसेंबरचा सामना दुसरीकडे हलवला, तर विराट कोहलीला आपल्या घरच्या शहरात आंतरराष्ट्रीय सामना खेळण्याची संधी तात्पुरती हुकणार आहे. विराटने दिल्लीत आपला शेवटचा वनडे सामना २०२३ च्या वनडे वर्ल्ड कपमध्ये खेळला होता. ११ ऑक्टोबर २०२३ रोजी अफगाणिस्तानविरुद्ध झालेल्या त्या सामन्यात भारताने आठ विकेट्सने दणदणीत विजय मिळवला होता.