Vaibhav Sooryavanshi : कर्णधार होताच वैभव सूर्यवंशीच्या घरी आली Tata Sierra; IPL मधील कामगिरीमुळे दिवाळीत खास गिफ्ट

भारताचा १५ वर्षांचा युवा क्रिकेटपटू वैभव सूर्यवंशीला आयपीएल २०२६ चा 'सुपर स्ट्रायकर ऑफ द सीझन' ठरल्याबद्दल नवी कोरी टाटा सिएरा (Tata Sierra) एसयूव्ही कार गिफ्ट मिळाली आहे. नुकतीच त्याची सय्यद मुश्ताक अली टी-२० स्पर्धेसाठी बिहार संघाच्या कर्णधारपदी निवड झाली असून, त्याच्या यशाची यादी वाढतच चालली आहे.

नवी दिल्ली : भारताचा युवा क्रिकेटपटू वैभव सूर्यवंशी पुन्हा एकदा चर्चेत आलाय. आपल्या तुफानी फलंदाजीने त्याने क्रिकेट फॅन्सना वेड लावलंय. आता या १५ वर्षांच्या पोराच्या कार कलेक्शनमध्ये आणखी एका महागड्या गाडीची भर पडली आहे. आयपीएल २०२६ मध्ये ‘सुपर स्ट्रायकर ऑफ द सीझन’ ठरल्याने वैभवला बक्षीस म्हणून नवी कोरी टाटा सिएरा (Tata Sierra) एसयूव्ही मिळाली आहे. नुकतीच त्याची सय्यद मुश्ताक अली टी-२० स्पर्धेसाठी बिहार संघाचा कॅप्टन म्हणून निवड झाली होती. त्यातच आता त्याला हे दुसरं मोठं गिफ्ट मिळालंय.

बिहारच्या वैभव सूर्यवंशीने २०२५ मध्ये राजस्थान रॉयल्सकडून आयपीएलमध्ये पदार्पण केलं होतं. त्यानंतर लागोपाठ दमदार खेळी करत त्याने क्रिकेट जगतात स्वतःची वेगळी ओळख निर्माण केली. आयपीएलचे दोन सीझन गाजवल्यानंतर त्याला पहिल्यांदाच टीम इंडियातून बोलावणं आलं. या वर्षी जुलैमध्ये इंग्लंडविरुद्धच्या टी-२० मालिकेतून त्याने आंतरराष्ट्रीय क्रिकेटमध्ये पाऊल ठेवलं.

आतापर्यंत १० आंतरराष्ट्रीय टी-२० सामने खेळताना वैभवने २९५ धावा कुटल्या आहेत, ज्यात दोन अर्धशतकांचा समावेश आहे. ऑक्टोबरमध्ये न्यूझीलंडविरुद्ध त्याने अवघ्या १९ चेंडूत ४५ धावांची वादळी खेळी केली होती. ही त्याची अलीकडची सर्वात भारी कामगिरी ठरली.

कुटुंबासोबत टाटा शोरूममध्ये पोहोचला वैभव

नुकतंच वैभव सूर्यवंशी आपल्या कुटुंबासोबत टाटा मोटर्सच्या शोरूममध्ये गेला होता. आयपीएल २०२६ च्या ‘सुपर स्ट्रायकर ऑफ द सीझन’ पुरस्काराचा भाग म्हणून तिथे त्याला टाटा सिएरा एसयूव्हीची चावी देण्यात आली. त्याचे हे फोटो सध्या सोशल मीडियावर जोरदार व्हायरल होत आहेत. पिवळ्या रंगाच्या टाटा सिएरा कारसमोर वैभव त्याचे आई-वडील आणि भावांसोबत पोज देताना दिसतोय. युवा खेळाडूला मिळालेल्या या महागड्या गिफ्टचं त्याचे फॅन्सही खूप कौतुक करत आहेत.

🚨 Vaibhav Sooryavanshi welcomes a new member to his family! ❤️

Vaibhav Sooryavanshi was spotted receiving his brand-new Tata Sierra SUV at the showroom alongside his family. He won the car for being named the Super Striker of the Season in IPL 2026.

A special Dhanteras and Diwali 2026 celebration! 🪔✨

A brand-new Tata Sierra in Vaibhav Sooryavanshi's garage! ❤️

— Sonu (@Cricket_live247) November 8, 2026

वैभवकडे आधीपासूनच आहे Tata Curvv EV

वैभव सूर्यवंशीच्या कार कलेक्शनमध्ये आलेली टाटा सिएरा ही काही पहिली गाडी नाही. याआधी आयपीएल २०२५ मध्ये 'सुपर स्ट्रायकर ऑफ द सीझन' ठरल्याबद्दल त्याला टाटा कर्व्ह ईव्ही (Tata Curvv EV) गाडी गिफ्ट मिळाली होती. आयपीएलच्या पहिल्याच हंगामात वैभवने दाखवलेल्या आक्रमक आणि निडर फलंदाजीचं बक्षीस म्हणून त्याला ही इलेक्ट्रिक एसयूव्ही दिली गेली होती. आता सलग दुसऱ्या आयपीएल हंगामातही भन्नाट खेळ करत त्याने टाटा सिएरा आपल्या नावावर केली आहे.

आयपीएल २०२६ मध्ये ७७६ धावा आणि ऑरेंज कॅप

आयपीएल २०२६ मध्ये वैभव सूर्यवंशीची बॅट चांगलीच तळपली. या स्पर्धेत १६ सामने खेळत त्याने सर्वाधिक ७७६ धावांचा डोंगर उभा केला आणि मानाच्या 'ऑरेंज कॅप'वर स्वतःचं नाव कोरलं. त्याच्या बॅटमधून तब्बल ६३ चौकार आणि ७२ षटकार पाहायला मिळाले. या हंगामात पाच अर्धशतके आणि एक शतक ठोकत वैभवने प्रतिस्पर्धी गोलंदाजांना घाम फोडला होता. त्याची हीच स्फोटक फलंदाजी राजस्थान रॉयल्स संघाचं मुख्य आकर्षण ठरली होती.

बिहारच्या सीनियर टीमचा कॅप्टन म्हणूनही निवड

वयाच्या अवघ्या १५ व्या वर्षी आंतरराष्ट्रीय क्रिकेटमध्ये पदार्पण करणारा वैभव सूर्यवंशी जगातील सर्वात तरुण आंतरराष्ट्रीय खेळाडू ठरला आहे. आता त्याच्या खांद्यावर आणखी एक मोठी जबाबदारी आली आहे. बिहारच्या सीनियर पुरुष क्रिकेट संघाच्या कर्णधारपदी त्याची वर्णी लागली आहे. २०२६ च्या सय्यद मुश्ताक अली ट्रॉफीच्या सुरुवातीच्या दोन सामन्यांमध्ये तो संघाचं नेतृत्व करणार आहे. त्यामुळे मैदानाबाहेर नव्या कारचं सेलिब्रेशन करणारा हा पठ्ठ्या, आता मैदानावर कॅप्टन म्हणून नव्या आव्हानासाठी सज्ज झाला आहे.