Gautam Gambhir : टीम इंडियाच्या विजयासाठी गौतम गंभीरने घेतलं महाकालचे दर्शन

भारतीय क्रिकेट संघाचे मुख्य प्रशिक्षक गौतम गंभीर यांनी रविवारी उज्जैनच्या महाकालेश्वर मंदिरात जाऊन दर्शन घेतले. भारत आणि वेस्ट इंडिज यांच्यातील तिसऱ्या टी-२० सामन्यापूर्वी त्यांनी देशाच्या आणि टीम इंडियाच्या यशासाठी प्रार्थना केली.

भोपाळ : भारतीय पुरुष क्रिकेट संघाचे मुख्य प्रशिक्षक आणि माजी क्रिकेटपटू गौतम गंभीर यांनी रविवारी उज्जैनच्या महाकालेश्वर मंदिरात जाऊन दर्शन घेतले. भारत आणि वेस्ट इंडिज यांच्यातील पाच सामन्यांच्या टी-२० मालिकेतील तिसरा सामना आज इंदूरच्या होळकर स्टेडियमवर खेळवला जाणार आहे. त्यापूर्वी गंभीरने महाकालचे आशीर्वाद घेतले.

गौतम गंभीरने घेतले महाकालेश्वरचे दर्शन

एएनआयशी बोलताना गंभीर म्हणाला की, महाकालेश्वर मंदिरात दर्शन घेण्याची संधी मिळाल्याबद्दल मी खूप आभारी आहे. यावेळी त्याने देशाच्या कल्याणासाठी आणि टीम इंडियाच्या यशासाठी प्रार्थना केली. "बाबांनी मला पुन्हा आशीर्वाद दिला आणि दर्शनासाठी बोलावले, यासाठी मी खरोखरच कृतज्ञ आहे. त्यांचे आशीर्वाद आपल्या सर्वांवर आणि संपूर्ण देशावर राहोत, तसेच आपला देश आणि भारतीय संघ अशीच चांगली कामगिरी करत राहो," असे गंभीर म्हणाला.

वेस्ट इंडिजने विक्रमी पाठलाग करत मालिकेत केली बरोबरी

वेस्ट इंडिजविरुद्धच्या सध्याच्या मालिकेचा विचार केला तर, गंभीरच्या मार्गदर्शनाखालील भारतीय संघाला पाहुण्या संघाकडून सहा गडी राखून पराभव स्वीकारावा लागला. या सामन्यात तब्बल ५०० हून अधिक धावा कुटल्या गेल्या. रांचीमध्ये झालेल्या दुसऱ्या टी-२० सामन्यात वेस्ट इंडिजचा कर्णधार शाई होपच्या ४५ चेंडूंतील शतकी खेळी आणि शेरफेन रदरफोर्डच्या ८४ धावांच्या तुफानी खेळीच्या जोरावर वेस्ट इंडिजने २५० धावांचे लक्ष्य पार केले. हा त्यांचा टी-२० क्रिकेटमधला आतापर्यंतचा सर्वात मोठा रन चेस ठरला. तसेच, २०२३ मध्ये दक्षिण आफ्रिकेने वेस्ट इंडिजविरुद्ध २५९ धावांचे लक्ष्य पार केले होते, त्यानंतरचा हा टी-२० मधील दुसरा सर्वात मोठा रन चेस आहे.

रांचीमध्ये धावांचा पाऊस

वेस्ट इंडिजने नाणेफेक जिंकून प्रथम गोलंदाजी करण्याचा निर्णय घेतला. संजू सॅमसन (४१ चेंडूत ८२ धावा, ९ चौकार आणि ४ षटकार), इशान किशन (२२ चेंडूत ४३ धावा, ६ चौकार आणि २ षटकार), तिलक वर्मा (१८ चेंडूत नाबाद ४४ धावा, ३ चौकार आणि ३ षटकार) आणि कर्णधार श्रेयस अय्यर (१८ चेंडूत ४० धावा, ३ चौकार आणि ३ षटकार) यांच्या फटकेबाजीमुळे भारताने २० षटकांत ५ बाद २४९ धावांपर्यंत मजल मारली.

भारताने ५.१ षटकांत वेस्ट इंडिजची अवस्था ३ बाद ५८ अशी केली होती. पण त्यानंतर शाई होप (४५ चेंडूत नाबाद १०२ धावा, ६ चौकार आणि ९ षटकार), शेरफेन रदरफोर्ड (३७ चेंडूत ८४ धावा, ७ चौकार आणि ७ षटकार) आणि रोमॅरियो शेफर्ड (१३ चेंडूत नाबाद ३४ धावा, ३ चौकार आणि ३ षटकार) यांनी दमदार फलंदाजी करत वेस्ट इंडिजला १८.३ षटकांत ४ गड्यांच्या मोबदल्यात विजय मिळवून दिला.