RCB On Sale आयपीएल विजयानंतर संघाचे मूल्य सुमारे 2 अब्ज डॉलर्स, विजय मल्ल्या पुन्हा चर्चेत

ब्रिटिश मद्य उत्पादक डियाजियो आपल्या आयपीएल संघ रॉयल चॅलेंजर्स बंगळुरुचा हिस्सा विकण्याचा विचार करत आहे. संघाचे मूल्य सुमारे २ अब्ज डॉलर्स असल्याचा अंदाज आहे.

बंगळुरु : ब्रिटिश मद्य उत्पादक डियाजियो पीएलसी, इंडियन प्रीमियर लीग (आयपीएल) संघ रॉयल चॅलेंजर्स बंगळुरु (आरसीबी) मधील आपला हिस्सा अंशतः किंवा पूर्णपणे विकण्याचा विचार करत असल्याचे वृत्त आहे, ज्यामुळे क्रिकेट जगतात खळबळ उडाली आहे.

आरसीबीने अहमदाबाद येथे झालेल्या १८ व्या आयपीएलच्या अंतिम सामन्यात विजय मिळवून पहिला आयपीएल ट्रॉफी जिंकला होता. यानंतर बंगळुरुमध्ये झालेल्या विजय सोहळ्या दरम्यान एम चिन्नास्वामी स्टेडियमबाहेर झालेल्या चेंगराचेंगरीत ११ जणांचा मृत्यू झाला. या पार्श्वभूमीवर आरसीबी विक्रीची बातमी क्रिकेट जगतात चर्चेचा विषय ठरली आहे.

डियाजियोने आपली भारतीय उपकंपनी युनायटेड स्पिरिट्स लिमिटेडद्वारे आरसीबीचे मालकी हक्क मिळवले आहेत. या संघाचे मूल्य सुमारे २ अब्ज डॉलर्स (सुमारे १६,७०० कोटी रुपये) असल्याचा अंदाज ब्लूमबर्गच्या वृत्तात वर्णन केला आहे.

आरसीबीने नुकताच २०२५ ची आयपीएल ट्रॉफी पहिल्यांदाच जिंकली आहे, ज्यामुळे संघाच्या ब्रँड मूल्यात लक्षणीय वाढ झाली आहे. परंतु, भारताचे आरोग्य मंत्रालय आयपीएलमध्ये मद्य आणि तंबाखू उत्पादनांच्या जाहिरातींवर बंदी घालण्यासाठी आग्रही आहे, हे डियाजियोसाठी एक प्रमुख कारण असू शकते. याव्यतिरिक्त, अमेरिका सारख्या प्रमुख बाजारपेठांमध्ये प्रीमियम मद्य विक्री कमी झाल्याने कंपनीला आपल्या मुख्य व्यवसायावर लक्ष केंद्रित करण्यास प्रवृत्त केले आहे असे म्हटले जात आहे.

२००८ मध्ये उद्योजक विजय मल्ल्या यांनी किंगफिशर एअरलाइन्सद्वारे १११.६ दशलक्ष डॉलर्सला आरसीबी खरेदी केली होती. मल्ल्यांचे व्यावसायिक साम्राज्य कोसळल्यानंतर, डियाजियोने युनायटेड स्पिरिट्सचे अधिग्रहण करून आरसीबीचे मालकी हक्क मिळवले. आता, संघाच्या अलीकडील यशामुळे, डियाजियो या करारातून मोठा नफा मिळवण्याची योजना आखत आहे. या बातमीमुळे युनायटेड स्पिरिट्सचे शेअर्स ३.३% ने वाढले आहेत, जे पाच महिन्यांच्या उच्चांकावर पोहोचले आहेत. तथापि, या व्यवहाराबाबत अद्याप अंतिम निर्णय घेण्यात आलेला नाही, आणि डियाजियो आपले मालकी हक्क कायम ठेवण्याची शक्यता देखील आहे असे सूत्रांनी सांगितले.

पुन्हा मल्ल्यांच्या हाती येणार का आरसीबी?

कर्जबाजारी होऊन भारतातून पळून गेलेले मद्य उद्योजक विजय मल्ल्या यांच्या अलीकडील मुलाखतीने यूट्यूबसह सोशल मीडियावर खळबळ उडवून दिली आहे. विजय मल्ल्या यांनी भारतात आपले ६२०३ कोटी रुपयांचे कर्ज असल्याचे म्हटले आहे. परंतु सरकारने मल्ल्यांचे ९ हजार कोटी रुपयांचे कर्ज असल्याचे म्हटले आहे. विजय मल्ल्या भारतातून पळून गेल्यानंतर सरकारने त्यांची सुमारे १४ हजार कोटी रुपयांची मालमत्ता जप्त केली आहे. तरीही विजय मल्ल्यांकडे परदेशात मोठी मालमत्ता आणि संपत्ती आहे. त्यामुळे जर डियाजियोने आरसीबी विकण्याचा निर्णय घेतला तर विजय मल्ल्या पुन्हा आरसीबीवर नियंत्रण मिळवतील का हे पाहणे उत्सुकतेचे ठरेल.

पहिला ट्रॉफी जिंकला आरसीबीने:

१८ व्या आयपीएलमध्ये रजत पाटीदारच्या नेतृत्वाखालील रॉयल चॅलेंजर्स बंगळुरुने पंजाब किंग्जला ६ धावांनी पराभूत करून विजेतेपद पटकावले. यामुळे आरसीबीने आयपीएल ट्रॉफीचा दुष्काळ संपवला.