Deepak Chahar Bat Theft : 'योगीजींकडे जाऊ की मोदीजींकडे?', दीपक चहरच्या दीड लाखांच्या बॅट्स चोरीला

मुंबई इंडियन्सचा अष्टपैलू खेळाडू दीपक चहरला मोठा धक्का बसलाय. आग्रा येथील त्याच्या क्रिकेट अकादमीतून दीड लाख रुपये किमतीच्या तीन खास बॅट्स चोरीला गेल्या आहेत. यावर त्याने एक मजेशीर व्हिडिओ शेअर करत योगीजी, मोदीजी किंवा देवाकडे मदत मागावी का, असा सवाल केलाय.

नवी दिल्ली : मुंबई इंडियन्सचा गोलंदाज आणि अष्टपैलू खेळाडू दीपक चहर सध्या सोशल मीडियावर चांगलाच व्हायरल होत आहे. उत्तर प्रदेशातील आग्रा येथील चहर क्रिकेट अकादमीच्या सराव मैदानातून त्याच्या बॅट्स चोरीला गेल्या आहेत. या घटनेवर त्याने आश्चर्य व्यक्त केलंय.

दीपकचे वडील लोकेंद्र सिंग चहर यांच्या मालकीची ही अकादमी आहे. तिथे स्थानिक तरुण नियमित सराव करतात. यावर्षीच्या आयपीएलमध्ये मुंबई इंडियन्सकडून खेळताना दीपकने ८ सामन्यांत ८ विकेट्स घेतल्या होत्या. आता तो पुन्हा सरावासाठी मैदानात परतला आहे.

दुखापती आणि फिटनेसच्या समस्यांमुळे दीपक २०२३ पासून राष्ट्रीय संघातून बाहेर आहे. गेल्या देशांतर्गत क्रिकेट हंगामात त्याने रणजी करंडक स्पर्धेत राजस्थानचे प्रतिनिधित्व केले होते. तीन सामन्यांत चार विकेट्स घेतल्यानंतर खुब्याच्या दुखापतीमुळे त्याला उर्वरित हंगामातून बाहेर पडावे लागले होते.

'योगीजींकडे जाऊ की मोदीजींकडे?'

११ ऑक्टोबरपासून सुरू होणाऱ्या रणजी करंडक हंगामासाठी दीपक चहर सराव करत आहे. पण याच दरम्यान त्याला एक अनपेक्षित धक्का बसला. त्याच्या कुटुंबाच्या अकादमीच्या मैदानातून त्याच्या तीन 'प्लेअर-एडिशन' बॅट्स चोरीला गेल्या. या बॅट्सची किंमत सुमारे दीड लाख रुपये आहे.

दीपकने त्याच्या अधिकृत इन्स्टाग्राम अकाउंटवर एक व्हिडिओ पोस्ट केलाय. त्यात तो म्हणाला की, चोरी करणाऱ्याला या साहित्याची खरी किंमत माहीत नसेल. त्याने मजेत तीन पर्यायही सुचवले: एकतर पोलिसांत तक्रार करणे, उत्तर प्रदेशचे मुख्यमंत्री योगी आदित्यनाथ किंवा पंतप्रधान नरेंद्र मोदी यांच्याकडे जाणे, किंवा थेट देवालाच साकडे घालणे.

"त्या खूप चांगल्या बॅट्स होत्या. ज्याने त्या चोरल्या त्याला त्यांची किंमत माहीत नाही. तो एकतर त्या विकून टाकेल किंवा त्यातून टेनिस बॉलने क्रिकेट खेळेल," असं चहर म्हणाला.

"सध्या मी पोलिसांत तक्रार करू शकतो, किंवा योगीजी किंवा मोदीजींकडे जाऊ शकतो. किंवा थेट देवालाच विनंती करू शकतो की ज्याने कोणी त्या चोरल्यात, त्याला पैसे दे आणि माझ्या बॅट्स मला परत कर," असंही तो पुढे म्हणाला.

दीपक चहर SS (सरीन स्पोर्ट्स) च्या बॅट्स वापरतो. त्याच्या एका बॅटची किंमत सुमारे ५०,००० रुपये आहे. त्यामुळे चोरीला गेलेल्या या तीन खास 'प्लेअर-एडिशन' बॅट्सची एकूण किंमत दीड लाख रुपयांच्या घरात जाते.

या व्यावसायिक दर्जाच्या बॅट्स आहेत. त्या खास उच्च-स्तरीय क्रिकेटसाठी बनवल्या जातात. त्यामुळे सामान्य खेळाडूंना मिळणाऱ्या बॅट्सपेक्षा त्या खूप महाग असतात.

'मी काय करायला हवं होतं?'

बॅट चोरीबद्दल पुढे बोलताना दीपक म्हणाला की, त्या व्यक्तीला मी स्वतःहून पैसे दिले असते. माझ्या या मौल्यवान बॅट्स गमावण्यापेक्षा त्याला रोख रक्कम देणं मला जास्त परवडलं असतं.

"मी त्याला पैसे देईन. किंवा मी SSA ला विनंती करून आणखी २-३ बॅट्स मागवू शकतो," चहर म्हणाला.

"तर तुम्हाला काय वाटतं, मी काय करायला हवं होतं?" असा सवाल त्याने चाहत्यांना केला.

दीपक चहरने डिसेंबर २०२३ मध्ये ऑस्ट्रेलियाविरुद्धच्या टी-२० सामन्यात भारतासाठी शेवटचा आंतरराष्ट्रीय सामना खेळला होता. तेव्हापासून तो आपला फॉर्म परत मिळवण्यासाठी प्रामुख्याने देशांतर्गत क्रिकेट आणि आयपीएलवर लक्ष केंद्रित करत आहे.