Vasai Crime : बापरे! बापाच्या रागातून 4 वर्षांच्या मुलाला जमिनीवर आपटलं, वसईतील थरारक CCTV फुटेज

Vasai Man Brutally Attacks 4 Year Old Boy : मुंबईजवळ असलेल्या वसईमध्ये वडिलांवर असलेल्या रागातून एका तरुणाने त्यांच्या ४ वर्षांच्या मुलावर जीवघेणा हल्ला केला. संदीप पवार नावाच्या या आरोपीने मुलाला पाय धरून जमिनीवर आपटलं.

Vasai Man Brutally Attacks 4 Year Old Boy : महाराष्ट्रातील वसईमधून एक अंगावर शहारे आणणारी घटना समोर आली आहे. वडिलांसोबत झालेल्या वादाचा राग एका तरुणाने त्यांच्या ४ वर्षांच्या मुलावर काढला. रागाच्या भरात या तरुणाने चिमुरड्या विघ्नेशला अक्षरशः पाय धरून जमिनीवर आपटलं आणि लोखंडी रॉडवर आदळलं. या प्रकरणी वसई पोलिसांनी संदीप पांडुरंग पवार नावाच्या आरोपीला अटक केली आहे. त्याच्यावर हत्येचा प्रयत्न केल्याचा गंभीर गुन्हा दाखल करण्यात आला आहे.

ही धक्कादायक घटना सोमवारी रात्री वसईतील अनुपम खार कॉम्प्लेक्सजवळ घडली. आरोपी संदीप पवार आणि पीडित मुलाच्या वडिलांमध्ये काही दिवसांपूर्वी किरकोळ वाद झाला होता. हाच राग मनात ठेवून संदीपने हे क्रूर कृत्य केलं. रस्त्याच्या कडेला उभ्या असलेल्या एका ऑटोरिक्षामध्ये विघ्नेश इतर मुलांसोबत खेळत होता. त्याला पाहताच संदीपचा राग अनावर झाला. तो धावत रिक्षाजवळ गेला आणि त्याने विघ्नेशला थेट पाय धरून बाहेर ओढलं.

यानंतर त्याने मुलाला हवेत उचलून त्याचं डोकं जमिनीवर आपटलं. इतक्यावरच तो थांबला नाही, तर जवळच्या लोखंडी रॉडवरही त्याने मुलाचं डोकं आदळलं आणि त्याला रस्त्यावर फेकून दिलं. मुलाचा रडण्याचा आवाज ऐकून त्याची आजी धावत आली. त्यांनी विघ्नेशला वाचवण्याचा प्रयत्न केला असता, आरोपी संदीपने त्यांनाही बेदम मारहाण केली. या संपूर्ण हल्ल्याचे दृश्य सीसीटीव्ही कॅमेऱ्यात कैद झाले आणि त्यानंतरच या घटनेची भीषणता जगासमोर आली. गंभीर जखमी झालेल्या विघ्नेशला तातडीने जवळच्या रुग्णालयात दाखल करण्यात आले असून, त्याची प्रकृती चिंताजनक आहे. घटनेनंतर पळून जाण्याच्या प्रयत्नात असलेल्या संदीपला वसई पोलिसांनी पाठलाग करून पकडलं.