Tukaram Mundhe : शाळेत वडापाव पुन्हा सुरू करा! चिमुकल्याच्या प्रश्नावर तुकाराम मुंढेंनी दिलं भन्नाट उत्तर

एका चिमुकल्याने थेट अन्न आणि औषध प्रशासन (FDA) आयुक्त तुकाराम मुंढे यांच्याकडे शाळेत वडापाव पुन्हा सुरू करण्याची गोड मागणी केली. मुलांच्या आरोग्यासाठी शाळेच्या ५० मीटर परिसरात जंक फूडवर बंदी घातल्यानंतर हा प्रसंग घडला असून, मुंढेंच्या उत्तराचा व्हिडिओ सध्या सोशल मीडियावर तुफान व्हायरल होत आहे.

मुंबई : एका लहान मुलाने राज्याचे अन्न आणि औषध प्रशासन (FDA) आयुक्त तुकाराम मुंढे यांच्याकडे शाळेत वडापावची गाडी पुन्हा सुरू करण्याची मागणी केली. यातूनच मग सकस आहारावर एक छान चर्चा रंगली. महाराष्ट्र FDA ने मुलांनी चांगलं आणि पौष्टिक खावं, यासाठी शाळेच्या आवारात आणि ५० मीटरच्या परिसरात जंक फूड विकण्यावर, वाटण्यावर आणि जाहिरातींवर कडक बंदी घातली आहे. या निर्णयानंतरच हा मजेशीर प्रसंग घडला.

वडापाव, समोसा, तळलेले पदार्थ, चिप्स, कोल्ड ड्रिंक्स, गोड पेये, चॉकलेट आणि आईस्क्रीम यांसारख्या मुलांच्या आवडत्या पदार्थांवर आता शाळेबाहेर बंदी आहे. हा नियम संपूर्ण महाराष्ट्रातील शाळांना लागू असून, याचा थेट परिणाम राज्यातील दोन कोटींहून अधिक विद्यार्थ्यांवर होणार आहे.

'इंद्रनील अणासुरे' (Indraneil Anaspure) नावाच्या इन्स्टाग्राम अकाउंटवरून या संवादाचा व्हिडिओ शेअर करण्यात आला आहे. या व्हिडिओमध्ये तो चिमुकला मुंढेंना सांगतोय की, शाळेबाहेरचा वडापाव पुन्हा सुरू करण्यासाठी त्याच्या मित्रांनी त्याला हा प्रश्न विचारायला सांगितला आहे.

या मुलाने मुंढेंना, "जर त्यांनी तुम्हाला विचारलं, तर तुम्ही त्यांना काय सांगाल?" असा निरागस प्रश्न विचारला.

मुंढेंनी यावर मुलांना पौष्टिक अन्न खाण्याचा सल्ला दिला. ते म्हणाले, "चांगलं खा, म्हणजे तुमचं शरीर आणि मन दोन्ही निरोगी राहील. नेहमी पौष्टिक आहार घ्या." तेलकट आणि फॅट्स असलेले पदार्थ चवीला छान लागतात, पण त्यामुळे आरोग्याचं नुकसान होतं, असंही त्यांनी या मुलाला समजावून सांगितलं.

पाहा व्हायरल व्हिडिओ

मुंढेंनी या वर्षाच्या सुरुवातीलाच या नव्या नियमांची घोषणा केली होती. शाळा प्रशासन आणि व्यवस्थापनाची या नियमांची कडक अंमलबजावणी करण्याची जबाबदारी असेल, असं त्यांनी स्पष्ट केलं होतं. जे या नियमांचं पालन करणार नाहीत, त्यांच्यावर कारवाईचा इशाराही त्यांनी दिलाय. FDA चे अधिकारी नियम पाळले जात आहेत की नाही, हे तपासण्यासाठी वर्षातून किमान दोनदा प्रत्येक शाळेला भेट देणार आहेत.

तुकाराम मुंढेंनी राज्यातील सर्व शालेय कॅन्टीनसाठी 'अन्न सुरक्षा परवाना' (Food Safety License) असणं आता बंधनकारक असल्याचंही जाहीर केलं आहे.