Mumbai Accident : सिग्नलवर थांबलेल्या गाड्यांना भरधाव कारने उडवलं, अंगावर काटा आणणारा CCTV
सार
मुंबईच्या मालाड पश्चिमेत एक भीषण अपघात झाला आहे. सिग्नलवर थांबलेल्या एका मोटरसायकल आणि तीन ऑटोरिक्षांना भरधाव कारने धडक दिली, ज्यात एका ३४ वर्षीय महिलेचा मृत्यू झाला आणि सहा जण जखमी झाले.
मुंबई : मुंबईच्या मालाडमधून एक धक्कादायक सीसीटीव्ही फुटेज समोर आलं आहे. यात एक भरधाव कार सिग्नलवर थांबलेल्या एका मोटरसायकल आणि तीन ऑटोरिक्षांना जोरदार धडक देताना दिसत आहे. मुंबईच्या मालाड पश्चिमेत झालेल्या या भीषण अपघातात एका ३४ वर्षीय महिलेचा मृत्यू झाला असून सहा जण जखमी झाले आहेत.
ही घटना रविवारी रात्री ८ वाजण्याच्या सुमारास मालाड पश्चिमेकडील मामलेदारवाडी-एसव्ही रोड जंक्शनवर घडली. हा भाग नेहमीच वर्दळीचा असतो. सीसीटीव्ही फुटेजमध्ये स्पष्ट दिसतंय की, सिग्नलवर थांबलेल्या गाड्यांना एका वेगवान कारने मागून धडक दिली. यानंतर लोक जीव वाचवण्यासाठी सैरावैरा पळू लागले.
CCTV footage of #Mumbai's #Malad road accident emerges, speeding car collides with 15-16 people
CCTV footage of the road accident that occurred in Mumbai's Malad on August 30 has surfaced. The footage shows a speeding car ramming into people. In the accident, the car allegedly… https://t.co/7996nkdy2k pic.twitter.com/mRFUqJmMuV— Siraj Noorani (@sirajnoorani) September 3, 2026
या अपघातात प्रियंका सात्रा या ३४ वर्षीय महिलेचा दुर्दैवी मृत्यू झाला. प्रियंका कायद्याची पदवीधर होती आणि तिला दोन मुलं आहेत. ती पती मयंकसोबत मोटरसायकलवर मागे बसून प्रवास करत होती. त्याचवेळी भरधाव कारने त्यांच्या बाईकला धडक दिली. धडक इतकी जोरदार होती की दोघेही हवेत उडून खाली पडले.
प्रियंकाला तातडीने जवळच्या रुग्णालयात नेण्यात आले, पण तिथे तिला मृत घोषित करण्यात आले. तिचा पती मयंक याच्या पाठीला आणि इतर ठिकाणी फ्रॅक्चर झाले असून, त्याच्यावर उपचार सुरू आहेत.
पोलिसांनी दिलेल्या माहितीनुसार, मोटरसायकलला धडक दिल्यानंतर तीच कार पुढे जाऊन तीन ऑटोरिक्षांना धडकली. यात रिक्षाचालक आणि प्रवासी जखमी झाले.
या प्रकरणी पोलिसांनी ७० वर्षीय ड्रायव्हर कृष्णा चामणकर याला अटक केली आहे. चौकशीदरम्यान चामणकरने पोलिसांना सांगितले की, मालाड सबवेकडून एसव्ही रोडकडे जाताना ब्रेकऐवजी चुकून ॲक्सिलेरेटर दाबला गेला. त्याच्या रक्ताच्या नमुन्यांची तपासणी केली असता, त्यात अल्कोहोल आढळले नाही. त्याला कोर्टात हजर केले असता, १५,००० रुपयांच्या जातमुचलक्यावर जामीन मंजूर करण्यात आला.
या अपघातामुळे प्रियंकाच्या कुटुंबीयांमध्ये संतापाची लाट उसळली असून, त्यांनी ड्रायव्हरवर कठोर कारवाईची मागणी केली आहे. तसेच, पोलीस कोठडीत असताना चामणकरला विशेष वागणूक दिल्याचा आरोपही नातेवाईकांनी केला आहे. पोलिसांनी सांगितले की, या आरोपांची चौकशी केली जात असून, त्यासाठी पोलीस स्टेशनमधील सीसीटीव्ही फुटेजही तपासले जात आहेत.