मुंबईच्या विमानात 'मराठी बोला' म्हणणाऱ्या महिला प्रवाशाचा YouTuber शी कडाक्याचा वाद; Video Viral, सोशल मीडियावर संतापाची लाट

Marathi Controversy : मराठी बोलण्यावरुन पुन्हा वाद उफाळून आला आहे. मराठी न बोलल्याने एअर इंडियाच्या विमानात एका महिलेने एका युट्यूबरला चांगलेच सुनावले आहे. हा व्हिडिओ सोशल मीडियावर व्हायरल झाला आहे.

Marathi Controversy : कोलकाताहून मुंबईला जाणाऱ्या एअर इंडियाच्या (Air India) विमानात एका महिला प्रवासी आणि YouTuber यांच्यात जोरदार शाब्दिक चकमक झाल्याची घटना समोर आली आहे. या वादाचा व्हिडिओ सोशल मीडियावर व्हायरल झाला असून, या घटनेमुळे सर्वत्र संताप व्यक्त केला जात आहे.

'मुंबईला जात असाल तर मराठी बोला' - नेमके काय घडले?

इंस्टाग्राम बायो नुसार 'MahiNergy' नावाचा YouTube चॅनल चालवणाऱ्या माही खान या युट्यूबरने हा व्हिडिओ अपलोड केला आहे. ही घटना एअर इंडियाच्या AI676 या विमानात घडली, जे कोलकाता येथून मुंबईकडे येत होते.

युट्यूबर माही खानच्या म्हणण्यानुसार, विमानात असलेल्या एका महिला प्रवाशाने त्याला मराठीतच बोलण्याचा आग्रह धरला, कारण तो मुंबईला जात होता. हा वाद नेमका कशामुळे सुरू झाला, हे व्हिडिओमध्ये स्पष्ट होत नाही.

व्हायरल झालेल्या क्लिपमध्ये, खानने त्या महिलेला विचारले, “तुम्ही मला सांगत आहात की मी मराठीत बोलले पाहिजे?” यावर महिलेने चिडून उत्तर दिले, “हो, कृपया ते करा.” आपले नाव न सांगणाऱ्या या महिलेने पुढे म्हटले, “तुम्ही मुंबईला जात आहात, तुम्हाला मराठी यायला पाहिजे.” यावर खानने, “नाही, मला मराठी बोलता येत नाही,” असे स्पष्ट केले.

Hyundai चा लोगो आणि कारवाईची मागणी

वाद वाढताच खानने केबिन क्रूला बोलावून मदतीची मागणी केली. त्याने क्रूला सांगितले, “ही काय असभ्यता (बदतमीजी) आहे? She is asking me to speak in Marathi. What is this?” (ती मला मराठीत बोलायला सांगत आहे. हे काय आहे?)

यावर महिलेने उत्तर दिले, “मुंबईत उतरा; मग मी तुम्हाला दाखवते की असभ्यता काय असते.” एवढ्यावर न थांबता तिने मराठीत धमकीवजा इशारा दिला, “तुम्हाला मराठी माहिती नाही ना, तुम्ही बसा.”

विशेष म्हणजे, संबंधित महिला Hyundai (ह्युंदाई) चा लोगो असलेला शर्ट परिधान करून होती. यामुळे ती या ऑटोमोबाईल कंपनीची कर्मचारी असल्याचा अंदाज सोशल मीडिया वापरकर्त्यांनी व्यक्त केला आहे. अनेक युजर्सनी Hyundai India आणि Air India यांना टॅग करून या महिलेवर तातडीने कारवाई करण्याची मागणी केली आहे.

'हिंदी लादल्यास हेच होते' - सोशल मीडियावर संमिश्र प्रतिक्रिया

या व्हिडिओमुळे ऑनलाइन तीव्र प्रतिक्रिया उमटल्या आहेत. अनेक युजर्सनी महिलेच्या वर्तनावर संताप व्यक्त करत ब्रँड इंटिग्रिटीचा मुद्दा उपस्थित केला आहे.

एका युजरने, “@hyundaiindia आम्हाला सार्वजनिक माफीची गरज आहे, हा तुमच्या ब्रँडच्या परिक्षेचा प्रश्न आहे,” अशी मागणी केली.

दुसऱ्याने लिहिले, “तिला @hyundaiindia मधून निलंबित केले पाहिजे आणि मुंबईतूनही बाहेर काढले पाहिजे.”

दुसरीकडे, युजर्सच्या एका गटाने या महिलेला पाठिंबाही दर्शवला आहे.

एका कमेंटमध्ये म्हटले आहे, “तुम्ही इतरांच्या राज्यांवर हिंदी लादण्याचा प्रयत्न केल्यास हेच होते.... मी त्या मावशीला पाठिंबा देतो.”

दुसऱ्या एका टिप्पणीत लिहिले आहे की, “हिंदी बोलण्याची सक्ती करणाऱ्या उत्तर भारतीयांना हे एक उत्तर आहे.”

सध्या हा व्हिडिओ वेगळ्याच वादाला तोंड फोडून मोठा व्हायरल झाला आहे. या संपूर्ण प्रकरणावर एअर इंडिया किंवा ह्युंदाई इंडिया या दोघांनीही अद्याप कोणतेही अधिकृत वक्तव्य जारी केलेले नाही.