ईव्हीएम हॅकिंग प्रकरणी मुंबईत गुन्हा दाखल

ईव्हीएम हॅक करू शकतो असा दावा करणाऱ्या व्यक्तीविरुद्ध मुंबईत एफआयआर दाखल करण्यात आली आहे. सय्यद शुजा यांच्याविरुद्ध महाराष्ट्र निवडणूक आयोगाच्या तक्रारीवरून ही कारवाई करण्यात आली आहे.

नवी दिल्ली: ईव्हीएम (इलेक्ट्रॉनिक मतदान यंत्र) हॅक करू शकतो असा दावा करणाऱ्या व्यक्तीविरुद्ध मुंबईतील सायबर पोलिसांनी एफआयआर दाखल केली आहे.

सय्यद शुजा नावाच्या व्यक्तीने महाराष्ट्र निवडणुकीत ईव्हीएम हॅक करता येऊ शकते, त्यात फेरफार करता येऊ शकतो असा दावा करणारा व्हिडिओ सोशल मीडियावर व्हायरल झाला होता. मात्र, हे खोटे आणि निराधार असल्याचे स्पष्ट करत महाराष्ट्राचे मुख्य निवडणूक अधिकारी यांनी पोलिसांकडे तक्रार दाखल केली आहे. तक्रारीनुसार, भारतीय दंड संहिता आणि आयटी कायद्याअंतर्गत दक्षिण मुंबईतील सायबर पोलीस ठाण्यात गुन्हा दाखल करण्यात आला आहे.

‘२०१९ मध्ये शुजा यांनी असाच दावा केला होता. दिल्लीत त्यांच्याविरुद्ध एफआयआर दाखल करण्यात आली होती. ते दुसऱ्या देशात लपून बसले असावेत,’ असे महाराष्ट्र निवडणूक आयोगाने एक्सवर पोस्ट केले आहे.

सोनिया गांधींविरुद्ध नजमा यांचे वक्तव्य
‘१९९९ मध्ये आंतर-संसदीय संघटनेच्या (IPU) अध्यक्षपदी निवड झाल्याचे कळविण्यासाठी बर्लिनहून काँग्रेस नेत्या सोनिया गांधी यांना फोन केला होता. मात्र, त्यांचे कर्मचारी मॅडम व्यस्त आहेत असे सांगून एक तास थांबवून ठेवले होते,’ असे माजी राज्यसभा उपसभापती नजमा हेपतुल्ला यांनी म्हटले आहे.

‘द पर्स्युट ऑफ डेमोक्रसी: बियॉन्ड पार्टी लाइन्स’ या आपल्या आत्मचरित्रात याबाबत लिहिताना त्या म्हणतात, ‘मी जेव्हा IPU अध्यक्षपदी निवड झाले तेव्हा तत्कालीन पंतप्रधान वाजपेयी यांनी फोन करून भारताचा आणि मुस्लिम महिलांना मिळालेल्या सन्मानाबद्दल अभिमान व्यक्त केला होता. सोनिया गांधींना ही बातमी कळविण्यासाठी फोन केला असता त्यांच्या कर्मचाऱ्यांनी ‘मॅडम व्यस्त’ असल्याचे सांगितले. मी बर्लिनहून आंतरराष्ट्रीय कॉल केला आहे हे सांगितले तरीही एक तास थांबवून ठेवले,’ असे त्यांनी नाराजी व्यक्त केली आहे. काही वर्षांपूर्वी नजमा यांनी काँग्रेस सोडून भाजपमध्ये प्रवेश केला होता.