Anant Ambani : 'आजच उपचाराची सोय करा, उशीर नको': मंदिरात रडणाऱ्या गरीब महिलेच्या मदतीला धावले अनंत अंबानी
सार
जिओ आयपीओच्या यशानंतर मुंबईतील मंदिरात दर्शनासाठी गेलेल्या अनंत अंबानींनी एका गरीब महिलेला मोठी मदत केली आहे. महिलेच्या आईच्या तातडीच्या शस्त्रक्रियेसाठी त्यांनी आपल्या टीमला तात्काळ वैद्यकीय मदत पुरवण्याचे आदेश दिले.
मुंबई : उद्योगपती मुकेश अंबानी यांचा धाकटा मुलगा अनंत अंबानी याने आपल्या साधेपणाने आणि माणुसकीने पुन्हा एकदा सर्वांची मनं जिंकली आहेत. जिओ (Jio IPO) शेअर बाजारात यशस्वीरित्या लिस्ट झाल्यानंतर, अनंत आपला मोठा भाऊ आकाश अंबानीसोबत मुंबईतील प्रसिद्ध बाबुलनाथ आणि सिद्धिविनायक मंदिरात दर्शनासाठी गेला होता. दर्शन घेऊन बाहेर येताना एक हृदयस्पर्शी घटना घडली. मंदिराबाहेर रडत उभ्या असलेल्या एका गरीब महिलेची अवस्था पाहून अनंत अंबानीने तात्काळ मदतीचा हात पुढे केला. तिच्या आईच्या शस्त्रक्रियेसाठी लागणारा संपूर्ण वैद्यकीय खर्च उचलण्याची तयारी दर्शवत, त्याने आपल्या टीमला जागीच आदेश दिले.
मंदिराच्या दारात नेमकं काय घडलं?
शेअर बाजारात जिओ आयपीओच्या ऐतिहासिक यशानंतर अंबानी कुटुंबात आनंदाचं वातावरण होतं. याच यशाबद्दल देवाचे आभार मानण्यासाठी आकाश आणि अनंत अंबानी मुंबईतील मंदिरात विशेष पूजेसाठी गेले होते.
पूजा आटोपून बाहेर येताच, तिथे वाट पाहत असलेल्या एका गरीब महिलेने अनंत अंबानी यांच्याजवळ जाण्याचा प्रयत्न केला आणि आपली अडचण सांगितली. 'माझी आई खूप आजारी आहे आणि तिला तातडीने शस्त्रक्रियेची गरज आहे. पण गरिबीमुळे आम्हाला उपचाराचा मोठा खर्च परवडत नाहीये,' असं सांगत ती महिला रडू लागली.
'आजच उपचाराची सोय करा, उशीर नको'
त्या महिलेची अडचण शांतपणे ऐकून घेतल्यानंतर अनंत अंबानीने क्षणाचाही विलंब न लावता आपल्या टीमला जवळ बोलावलं. महिलेने दिलेली कागदपत्रं पाहत त्याने स्पष्ट शब्दांत सांगितलं, 'लगेच हॉस्पिटलशी बोला आणि आजच उपचाराची सोय करा. यात कोणत्याही कारणाने उशीर होता कामा नये. त्यांच्या आईला लागणारी संपूर्ण शस्त्रक्रिया आणि योग्य ते वैद्यकीय उपचार लवकरात लवकर मिळवून द्या.' अनंत अंबानींच्या या तत्पर निर्णयामुळे एका गरीब कुटुंबाला मोठा आधार मिळाला.
साध्या स्वभावामुळे देशभरातून कौतुक
देशातील सर्वात श्रीमंत कुटुंबातील असूनही आणि एक यशस्वी उद्योजक असूनही, अनंत अंबानी यांच्यातील दयाळूपणा, शून्याइतका अहंकार आणि गरिबांबद्दलची तळमळ प्रत्येकाच्या हृदयाला भिडली आहे. पैशांचा कोणताही गर्व न बाळगता, स्वतःहून एका गरीब रुग्णाच्या मदतीला धावून जाण्याच्या त्यांच्या या कृतीचं सोशल मीडियावर आणि सर्वसामान्यांकडून भरभरून कौतुक होत आहे. "अनंत अंबानी हा केवळ एक उद्योजक नाही, तर खूप चांगल्या मनाचा माणूस आहे. गरिबांच्या मदतीला धावून जाणारे असे उद्योजक जगात खूप दुर्मिळ आहेत. त्यांच्या या माणुसकीमुळे ते खऱ्या अर्थाने आदरास पात्र आहेत," अशा शब्दांत लोक त्यांच्यावर स्तुतीसुमने उधळत आहेत.
Anant Ambani visited a temple today, where a poor woman approached him and explained her situation. Her mother was seriously ill and needed surgery, but due to poverty, she couldn’t afford the treatment. After hearing her story, Anant Ambani immediately instructed his team to ensure that her mother received surgery and proper medical treatment as soon as possible.
Anant Ambani is truly a wonderful human being. Along with being a successful businessman, he is also a kind-hearted person with no ego or attitude. He is always ready to help the poor and those in need. There are very few businessmen like him. He deserves all the respect and appreciation for his kindness and humanity.
— Saffron Chargers (@SaffronChargers) October 28, 2026