रतन टाटा यांच्यासोबतचा किस्सा सांगितला अमिताभ बच्चन यांनी

मुंबई.  उद्योजक रतन टाटा यांचे निधन केवळ भारतासाठीच नव्हे तर उद्योग जगतासाठी मोठे नुकसान आहे. त्यांनी उद्योगसाम्राज्य उभे केले आणि यशस्वीरित्या चालवलेच, पण पुढच्या पिढीलाही यशस्वीपणे मार्गदर्शन करण्यासाठी रतन टाटा यांनी मार्ग दाखवला. आता अनेक जण रतन टाटा यांच्या आठवणींना उजाळा देत आहेत. बॉलिवूड अभिनेते अमिताभ बच्चन यांनीही रतन टाटा यांच्याशी संबंधित एक आठवण सांगितली आहे. रतन टाटा यांच्या साधेपणाचा किस्सा सांगताना अमिताभ बच्चन म्हणाले की, एकदा टाटा माझ्याकडे आले आणि मला फोन करण्यासाठी पैसे मागितले.

कौन बनेगा करोडपती या टीव्ही कार्यक्रमात अमिताभ बच्चन यांनी हा किस्सा सांगितला. १६ व्या पर्वाच्या कौन बनेगा करोडपती कार्यक्रमात बॉलिवूड अभिनेते बोमन इराणी आणि चित्रपट निर्माती फरा खान सहभागी झाले होते. यावेळी अमिताभ बच्चन यांनी रतन टाटा यांच्या आठवणींना उजाळा दिला. रतन टाटा हे मानवीय गुण आणि साधेपणाचे प्रतीक होते, असे अमिताभ बच्चन म्हणाले. लंडनमध्ये घडलेल्या या घटनेबद्दलही त्यांनी सांगितले.

मी आणि रतन टाटा एकाच विमानाने प्रवास करत होतो. आम्ही दोघेही लंडनला जात होतो. विमान लंडन विमानतळावर उतरले. रतन टाटा एका महत्त्वाच्या कार्यक्रमासाठी, उद्योगसंबंधित कामासाठी लंडनला गेले होते. आम्ही दोघे विमानातून उतरलो आणि विमानतळावरून बाहेर पडलो तेव्हा रतन टाटा यांना बोलावणारे आयोजक तिथे नव्हते. एक-दोन मिनिटे पाहिल्यानंतर रतन टाटा जवळच्या फोन बूथकडे गेले. मी बाहेरच उभा राहिलो. काही वेळाने रतन टाटा परत माझ्याकडे आले. त्यावेळी रतन टाटा यांनी जे बोलले ते मला खरे वाटले नाही. कारण माझ्याकडे येऊन रतन टाटा म्हणाले, "अमिताभ, मला थोडे पैसे उसने देशील का? फोन करायला माझ्याकडे पैसे नाहीत." हा किस्सा अमिताभ बच्चन यांनी सांगितला.

रतन टाटा यांनी जितकी श्रीमंती आणि संपत्ती मिळवली तितकेच दानधर्मही केले. रतन टाटा १०,००० कोटी रुपयांची संपत्ती सोडून गेले. या संपत्तीमध्ये रतन टाटा यांनी अनेकांना वाटा दिला आहे. रतन टाटा यांनी प्रेमाने सांभाळलेल्या कुत्र्यालाही त्यांच्या संपत्तीचा वाटा दिला आहे. त्यांच्या कर्मचाऱ्यांना, मित्र असलेल्या शंतनु नायडू यांना आणि इतर काही जणांना त्यांच्या १०,००० कोटींच्या संपत्तीचा वाटा दिला आहे. दानधर्मात रतन टाटा यांचा हात नेहमीच पुढे होता. देश जेव्हा जेव्हा संकटात होता तेव्हा तेव्हा रतन टाटा मदतीसाठी पुढे येत होते. कोरोना काळात टाटा ग्रुप आणि टाटा सन्स यांनी मिळून केंद्र सरकारच्या कोरोना मदत निधीसाठी १,५०० कोटी रुपये दिले होते.