कोकण ट्रिप आता सुपरफास्ट! मुंबई ते सिंधुदुर्ग प्रवास अवघ्या ५ तासांत; 'रो-रो' सेवेचे दर आणि तारीख जाहीर!

Mumbai To Sindhudurg Ro-Ro Ferry: महाराष्ट्र सागरी मंडळ लवकरच मुंबई ते विजयदुर्ग (सिंधुदुर्ग) अशी रो-रो सेवा सुरू करणार आहे, ज्यामुळे १२-१४ तासांचा प्रवास अवघ्या ५ तासांत पूर्ण होईल. प्रवासी आपल्या कार किंवा दुचाकीसह या बोटीतून प्रवास करू शकणार आहे.

मुंबई : मुंबईकरांसाठी आणि कोकणवासियांसाठी एक स्वप्नवत बातमी समोर आली आहे! मुंबई ते सिंधुदुर्ग हे अंतर पार करण्यासाठी आता तासनतास ट्रॅफिकमध्ये अडकण्याची गरज उरणार नाही. महाराष्ट्र सागरी मंडळाने (MMB) मुंबई-विजयदुर्ग रो-रो सेवा लवकरच सुरू करण्याचा निर्णय घेतला असून, यामुळे प्रवासाचा वेळ निम्म्याहून कमी होणार आहे.

प्रवासाचा वेळ वाचणार, इंधनही वाचणार!

सध्या मुंबई-गोवा महामार्गावरून सिंधुदुर्गला पोहोचण्यासाठी साधारण १२ ते १४ तास लागतात. मात्र, ही नवीन रो-रो सेवा सुरू झाल्यावर भाऊचा धक्का (मुंबई) येथून सुटणारी बोट अवघ्या ५ तासांत विजयदुर्ग येथे पोहोचेल. विशेष म्हणजे, तुम्ही तुमच्या कार किंवा दुचाकीसह या बोटीतून प्रवास करू शकणार आहात.

कधीपासून सुरू होणार ही सेवा?

सुरुवातीला ही सेवा २०२५ च्या गणेशोत्सवात सुरू होणार होती, पण तांत्रिक कारणांमुळे ती लांबणीवर पडली. आता सागरी मंडळाने निविदा प्रक्रिया वेगवान केली आहे.

मार्च २०२६: निविदा प्रक्रिया पूर्ण करण्याचे नियोजन.

एप्रिल २०२६: प्रायोगिक तत्त्वावर प्रत्यक्ष सेवा सुरू होण्याची शक्यता.

तिकीटाचे दर काय असतील? (अंदाजे)

प्रवाशांच्या सोयीसाठी वेगवेगळ्या श्रेणींमध्ये तिकीट दर निश्चित करण्यात आले आहेत.

श्रेणी (Class) अंदाजे तिकीट दर (प्रति व्यक्ती)

सामान्य (Standard) ₹ २,५००

प्रिमियम (Premium) ₹ ४,०००

बिझनेस (Business) ₹ ७,५००

फर्स्ट क्लास (First Class) ₹ ९,०००

(टीप: दुचाकी, कार आणि बससाठी स्वतंत्र शुल्क आकारले जाईल.)

आंबा उत्पादकांना मोठा दिलासा!

ही सेवा केवळ पर्यटकांसाठीच नाही, तर कोकणातील हापूस आंबा उत्पादकांसाठीही वरदान ठरेल. जलमार्गामुळे मालवाहतूक जलद होईल आणि वाहतुकीचा खर्चही कमी होईल, ज्यामुळे आंबा मुंबईच्या बाजारपेठेत फ्रेश पोहोचण्यास मदत होईल.