Dhanteras 2026 : धनत्रयोदशीला लक्ष्मीसोबत कुबेराची पूजा का करतात? जाणून घ्या कारण आणि पूजेची सोपी पद्धत

धनत्रयोदशीला कुबेराची पूजा करण्याची खास परंपरा आहे. या दिवशी संपत्तीची देवी महालक्ष्मी, कुबेर आणि धन्वंतरी यांची एकत्र पूजा केली जाते. धनत्रयोदशीला कुबेराची पूजा का महत्त्वाची आहे आणि त्याची योग्य पद्धत काय आहे?

मुंबई : धनत्रयोदशीपासून दिवाळीच्या सणाला सुरुवात होते. या वर्षी शुक्रवार, ६ नोव्हेंबर २०२६ रोजी धनत्रयोदशी साजरी केली जाणार आहे. या दिवशी संपत्तीची देवी महालक्ष्मीसोबतच कुबेराचीही पूजा केली जाते.

धनत्रयोदशीपासून होते दिवाळीची सुरुवात

याशिवाय भगवान धन्वंतरीचीही आराधना होते. धार्मिक मान्यतेनुसार, महालक्ष्मीला संपत्तीची देवी मानले जाते. तर कुबेराकडे जगातील सर्व संपत्ती आणि खजिन्याचे रक्षण करण्याची जबाबदारी आहे. तसेच भगवान धन्वंतरीला आयुर्वेद आणि आरोग्याची देवता म्हणून पूजले जाते.

धनत्रयोदशीला कुबेर पूजेचे महत्त्व

कुबेराला धन आणि संपत्तीचा रक्षक मानले जाते. ते यक्षांचे अधिपती आहेत. धार्मिक मान्यतेनुसार, कुबेराकडे संपत्ती, पैसा आणि खजिन्याच्या रक्षणाची जबाबदारी दिली आहे. याच कारणामुळे धनत्रयोदशीला महालक्ष्मीसोबत कुबेराचीही पूजा केली जाते. चांगल्या आरोग्यासाठी भगवान धन्वंतरीची पूजा करतात. धनत्रयोदशीला पूजा केल्याने धन, आरोग्य आणि समृद्धी मिळते.

कुबेर पूजेची सोपी पद्धत

कुबेराला धन, वैभव, रत्ने आणि समृद्धीचा देव मानले जाते. धनत्रयोदशीच्या पूजेसाठी घराच्या उत्तर दिशेला पूजेची जागा तयार करावी. घराच्या ईशान्य दिशेला एक चौरंग ठेवून त्यावर लाल किंवा पिवळ्या रंगाचे कापड अंथरावे. त्यानंतर कुबेराची मूर्ती किंवा फोटो स्थापन करावा. पूजेच्या वेळी घरातील दागिने आणि पैसे देवापुढे ठेवावेत.

धनत्रयोदशीला महालक्ष्मी, गणेश आणि धन्वंतरीचीही पूजा करावी. देवाच्या मूर्तीसमोर चंदन, कुंकू, शेंदूर, अक्षता आणि फुले अर्पण करावीत. यावेळी 'ओम श्रीं कुबेराय नमः' या मंत्राचा जप करावा. देवाला मिठाई, फळे किंवा ड्रायफ्रुट्सचा नैवेद्य दाखवावा. विधीपूर्वक पूजा केल्यानंतर कुबेराची आरती करावी. यामुळे घरात सुख, शांती आणि समृद्धी वाढते.