Chapati Dough : चपातीची कणीक मळल्यावर लगेच काळी का पडते? ताजं ठेवण्यासाठी काय करावं?

चपातीची कणीक आधीच मळून फ्रिजमध्ये ठेवली तरी ती काळी पडते का? मग ती कणीक फेकून द्यावी लागते का? मुळात कणीक काळी का पडते आणि यामागचं नेमकं कारण काय आहे, ते आपण जाणून घेऊया.

चपातीची कणीक काळी पडतेय का?

वेळ वाचवण्यासाठी अनेक जण आधीच कणीक मळून फ्रिजमध्ये ठेवतात. पण थोड्या वेळाने पोळ्या करण्यासाठी ती बाहेर काढली, की तिचा रंग बदलतो आणि ती काळी किंवा गडद रंगाची होते. बहुतांश लोक मळलेली कणीक फ्रिजमध्येच ठेवतात. पण ती योग्य पद्धतीने साठवली नाही, तर तिचा फक्त रंगच नाही, तर चव आणि वासही बदलतो. पण काही सोप्या टिप्स वापरून तुम्ही कणीक जास्त काळ ताजी ठेवू शकता.

कणीक काळी पडण्यामागचं नेमकं कारण काय?

कणीक मळताना त्यात असलेले 'पॉलीफेनॉल ऑक्सिडेस' (Polyphenol oxidase) सारखे नैसर्गिक एन्झाइम्स हवेतील ऑक्सिजनसोबत रिअॅक्ट होतात. या प्रक्रियेला 'ऑक्सिडेशन' म्हणतात. यामुळेच वेळेनुसार कणकेचा रंग बदलतो. हवा लागल्यामुळे ही रासायनिक प्रक्रिया वेगाने होते आणि कणकेचा रंग व ताजेपणा खराब होतो.

कणीक काळी पडू नये म्हणून ती कशी मळावी?

कणीक मळताना पाणी थोडं-थोडं घालावं. एकदम जास्त पाणी घातलं तर कणीक चिकट होते. पोळ्या मऊ होण्यासाठी कणीक किमान ५ ते १० मिनिटे चांगली मळून घ्यावी. पाण्यासोबत थोडं दूध मिसळून कणीक मळली, तर ती जास्त वेळ मऊ राहते. शिवाय तिचा रंगही बदलत नाही आणि पोळ्यांचं टेक्सचरही छान येतं.

कणीक ताजी ठेवण्याच्या सोप्या टिप्स:

एअरटाइट कंटेनर - कणीक मळल्यानंतर ती उघडी ठेवू नका. हवा लागणार नाही अशा एअरटाइट डब्यात ती ठेवा. यामुळे ऑक्सिडेशनची प्रक्रिया मंदावते आणि कणीक लवकर काळी पडत नाही.

क्लिंग फिल्म किंवा ॲल्युमिनियम फॉइल - तुमच्याकडे एअरटाइट डबा नसेल, तर एका भांड्यात कणीक ठेवून त्यावर ॲल्युमिनियम फॉइल घट्ट गुंडाळा. हे हवेपासून संरक्षण करतं.

तूप किंवा तेल लावा - कणीक मळल्यानंतर त्यावर थोडं तूप किंवा तेल लावा. यामुळे वरचा थर कोरडा पडत नाही आणि हवेचा संपर्क तुटल्याने कणीक मऊ व ताजी राहते.

झिपलॉक बॅग - कणकेला थोडं तेल लावून ती झिपलॉक बॅगमध्ये ठेवा. बॅग सील करण्यापूर्वी आतली हवा पूर्णपणे बाहेर काढा आणि मगच ती फ्रिजमध्ये ठेवा.

गरजेपुरतीच कणीक मळा - तुम्हाला जेवढी गरज आहे, तेवढीच कणीक मळा. कमी प्रमाणात मळल्यास ती ताजी राहते, वाया जात नाही आणि साठवायलाही सोपी जाते.

या छोट्या टिप्स फॉलो केल्या तर चपातीची कणीक काळी पडणार नाही आणि नेहमी मऊ व ताजी राहील.