Almond Benefits : रोज बदाम खाल्ल्याने शरीरात नेमके काय बदल होतात?
सार
रोज बदाम खाण्यासोबतच एकूणच आरोग्य सुधारण्यासाठी कोणत्या सोप्या सवयी लावून घ्यायला हव्यात, याबद्दल डॉ. सौरभ सेठी यांनी महत्त्वाची माहिती दिली आहे.
मुंबई : बदामामध्ये भरपूर पोषक घटक असतात. रोज बदाम खाल्ल्याने शरीरात नेमके काय बदल होतात, याबद्दल गॅस्ट्रोएन्टेरोलॉजिस्ट डॉ. सौरभ सेठी यांनी सविस्तर माहिती दिली आहे. "सर्वांत आधी, तुमच्या हृदयाला याचा फायदा होतो. एका मेटा-अॅनालिसिसनुसार, बदाम खाल्ल्याने एलडीएल (LDL) म्हणजेच 'बॅड कोलेस्ट्रॉल'ची पातळी प्रति डेसिलीटर सुमारे ५ मिलीग्रॅमने कमी होते," असं ते म्हणाले.
"दुसरं म्हणजे, तुमची पचनसंस्था. मूठभर बदाम - म्हणजे साधारण २३ बदाम - खाल्ल्यास शरीराला सुमारे ४ ग्रॅम फायबर मिळतं. यामुळे पचनसंस्थेचं आरोग्य चांगलं राहतं," असं डॉ. सौरभ सेठी यांनी त्यांच्या इन्स्टाग्राम पोस्टमध्ये सांगितलं आहे.
"तिसरं म्हणजे, रक्तातील साखरेची पातळी. कार्बोहायड्रेट्स असलेल्या अन्नासोबत बदाम खाल्ल्यास, जेवणानंतर रक्तातील ग्लुकोजची पातळी अचानक वाढण्यापासून रोखता येते. चौथं म्हणजे, तुमची भूक. मूठभर बदामामध्ये ६ ग्रॅम प्रोटीन आणि हेल्दी फॅट्स असतात. यामुळे पोट भरलेलं राहतं आणि जास्त वेळ भूक लागत नाही. पाचवं म्हणजे, तुमची त्वचा. एका अभ्यासात असं आढळून आलंय की, २४ आठवड्यांनंतर त्वचेवरील सुरकुत्या १६ टक्क्यांनी कमी झाल्या आहेत."
बदाम खाण्याव्यतिरिक्त, एकूणच आरोग्य सुधारण्यासाठी मदत करणाऱ्या आठ सोप्या सवयींबद्दलही डॉ. सौरभ सेठी यांनी सांगितलं आहे. सकाळी उठल्याबरोबर फोन चेक करण्याची सवय सोडून द्या. सकाळी साधारण १० मिनिटे कोवळ्या उन्हात थांबल्याने मूड चांगला राहतो आणि शरीराला आवश्यक असलेलं 'व्हिटॅमिन डी' मिळतं.
पचन सुधारण्यासाठी जेवणानंतर थोडा वेळ चालण्याचा सल्ला ते देतात. आहारात दही, योगर्ट यांसारख्या गोष्टींचा समावेश केल्यास आतड्यातील चांगल्या बॅक्टेरियांची वाढ होण्यास मदत होते. हळद, आलं, जिरं आणि बडीशेप यांसारखे मसाले आणि औषधी वनस्पतींचा वापर पचनाच्या आरोग्यासाठी खूप फायदेशीर ठरतो.