SUV features : नवीन टाटा हॅरियर आणि सफारीमध्ये असेल दमदार मायलेज देणारे पेट्रोल इंजिन

SUV features : टाटा आपल्या लोकप्रिय एसयूव्ही हॅरियर आणि सफारीमध्ये नवीन 1.5-लिटर टर्बो-पेट्रोल इंजिन सादर करण्याच्या तयारीत आहे. 168 bhp पॉवर आणि 280 Nm टॉर्क देणारे हे हायपेरियन इंजिन मॅन्युअल आणि ऑटोमॅटिक गिअरबॉक्स पर्यायांमध्ये उपलब्ध असेल. 

SUV features : मोटार उत्पादन क्षेत्रातील टाटा मोटार्स ही भारतातील विश्वासार्ह कंपन्यांपैकी एक आहे. टाटा मोटार्सकडून ग्राहकांना वाजवी दरात जास्तीत जास्त सुखसोयी देण्याचा प्रयत्न करण्यात येतो. मग ग्राहकाच्या दृष्टीने आसनव्यवस्थेसह इंटिरिअर आकर्षक तसेच आरामदायी करण्यावर कंपनीचा भर असतो. याशिवाय, तंत्रज्ञानाच्या दृष्टीनेही प्रॉडक्टमध्ये वेळोवेळी बदल केले जातात. आताही टाटाकडून दोन गाड्यांच्या इंजिनमध्ये बदल करण्यात येत आहे. वाहनधारकाला त्याचा नक्कीच फायदा होईल.  

टाटा हॅरियर आणि टाटा सफारी आतापर्यंत फक्त डिझेल इंजिनमध्येच उपलब्ध होत्या. पण आता हे चित्र बदलणार आहे. टाटा मोटर्स या दोन्ही लोकप्रिय एसयूव्हीमध्ये नवीन 1.5-लिटर टर्बो-पेट्रोल इंजिन सादर करत आहे. या इंजिनचे नाव हायपेरियन आहे. ARAI च्या दाव्यानुसार 29.9 किमी/लिटर (पेट्रोल) (ऑटोमॅटिक) मायलेज देणाऱ्या, नुकत्याच लाँच झालेल्या नवीन टाटा सिएरामध्ये हे इंजिन पहिल्यांदा दिसले होते.

टाटाचे नवीन 1.5-लिटर हायपेरियन टर्बो पेट्रोल इंजिन आधुनिक तंत्रज्ञानावर आधारित आहे. यात 4-सिलिंडर सेटअप, डायरेक्ट फ्युएल इंजेक्शन आणि व्हेरिएबल जिओमेट्री टर्बोचार्जर (VGT) यांसारख्या प्रगत तंत्रज्ञानाचा समावेश आहे. सिएरामध्ये हे इंजिन 158 bhp पॉवर आणि 255 Nm टॉर्क निर्माण करते.

हॅरियर आणि सफारीसाठी टाटाने हे इंजिन अधिक शक्तिशाली बनवले आहे. दोन्ही एसयूव्हीमध्ये, हे इंजिन 168 bhp पॉवर आणि 280 Nm टॉर्क निर्माण करते, याचा अर्थ हॅरियर आणि सफारी आता पेट्रोल इंजिनमध्येही दमदार कामगिरी करतील. नवीन पेट्रोल हॅरियर आणि सफारीमध्ये ग्राहकांना 6-स्पीड मॅन्युअल गिअरबॉक्स आणि 6-स्पीड ऑटोमॅटिक ट्रान्समिशन मिळेल, ज्यामुळे ड्रायव्हिंग अधिक सोपे आणि आरामदायक होईल.

टाटा हॅरियर पेट्रोल अनेक व्हेरिएंटमध्ये लाँच केली जाईल, जसे की स्मार्ट प्युअर एक्स, प्युअर एक्स डार्क, अ‍ॅडव्हेंचर, अ‍ॅडव्हेंचर एक्स डार्क, फिअरलेस एक्स, फिअरलेस एक्स डार्क, फिअरलेस एक्स स्टेल्थ. तर, टाटा सफारी पेट्रोल आणखी व्हेरिएंटमध्ये उपलब्ध असेल. यामध्ये स्मार्ट, प्युअर, प्युअर एक्स डार्क, अ‍ॅडव्हेंचर एक्स+, अ‍ॅडव्हेंचर एक्स+ डार्क, अकंप्लिश्ड एक्स, अकंप्लिश्ड एक्स+, अकंप्लिश्ड एक्स+ डार्क, अकंप्लिश्ड एक्स स्टेल्थ, अकंप्लिश्ड एक्स अल्ट्रा, अकंप्लिश्ड एक्स रेड डार्क यांचा समावेश आहे. हॅरियर आणि सफारीच्या पेट्रोल व्हेरिएंटच्या किमती टाटा मोटर्सने अद्याप जाहीर केलेल्या नाहीत. तथापि, पेट्रोल व्हेरिएंटची किंमत त्यांच्या संबंधित डिझेल व्हेरिएंटपेक्षा थोडी कमी असण्याची अपेक्षा आहे. यामुळे या एसयूव्ही अधिक ग्राहकांना आकर्षित करणारा पर्याय बनू शकतात.

हॅरियर आणि सफारी पहिल्यांदाच पेट्रोल इंजिन पर्यायासह उपलब्ध होत आहेत. यामुळे एक सहज आणि शांत ड्रायव्हिंग अनुभव मिळतो. शहरी आणि हायवे वापरासाठी हा एक उत्तम पर्याय आहे. रिपोर्ट्सनुसार, ही मॉडेल्स डिझेल आवृत्तीपेक्षा कमी किमतीत येऊ शकतात.