Mental Stress : कठीण कामं टाळल्याने ताण वाढतो, वेळेवर पूर्ण केल्यास मिळतं समाधान; लेखक साहिल ब्लूमचा सल्ला
सार
कठीण प्रसंग किंवा अवघड संवाद टाळल्याने मानसिक ताण अधिक वाढतो, असं मत प्रसिद्ध लेखक साहिल ब्लूम यांनी व्यक्त केलं आहे. कोणतीही समस्या सुरुवातीलाच सोडवल्यास ती गुंतागुंतीची होत नाही आणि मनालाही शांतता मिळते, असा सल्ला त्यांनी दिला आहे.
मुंबई : एखादा अवघड संवाद टाळणं किंवा एखादी समस्या सोडवणं पुढे ढकलल्याने आपल्याला तात्पुरता दिलासा मिळू शकतो. पण, अशा प्रकारे कामं टाळल्याने नंतर मानसिक ताण खूप वाढू शकतो. कठीण गोष्टींना वेळेवर सामोरं गेल्याने मनाला शांतता मिळते, असं निरीक्षण प्रसिद्ध लेखक आणि उद्योजक साहिल ब्लूम यांनी नोंदवलं आहे. "तुम्ही करत असलेल्या कठीण कामांमुळे तुम्हाला ताण येत नाही, तर जी कठीण कामं तुम्ही टाळत आहात, त्यामुळे तुमचा ताण वाढतो, यावर माझा ठाम विश्वास आहे," असं ब्लूम यांनी त्यांच्या सोशल मीडिया पोस्टमध्ये म्हटलं आहे.
कामं पुढे ढकलल्याने अडचणी वाढतात
ज्या गोष्टी आपल्याला गैरसोयीच्या वाटतात, त्या न टाळता लवकर पूर्ण केल्याने एक चांगलं आयुष्य घडवता येतं, असंही ते पुढे म्हणाले. समस्यांना सुरुवातीलाच सामोरं गेल्याने त्या अधिक गंभीर होण्यापासून रोखता येतात.
I’m convinced that most stress isn’t from the hard things you’re doing, but from the hard things you’re avoiding. A good life is built by simply doing uncomfortable things sooner. The delayed conversation gets harder. The ignored problem gets bigger. The small repair gets more expensive. Peace is found through direct early action.
— Sahil Bloom (@SahilBloom) २९ ऑक्टोबर २०२६
कामं पुढे ढकलल्याने रोजच्या आयुष्यातील छोट्या समस्याही कशा मोठ्या होतात, हे ब्लूम यांनी निदर्शनास आणून दिलं. पुढे ढकललेले संवाद नंतर अधिक कठीण होतात. दुर्लक्षित केलेल्या समस्या मोठ्या होतात. एखादं छोटं दुरुस्तीचं काम वेळेवर नाही केलं, तर नंतर त्यासाठी जास्त खर्च येऊ शकतो. "लवकर आणि थेट कृती केल्यानेच मनाला शांतता मिळते," असं ब्लूम यांनी लिहिलं आहे.
नेटकऱ्यांचा पाठिंबा
ब्लूम यांच्या या पोस्टवर सोशल मीडियात अनेक प्रतिक्रिया आल्या आहेत. "मी आत्ताच माझ्या मुलाला हीच गोष्ट सांगितली," अशी प्रतिक्रिया एका युजरने दिली. "अगदी खरंय. पुढे ढकललेले संवाद नेहमीच मनावर सर्वात मोठं ओझं बनून राहतात," असं दुसऱ्या एकाने लिहिलं. "खूप छान सांगितलं. कठीण कामं लवकर पूर्ण केल्याने अधिक शांततेत झोप लागते," अशी आणखी एकाने प्रतिक्रिया दिली.