Kia EV : कियाची इलेक्ट्रिक क्रांती, 2 नव्या गाड्या बाजारात, दुसरी 7 सीटर

किया इंडिया भारतीय बाजारात दोन नवीन इलेक्ट्रिक गाड्या आणण्याच्या तयारीत आहे. कंपनीची पहिली परवडणारी इलेक्ट्रिक गाडी 'सायरोस ईव्ही' आणि सात सीटर 'सोरेन्टो हायब्रीड एसयूव्ही' लवकरच लाँच होणार आहे. 2030 पर्यंत 10 नवीन मॉडेल्स आणण्याच्या योजनेचा हा एक भाग आहे.

किया इंडियाने भारतीय बाजारात नवीन इलेक्ट्रिक गाड्या आणण्याची घोषणा केली आहे. कंपनीने सोशल मीडियावर एक टीझर व्हिडिओ शेअर केला असून, यात कंपनीची पहिली बॅटरीवर चालणारी इलेक्ट्रिक गाडी 'किया सायरोस ईव्ही' (Kia Syros EV) आणि नवीन सात-सीटर 'सोरेन्टो हायब्रीड एसयूव्ही' (Sorento Hybrid SUV) लवकरच लाँच होणार असल्याचे संकेत दिले आहेत.

2026 च्या 'किया सीईओ इन्व्हेस्टर डे' कार्यक्रमात कंपनीने एक मोठी घोषणा केली होती. 2030 पर्यंत भारतात 10 नवीन मॉडेल्स लाँच करण्याची त्यांची योजना आहे. विशेष म्हणजे, यापैकी 8 मॉडेल्स इलेक्ट्रिक किंवा हायब्रीड असतील. यामध्ये सायरोस ईव्ही, सोरेन्टो हायब्रीड, सेल्टॉस हायब्रीड आणि कार्निव्हल हायब्रीड यांचा समावेश आहे.

ऑगस्टमध्ये सायरोस ईव्ही, वर्षाअखेरीस सोरेन्टो हायब्रीड

रिपोर्ट्सनुसार, किया सायरोस ईव्ही ऑगस्टमध्ये बाजारात दाखल होण्याची शक्यता आहे. नवीन टीझरनुसार, या गाडीचं अनावरण जुलैमध्येच होऊ शकतं. तर, सात-सीटर सोरेन्टो हायब्रीड सप्टेंबर किंवा ऑक्टोबरमध्ये लाँच केली जाईल. यानंतर 2027 मध्ये सेल्टॉस हायब्रीड आणि 2028 किंवा 2029 मध्ये कार्निव्हल हायब्रीड येण्याची अपेक्षा आहे.

एका चार्जमध्ये 369 किलोमीटरपर्यंत रेंज मिळण्याची शक्यता

किया सायरोस ईव्ही ही युरोपियन बाजारात विकल्या जाणाऱ्या ह्युंदाईच्या 'इन्स्टर ईव्ही'च्या (Hyundai Inster EV) K1 प्लॅटफॉर्मवर आधारित असेल. रिपोर्ट्सनुसार, या गाडीमध्ये 42 kWh किंवा 49 kWh क्षमतेची बॅटरी दिली जाऊ शकते. एका पूर्ण चार्जमध्ये ही गाडी तब्बल 369 किलोमीटरपर्यंत धावू शकेल, असा अंदाज आहे.

स्कोडा कोडियाक आणि जीप मेरिडियनला टक्कर

कियाच्या भारतीय लाइनअपमध्ये सोरेन्टोला सेल्टॉसच्या वरचं स्थान दिलं जाईल. ही एसयूव्ही बाजारात स्कोडा कोडियाक (Skoda Kodiaq), जीप मेरिडियन (Jeep Meridian) आणि फोक्सवॅगन टिगुआन आर-लाइन (Volkswagen Tiguan R-Line) यांसारख्या गाड्यांशी स्पर्धा करेल.

भारतीय मॉडेलमध्ये 1.5-लिटर पेट्रोल इंजिनसोबत हायब्रीड टेक्नॉलॉजी मिळण्याची शक्यता आहे. तर, आंतरराष्ट्रीय बाजारात ही गाडी 1.6-लिटर टर्बो-पेट्रोल हायब्रीड इंजिनसह उपलब्ध आहे.

काय असेल अपेक्षित किंमत?

किया सायरोस ईव्ही ही कंपनीची सर्वात स्वस्त इलेक्ट्रिक गाडी असेल. तिची एक्स-शोरूम किंमत 15 लाख ते 20 लाख रुपयांच्या दरम्यान असण्याची शक्यता आहे. तर, सोरेन्टो हायब्रीडची किंमत सुमारे 30 लाख रुपयांपासून सुरू होऊ शकते.