Excess Salt Side Effects : जेवणात मीठ जास्त खाताय? मग हे गंभीर आजार नक्कीच होऊ शकतात

शरीरात सोडियमचं प्रमाण वाढलं की पाणी साचून राहतं. यामुळे रक्ताचं प्रमाण वाढतं आणि रक्तवाहिन्यांवर खूप जास्त ताण पडतो.

मुंबई : जेवणातील मिठाच्या वापरावर नियंत्रण आणण्यासाठी कर्नाटक सरकारने आता कडक पावलं उचलली आहेत. जास्त मीठ खाल्ल्याने ब्लड प्रेशर आणि हार्ट अटॅकचा धोका वाढतो, हे एका अभ्यासातून समोर आलंय. याच पार्श्वभूमीवर तिथल्या आरोग्य विभागाने सामान्य नागरिक, हॉटेल्स, शाळा आणि पॅकेज्ड फूड कंपन्यांसाठी काही कडक नियम लागू केले आहेत. जेवणात मिठाचा अतिवापर केल्यास शरीराचं नेमकं काय नुकसान होतं, ते आपण आज जाणून घेणार आहोत.

१. रक्तवाहिन्यांवर ताण

मिठामुळे शरीरात सोडियम वाढतं आणि पाणी साचून राहतं. यामुळे रक्ताचं प्रमाण वाढून रक्तवाहिन्यांवर अतिरिक्त ताण पडतो.

२. हाय ब्लड प्रेशर आणि हार्ट अटॅक

जेवणात मीठ जास्त असेल तर शरीरात जास्त द्रवपदार्थ साचतात. यामुळे धमन्यांवर दबाव वाढतो आणि हाय ब्लड प्रेशरचा (हायपरटेन्शन) त्रास सुरू होतो. ब्लड प्रेशर सतत जास्त राहिल्यास हार्ट अटॅक आणि हार्ट फेल्युअरचा धोका कैकपटीने वाढतो.

३. किडनीवर परिणाम

सोडियमचं प्रमाण वाढल्याने किडनीला ते फिल्टर करण्यासाठी जास्त मेहनत घ्यावी लागते. यामुळे किडनीचं काम बिघडू शकतं किंवा मुतखड्याचा (किडनी स्टोन) त्रास होऊ शकतो.

४. हाडं कमकुवत होणं

जास्त मीठ खाल्ल्याने लघवीवाटे शरीरातील कॅल्शियम बाहेर पडतं. यामुळे कालांतराने ऑस्टिओपोरोसिससारखा आजार होऊ शकतो, ज्यामध्ये हाडं ठिसूळ आणि कमकुवत होतात.

५. पोटाचे अल्सर

मिठाच्या अतिवापरामुळे पोटाच्या आतील अस्तराला (लायनिंग) सूज येऊ शकते. यामुळे 'हेलिकोबॅक्टर पायलोरी' या बॅक्टेरियाची वाढ होते आणि गॅस्ट्रिक अल्सरचा धोका वाढतो.

६. डिहायड्रेशन आणि डोकेदुखी

जास्त मीठ खाल्ल्याने शरीरातील पाण्याची पातळी कमी होते म्हणजेच डिहायड्रेशन होतं. यामुळे खूप तहान लागणं, लघवीचा रंग गडद पिवळा होणं, तसंच भयंकर डोकेदुखी किंवा मायग्रेनचा त्रास होऊ शकतो.