Dizziness : उठता-बसता सारखी चक्कर येते? या 5 कारणांकडे दुर्लक्ष करू नका

तुम्हालाही अचानक उठल्यावर, बसल्यावर किंवा चालताना चक्कर आल्यासारखं वाटतं का? यामागे काही गंभीर कारणं असू शकतात. त्यामुळे याकडे अजिबात दुर्लक्ष करू नका. चला, जाणून घेऊया याची मुख्य कारणं.

मुंबई : बऱ्याच लोकांना कधीतरी अचानक उठल्यावर चक्कर येते, चालताना तोल जातो किंवा आजूबाजूच्या वस्तू फिरत असल्याचा भास होतो. यामुळे रोजच्या कामातही अडथळा येऊ शकतो.

उठल्याबरोबर चक्कर येते का?

तुम्हालाही वारंवार असा त्रास होत असेल, तर याला सामान्य समजू नका. यामागे अनेक कारणं असू शकतात.

खूप वेळ उपाशी राहणं

तुम्हाला वारंवार चक्कर येत असेल, तर याचं एक कारण म्हणजे तुम्ही बराच वेळ काही खाल्लेलं नसतं. वेळेवर जेवण करणं खूप महत्त्वाचं आहे, नाहीतर अशा समस्या वाढू शकतात.

शरीरात लोहाची कमतरता

जर तुम्हाला सतत चक्कर येत असेल, तर तुमच्या शरीरात लोहाची (Iron) कमतरता असू शकते. याकडे दुर्लक्ष करू नका. नियमितपणे डॉक्टरांकडून तपासणी करून घ्या आणि पौष्टिक आहार घ्या.

ब्लड प्रेशरची समस्या

ब्लड प्रेशर कमी किंवा जास्त झाल्यामुळेही चक्कर येऊ शकते. विशेषतः मान वळवताना, अंथरुणात कुस बदलताना किंवा उठून उभे राहताना जास्त चक्कर येत असेल, तर लगेच डॉक्टरांचा सल्ला घ्या.

मायग्रेन

ज्यांना मायग्रेनचा त्रास आहे, त्यांना तीव्र चक्कर येऊ शकते. त्यामुळे तुम्ही नियमित तपासणी केली पाहिजे. मायग्रेनसोबत चक्कर किंवा तोल जाण्याची समस्या असेल, तर तिला हलक्यात घेऊ नका.

तणाव आणि चिंता

जास्त तणाव आणि चिंतेमुळेही चक्कर आल्यासारखं वाटू शकतं. पण वारंवार येणाऱ्या चक्करला फक्त तणावाचं कारण समजू नका. त्रास कायम राहिल्यास डॉक्टरांचा सल्ला घेणं गरजेचं आहे.