Holi Skincare: चेहऱ्याला न घासता होळीचे हट्टी रंग काढा, ट्राय करा होममेड स्क्रब

Effective Homemade Scrubs to Remove Stubborn Holi Colors Naturally: चेहऱ्यावरून आणि त्वचेवरून होळीचे पक्के रंग काढण्याचे सोपे उपाय जाणून घ्या. नैसर्गिक होममेड स्क्रब आणि सुरक्षित स्किन केअरच्या पद्धती येथे पाहा.

Remove Permanent Holi Colour Naturally: होळीचा सण रंग, गुलाल आणि आनंदाची एक वेगळीच पर्वणी घेऊन येतो, पण खरी डोकेदुखी तेव्हा सुरू होते, जेव्हा त्वचेवरचे हट्टी रंग काढायची वेळ येते. अनेकजण होळीचा रंग काढण्यासाठी साबण, फेसवॉश किंवा स्क्रबने चेहरा जोरजोरात घासतात. यामुळे त्वचेवर जळजळ, रॅशेस आणि कोरडेपणाची समस्या वाढते. विशेषतः केमिकलवाले पक्के रंग त्वचेतला ओलावा काढून घेतात आणि तिला निस्तेज बनवतात. जर तुम्हीही होळीनंतरच्या स्किन केअरबद्दल चिंतेत असाल, तर काळजी करण्याची गरज नाही. महागडी ब्युटी प्रोडक्ट्स विकत घेण्याऐवजी तुम्ही घरातल्या नैसर्गिक गोष्टींनीच होळीचा रंग सहज काढू शकता. योग्य पद्धत वापरल्यास त्वचेला न घासता आणि नुकसान न पोहोचवता रंग काढता येतो. त्वचेला न घासता होळीचे रंग काढण्यासाठी खाली दिलेले होममेड स्क्रब नक्की ट्राय करा.

होळीचे हट्टी रंग काढण्यासाठी घरीच बनवा स्क्रब

होळीचे हट्टी रंग काढण्यासाठी तुम्ही घरीच एक सोपा स्क्रब तयार करू शकता. यासाठी २ मोठे चमचे बेसन, १ मोठा चमचा दही, १ छोटा चमचा नारळाचं तेल, चिमूटभर हळद आणि १ छोटा चमचा मध घ्या.

स्क्रब बनवण्याची पद्धत

सर्वात आधी एका स्वच्छ भांड्यात बेसन, दही, नारळाचं तेल आणि हळद घ्या. आता या सर्व गोष्टी चांगल्या प्रकारे एकत्र करून घट्ट पेस्ट तयार करा. जर तुम्हाला पेस्ट थोडी कोरडी वाटत असेल, तर त्यात थोडं गुलाबजल किंवा कच्चं दूध घालून एक स्मूद पेस्ट बनवू शकता.

स्क्रब वापरण्याची योग्य पद्धत

स्क्रब लावण्यापूर्वी चेहरा साध्या पाण्याने धुवा, जेणेकरून धूळ किंवा वरवरचा रंग निघून जाईल. आता तयार पेस्ट चेहरा आणि मानेवर सारख्या प्रमाणात लावा. साधारण १०-१५ मिनिटं तसंच राहू द्या. त्यानंतर हात थोडे ओले करून हलक्या हातांनी गोलाकार मसाज करत स्क्रब करा. जेव्हा पेस्ट सुकायला लागेल, तेव्हा साध्या पाण्याने चेहरा धुऊन टाका.

जर रंग पूर्णपणे निघाला नाही तर काय करावं?

जर हलका रंग अजूनही दिसत असेल, तर चेहऱ्यावर थोडी पेट्रोलियम जेली लावून हलक्या हातांनी मसाज करा आणि मग पुसून टाका. हा घरगुती उपाय सोशल मीडियावर खूप ट्रेंड करत आहे. यात दावा केला जातोय की, यामुळे जास्त न घासता रंग सहज निघू शकतो. तरीही, चेहऱ्यावर काहीही लावण्यापूर्वी पॅच टेस्ट नक्की करा, जेणेकरून कोणत्याही प्रकारची ॲलर्जी किंवा रिॲक्शन टाळता येईल.

बेसन आणि दुधाचा नैसर्गिक स्क्रब

एका वाटीत बेसन घेऊन त्यात कच्चं दूध घालून घट्ट पेस्ट बनवा. ही पेस्ट रंग लागलेल्या त्वचेवर हलक्या हाताने लावा आणि सुकू द्या. त्यानंतर कोमट पाण्याने धुवा. हा होममेड स्क्रब त्वचेवरून रंग काढण्यासोबतच ग्लोसुद्धा परत आणतो.

दही आणि हळदीचा पॅक

दह्यामध्ये चिमूटभर हळद घालून पेस्ट तयार करा. ही पेस्ट चेहरा आणि मानेवर लावा. १५ मिनिटांनी स्वच्छ पाण्याने धुऊन टाका. होळीचा रंग काढण्यासाठी हा उपाय खूप प्रभावी मानला जातो आणि त्वचेला मऊ बनवतो.

नारळाच्या तेलाने मसाज करा

होळीचा रंग काढण्याचा सर्वात सोपा मार्ग म्हणजे नारळाच्या तेलाने हलका मसाज करणे. रंग लागलेल्या भागावर तेल लावून काही वेळ तसंच ठेवा. त्यानंतर कापूस किंवा मऊ कापडाने हळूहळू पुसून घ्या. यामुळे रंग सैल होतो आणि त्वचेचा ओलावाही टिकून राहतो.

कोरफड जेल आणि मध

कोरफडीच्या जेलमध्ये थोडं मध घालून त्वचेवर लावा. हे मिश्रण त्वचेला थंडावा देतं आणि रंग हळूहळू हलका करतं. संवेदनशील त्वचेसाठी (Sensitive Skin) हा एक उत्तम घरगुती उपाय आहे.

ओट्स आणि गुलाबजलचा स्क्रब

ओट्सची पावडर करून त्यात गुलाबजल मिसळा आणि हलक्या हातांनी लावा. हे डेड स्किन काढायला मदत करतं आणि जास्त न घासता रंग काढण्यासाठी उपयुक्त ठरतं.

होळीचे पक्के रंग काढताना या गोष्टी लक्षात ठेवा

• रंग काढण्यासाठी चेहरा कधीही जोरजोरात घासू नका.
• गरम पाण्याऐवजी कोमट पाण्याचा वापर करा.
• होळी खेळायला जाण्यापूर्वी त्वचेवर तेल किंवा मॉइश्चरायझर नक्की लावा.
• रंग काढल्यानंतर त्वचेला हायड्रेट ठेवण्यासाठी चांगलं मॉइश्चरायझर लावा.