Home Cleaning : फरशी पुसायची योग्य वेळ कोणती? सकाळी की संध्याकाळी?

काही जण सकाळी उठल्या उठल्या लादी पुसतात, तर काही जण रात्री झोपण्यापूर्वी. पण फरशी पुसण्याची योग्य वेळ नेमकी कोणती? गृहिणींसाठी हे महत्त्वाचं आहे.

लादी कधी पुसायची?

भारतीय महिला घर स्वच्छ ठेवण्याला सर्वाधिक प्राधान्य देतात. अनेकांसाठी तर झाडू-लादी केल्याशिवाय दिवसाची सुरुवातच होत नाही. गृहिणी सहसा सकाळीच हे काम पूर्ण करतात. पण, बंगळूरुसारख्या मोठ्या शहरांतील नोकरदार महिलांना सकाळी वेळ मिळत नाही. त्यामुळे अनेकजणी रात्री फरशी पुसतात. पण सकाळी की रात्री, कोणती वेळ जास्त चांगली?

लादी पुसण्याची योग्य वेळ कोणती?

फरशी पुसण्याची उत्तम वेळ म्हणजे जेव्हा घरात कोणी नसतं किंवा लोकांची ये-जा कमी असते. काही कुटुंबांसाठी ही वेळ सकाळी लवकर असते, तर काहींसाठी रात्री उशिरा. लगेच पुसलेली फरशी ओली असते. त्यावर कोणी चालल्यास पायांचे ठसे उमटतात आणि स्वच्छता फुकट जाते. सर्वात महत्त्वाचं म्हणजे, ओल्या फरशीमुळे घसरण्याचा धोका असतो, विशेषतः ज्येष्ठ नागरिकांसाठी. त्यामुळे कमीत कमी वर्दळ असलेली वेळ निवडा.

मॉप वाळवणं महत्त्वाचं

फरशी पुसून झाल्यावर काहीजण मॉप तसाच बाथरूमच्या कोपऱ्यात किंवा बाल्कनीत ठेवून देतात. ही चांगली सवय नाही. ओल्या मॉपमध्ये ओलावा टिकून राहतो आणि त्याला कुबट वास येऊ लागतो, विशेषतः बाथरूमसारख्या बंद जागेत. काम झाल्यावर मॉप उन्हात किंवा हवेशीर ठिकाणी वाळत ठेवणं उत्तम.

काळजी महत्त्वाची

तुम्ही रात्री संपूर्ण घर पुसत असाल, तर ओली फरशी ही एक समस्या ठरू शकते. कुटुंबातील सदस्य पाणी पिण्यासाठी किंवा वॉशरूमला जाण्यासाठी उठू शकतात आणि घसरण्याची शक्यता असते. दिवसा सूर्यप्रकाशामुळे ओली फरशी दिसते आणि लोक सावध राहतात. रात्री ते ओळखणं कठीण होतं. जर दूध, चहा किंवा भात यांसारखं काही सांडलं असेल, तर संपूर्ण घर पुसण्याऐवजी फक्त तेवढीच जागा स्वच्छ करा. पंखा लावून ती जागा लवकर वाळवता येते आणि मुलांना दूर राहण्याची सूचना देता येते.

रात्री लादी पुसणं शक्यतो टाळा, कारण...

रात्री संपूर्ण घर पुसणं ही चांगली कल्पना नाही. जेव्हा तुम्ही केमिकल क्लीनर्स वापरता, तेव्हा घरात हवा खेळती राहणं गरजेचं असतं. नाहीतर, तो वास रात्रभर घरात राहतो आणि त्यामुळे डोकेदुखी किंवा ऍलर्जी होऊ शकते. दिवसा तुम्ही हवा खेळती राहण्यासाठी खिडक्या आणि दरवाजे उघडे ठेवू शकता. पण रात्री झोपताना अनेकांकडे खिडक्या बंद असतात, त्यामुळे सकाळी लादी पुसणं फायद्याचं.

रात्री व्हॅक्युम क्लिनर वापरू नका

रात्री व्हॅक्युम क्लिनर वापरणं ही चांगली कल्पना नाही, विशेषतः जेव्हा तुमचं कुटुंब झोपलेलं असतं. अपार्टमेंटमध्ये किंवा जवळजवळ असलेल्या घरांमध्ये, या आवाजामुळे तुमच्या शेजाऱ्यांनाही त्रास होऊ शकतो. रात्रीच्या छोट्या साफसफाईसाठी, झाडू किंवा इतर शांत पर्याय वापरणं अधिक चांगलं.