प्रेयसीसाठी लिंगबदल, अनोखी प्रेमकहाणी

नवदिल्ली:  अलिकडे समलिंगी विवाह इकडे तिकडे होताना दिसत आहेत. लिंगबदल करून विवाह करणे कमी असले तरी अशा घटनाही घडल्या आहेत. लिंगबदलानंतर प्रेयसी/प्रेयकरने सोडून दिलेल्या घटना घडल्या आहेत. पण इथे एका महिलेने आपल्या प्रेयसीशी लग्न करण्यासाठी लिंगबदल केल्याची घटना उत्तर प्रदेशातील कन्नौजमध्ये घडली आहे.  कन्नौजच्या सदर कोतवाली परिसरात हे जोडपे २५ नोव्हेंबर रोजी त्यांच्या पालकांच्या उपस्थितीत विवाहबंधनात अडकले. 

यानंतर त्यांनी सामाजिक अपमान आणि बहिष्कार टाळण्यासाठी लिंगबदल उपचार घेतले आहेत.  सध्या रानू झालेल्या शिवानीने आपल्या प्रेयसीशी लग्न करण्यासाठी लिंगबदल केला आहे. त्यांनी आपली प्रेयसी ज्योतीशी लग्न करण्यासाठी ७ लाख रुपये खर्च करून लिंगबदल केला आहे.  शिवानी आपल्या वडिलांच्या दागिन्यांच्या दुकानात पहिल्यांदा ज्योतीला भेटली होती. ज्योतीने शिवानीच्या वडिलांकडून ब्युटी पार्लर चालवण्यासाठी घर भाड्याने घेतले होते. त्यानंतर हे दोघेही एकमेकांना वारंवार भेटत असत आणि दोघांमध्ये  जवळीक वाढली. म्हणून दोघांनीही एकमेकांशी लग्न करण्याचा निर्णय घेतला.  

सुरुवातीला दोन्ही कुटुंबांनी या विवाहाला तीव्र विरोध केला होता. त्यानंतर शिवानीने लिंगबदल करण्याचा निर्णय घेतला आणि त्यासाठी लखनौ आणि दिल्लीतील डॉक्टरांशी संपर्क साधला. त्यानंतर त्यांनी लिंगबदल केला आणि आपले नाव शिवानी ऐवजी रानू असे ठेवले.