नंबर केला ब्लॉक, चॅटिंग-कॉलिंग बंद, प्रेयसीने घरी जाऊन प्रियकराच्या छातीत भोसकला चाकू!

Woman Stabs Boyfriend to Death for Blocking Her Number : छत्तीसगडच्या बिलासपूरमध्ये फोन नंबर ब्लॉक केल्यामुळे २२ वर्षीय तरुणीने प्रियकराच्या घरी जाऊन त्याची चाकूने भोसकून हत्या केली. २५ वर्षीय कामता प्रसाद सूर्यवंशी याचा मृत्यू झाला.

असे पडले प्रेमात

छत्तीसगडमधील बिलासपूरमध्ये मोबाईल फोन ब्लॉक केल्याच्या वादातून एका तरुणीने प्रियकराची हत्या केली. २५ वर्षीय कामता प्रसाद सूर्यवंशी असे मृत प्रियकराचे नाव आहे. तर २२ वर्षीय रोशनी असे आरोपी तरुणीचे नाव आहे. हॉटेल कर्मचारी असलेला सूर्यवंशी आणि रोशनी यांची सहा महिन्यांपूर्वी इंस्टाग्रामवरून ओळख झाली आणि त्यांच्यात प्रेमसंबंध निर्माण झाले. मात्र, गेल्या दोन-तीन दिवसांपासून कामताने रोशनीसोबत बोलणे आणि मेसेज करणे बंद केले होते व तिचा नंबर ब्लॉक केला होता.

रक्ताच्या थारोळ्यात पडला

प्रियकर दुसऱ्या मुलीला भेटू लागल्याच्या संशयावरून संतापलेली रोशनी चाकू घेऊन त्याच्या घरी पोहोचली. त्यानंतर झालेल्या वादात तिने सोबत आणलेल्या चाकूने त्याच्यावर वार केले. कामतासोबत राहणाऱ्या व्यक्तीने आरडाओरडा ऐकून धाव घेतली, तेव्हा तो रक्ताच्या थारोळ्यात जमिनीवर पडलेला दिसला. त्याला तातडीने रुग्णालयात नेण्यात आले, मात्र त्याचा मृत्यू झाला. तरुणीला अटक करण्यात आली असून तिच्यावर हत्येचा गुन्हा दाखल करण्यात आला आहे, अशी माहिती पोलीस अधिकारी सुम्मत साहू यांनी दिली.

छातीत चाकू भोसकला

तरुणी चाकू घेऊन खोलीत आली आणि तिने त्याचा फोन मागितला. वादावादीत तिने त्याच्या छातीत चाकू भोसकला, असे पोलिसांनी सांगितले. मृत तरुण भाजप नेते आणि जिल्हा पंचायत अध्यक्ष राजेश सूर्यवंशी यांचा पुतण्या असल्याचे पोलीस सूत्रांनी सांगितले. प्रियकराला फक्त घाबरवण्यासाठी चाकू आणला होता आणि रागाच्या भरात हे कृत्य घडले, असे तरुणीने पोलिसांना सांगितले.