Wather Update: सावधान! पुढील ४ दिवस धोक्याचे; महाराष्ट्रासह देशातील 'या' राज्यांना पावसाचा ऑरेंज अलर्ट, गारपिटीचाही इशारा

Wather Update: IMD ने देशभरात पावसाचा इशारा दिला असून अनेक राज्यांसाठी ऑरेंज अलर्ट जारी केला. येत्या काही दिवसांत पूर्व उत्तर प्रदेश, बिहार, झारखंड, छत्तीसगड, ओडिशा, पश्चिम बंगालमध्ये विजांच्या कडकडाटासह वादळी पाऊस, गारपीटची शक्यता आहे.

महाराष्ट्रासह देशातील 'या' राज्यांना पावसाचा ऑरेंज अलर्ट

नवी दिल्ली: देशातील हवामानात अचानक मोठा बदल झाला असून भारतीय हवामान विभागाने (IMD) संपूर्ण देशासाठी पावसाचा इशारा जारी केला आहे. येत्या काही दिवसांत अनेक राज्यांमध्ये विजांच्या कडकडाटासह वादळी पाऊस, गारपीट आणि ताशी ८० किमी वेगाने वारे वाहण्याची शक्यता वर्तवण्यात आली आहे. 

कुठे आहे 'ऑरेंज अलर्ट'?

हवामान विभागाचे शास्त्रज्ञ अखिल श्रीवास्तव यांनी दिलेल्या माहितीनुसार, पूर्व उत्तर प्रदेश, बिहार, झारखंड, छत्तीसगड, ओडिशा आणि पश्चिम बंगालच्या काही भागांसाठी 'ऑरेंज अलर्ट' जाहीर करण्यात आला आहे. या भागात ताशी ६० ते ७० किमी वेगाने वादळी वारे वाहू शकतात, ज्यामुळे जनजीवन विस्कळीत होण्याची शक्यता आहे. 

राज्यानिहाय हवामानाचा अंदाज

महाराष्ट्र आणि दक्षिण भारत

महाराष्ट्रातील काही भाग आणि दक्षिण भारतात विखुरलेल्या स्वरूपात पाऊस पडण्याची शक्यता आहे. मात्र, गोवा, केरळ आणि किनारपट्टीच्या कर्नाटकात उष्ण व दमट हवामान कायम राहील. 

उत्तर भारत

दिल्लीत काल झालेल्या पावसामुळे तापमानात घट झाली आहे. हिमाचल प्रदेश आणि उत्तराखंडमध्ये २३ मार्च रोजी पाऊस आणि हिमवृष्टीचा (Snowfall) अंदाज आहे. 

पूर्व आणि ईशान्य भारत

पश्चिम बंगाल आणि सिक्कीममध्ये २१ ते २४ मार्च दरम्यान मुसळधार पाऊस होऊ शकतो. ओडिशामध्ये गारपिटीची (Hailstorm) दाट शक्यता आहे. आसाम, मेघालय आणि अरुणाचल प्रदेशात २४ मार्चला मुसळधार पावसाचा इशारा देण्यात आला आहे.

तापमानात होणार चढ-उतार

दिल्लीसह उत्तर भारतात आज तापमानात २-३ अंशांची घट होऊ शकते. मात्र, उद्यापासून ढगाळ वातावरण कमी होऊन पुन्हा एकदा उन्हाचा कडाका वाढण्यास सुरुवात होईल, असा अंदाज हवामान खात्याने वर्तवला आहे. 

काय काळजी घ्याल?

वादळी वाऱ्यावेळी झाडांखाली किंवा कच्च्या बांधकामांजवळ उभे राहू नका. विजांचा कडकडाट होत असताना इलेक्ट्रॉनिक उपकरणांचा वापर टाळा आणि हवामान विभागाच्या सूचनांचे पालन करा.