Taj Mahal Security Breach : ताजमहालच्या प्रतिबंधित टॉवरवर परदेशी पर्यटक, सुरक्षेवर प्रश्नचिन्ह
सार
आग्र्यातील प्रसिद्ध ताजमहालच्या सुरक्षेवर प्रश्नचिन्ह निर्माण झाले आहे. दोन परदेशी पर्यटकांनी प्रतिबंधित क्षेत्रात प्रवेश करून टॉवर नंबर चारच्या छतावर चढल्याचा प्रकार उघडकीस आला आहे.
आग्रा : आग्र्यातील प्रसिद्ध ताजमहालच्या सुरक्षेवर प्रश्नचिन्ह निर्माण झाले आहे. दोन परदेशी पर्यटकांनी प्रतिबंधित क्षेत्रात प्रवेश करून टॉवर नंबर चारच्या छतावर चढल्याचा प्रकार उघडकीस आला आहे. यामुळे भारतातील सर्वाधिक सुरक्षा असलेल्या या वास्तूच्या सुरक्षेवर प्रश्नचिन्ह निर्माण झाले आहे.
हे पर्यटक शाही मशिदीजवळील छतावर चढले होते. येथे ताजमहालच्या आजूबाजूच्या अनधिकृत हवाई हालचालींवर लक्ष ठेवण्यासाठी अँटी-ड्रोन सिस्टीम बसवण्यात आली आहे. ते काही काळ छतावर होते, त्यांनी फोटो काढले, पण सुरक्षा रक्षकांना याची भणकही लागली नाही.
बुधवारी संध्याकाळी या पर्यटकांचा छतावरील व्हिडिओ सोशल मीडियावर व्हायरल झाल्यानंतर हा प्रकार उघडकीस आला. व्हिडिओ व्हायरल झाल्यानंतर सुरक्षा यंत्रणांनी तातडीने कारवाई करत पर्यटकांना टॉवरवरून खाली उतरवले.
ताजमहल की सुरक्षा में बड़ी चूक सामने आई है। जहां दो विदेशी पर्यटक सुरक्षा घेरा तोड़कर एंटी ड्रोन सिस्टम लगे संवेदनशील टॉवर नंबर चार पर चढ़ गए। दोनों काफी देर तक टॉवर की छत पर रहे और वहां से ताजमहल के फोटो और वीडियो बनाते रहे। #tajmahal #agra https://t.co/4ivRpSibaz
— Pawan Kumar Sharma (@pawanks1997) November 11, 2026
ही वास्तू ताजमहालच्या प्रतिबंधित रेड झोनमध्ये येते. तसेच येथे ताजमहालच्या आजूबाजूच्या प्रतिबंधित हवाई क्षेत्रातील ड्रोनच्या हालचालींवर लक्ष ठेवण्यासाठी संवेदनशिल अँटी-ड्रोन सिस्टीम बसवण्यात आली आहे. त्यामुळे या घटनेमुळे चिंता वाढली आहे.
उर्स समितीचे अध्यक्ष ताहीरुद्दीन ताहीर यांनी या प्रकारावर चिंता व्यक्त केली आहे. एवढी सुरक्षा असतानाही दोन परदेशी पर्यटक एवढ्या संवेदनशिल ठिकाणी कसे पोहोचले, असा सवाल त्यांनी उपस्थित केला आहे.
भारतीय पुरातत्व सर्वेक्षणाच्या (ASI) अधीक्षक पुरातत्वशास्त्रज्ञ डॉ. स्मिता कुमार यांनी या सुरक्षा त्रुटीबाबत केंद्रीय औद्योगिक सुरक्षा दलाकडे (CISF) सविस्तर अहवाल मागवला आहे.
ACP ताज सुरक्षा यतेंद्र नगर यांच्या म्हणण्यानुसार, CISF ने त्यांना सांगितले की, पर्यटकांना मशिदीजवळील रस्ता सापडला आणि त्यांना निर्बंधांची माहिती नसल्याने ते टॉवरवर चढले. त्यांना तातडीने खाली उतरवण्यात आले, असे त्यांनी सांगितले.
नगर पुढे म्हणाले की, पर्यटकांनी जाणीवपूर्वक सुरक्षेचे उल्लंघन न केल्यामुळे त्यांच्यावर कोणतीही कारवाई करण्यात आली नाही.
प्री-वेडिंग फोटोशूटमुळेही सुरक्षेचा प्रश्न
या ताज्या घटनेमुळे ताजमहालच्या सुरक्षेवर पुन्हा एकदा प्रश्नचिन्ह निर्माण झाले आहे. सुरक्षा रक्षक असतानाही पर्यटक प्रतिबंधित क्षेत्रात कसे प्रवेश करतात, असा प्रश्न विचारला जात आहे. या घटनेमुळे ताजमहाल परिसरात निर्बंध असूनही प्री-वेडिंग फोटोशूट होत असल्याच्या चर्चेला पुन्हा उधाण आले आहे.
ताजमहाल परिसरात कडक सुरक्षा आणि अनधिकृत फोटोग्राफीवर बंदी असतानाही असे फोटोशूट सुरू असल्याचे समजते. यामुळे पर्यटकांच्या हालचालींवर लक्ष ठेवणाऱ्या यंत्रणांवर आणि नियमांचे उल्लंघन रोखण्यावर प्रश्नचिन्ह निर्माण झाले आहे.
अनधिकृत कमर्शियल फोटोशूट योग्य परवानगी किंवा पैसे न भरता सुरू राहिल्यास, ASI च्या महसुलात घट होण्याची शक्यता असल्याने चिंता व्यक्त केली जात आहे.
या ताज्या घटनेमुळे युनेस्को वर्ल्ड हेरिटेज साइटवरील, विशेषत: संवेदनशिल पाळत ठेवणाऱ्या सिस्टीम असलेल्या क्षेत्रांमधील सुरक्षेच्या अंमलबजावणीकडे लक्ष वेधले गेले आहे.