बॅडमिंटनची 'फुलराणी' अखेर निवृत्त, ऑलिम्पिकपटू म्हणाली- 'आता खेळू शकत नाही'

Saina Nehwal Announces Retirement From Badminton : बॅडमिंटन कोर्टवर चमत्कार घडवून भारताचा गौरव वाढवणारी सायना नेहवाल निवृत्त झाली आहे. गुडघ्याची दुखापत आणि शारीरिक समस्यांमुळे वयाच्या 35 व्या वर्षी तिने निवृत्ती घेतली. गेल्या दोन वर्षांपासून गुडघेदुखीमुळे सायना स्पर्धांपासून दूर होती. आपले शरीर आता कठोर शारीरिक प्रशिक्षण घेऊ शकत नाही, असे स्पष्ट करत तिने निवृत्तीची घोषणा केली. 

एका पॉडकास्टद्वारे तिने ही माहिती दिली. 2012 च्या लंडन ऑलिम्पिकमध्ये कांस्यपदक जिंकणारी सायना, बॅडमिंटनमध्ये जागतिक क्रमवारीत अव्वल स्थान मिळवणारी पहिली भारतीय महिला खेळाडू आहे. दोन दशकांच्या तिच्या कारकिर्दीने भारतात बॅडमिंटनला अधिक लोकप्रिय बनवण्यात महत्त्वाची भूमिका बजावली.

 आपण आपल्या अटींवर खेळात आलो होतो आणि आता त्याच कारणांमुळे जात आहोत, असे सायनाने पॉडकास्टमध्ये स्पष्ट केले. त्यामुळे मोठ्या अधिकृत घोषणेची गरज वाटली नाही, असेही सायना म्हणाली. 2023 च्या सिंगापूर ओपनमध्ये तिने शेवटचा सामना खेळला होता. तिच्या गुडघ्यातील कार्टिलेज पूर्णपणे खराब झाले असून तिला संधिवात झाल्याचे सायनाने उघड केले. 

पूर्वी आठ ते नऊ तास सराव करायचे, पण आता दोन तास सराव केल्यावरही गुडघेदुखी वाढते, असे तिने सांगितले. 2016 च्या रिओ ऑलिम्पिकमधील दुखापत सायनाच्या कारकिर्दीला मोठा धक्का देणारी ठरली. त्यानंतर तिने 2017 मध्ये जागतिक चॅम्पियनशिपमध्ये कांस्य आणि 2018 मध्ये राष्ट्रकुल क्रीडा स्पर्धेत सुवर्णपदक जिंकले होते.