अमृतसरमध्ये गरीबरथ एक्सप्रेसला भीषण आग, तीन डबे जळून खाक, जीवित हानी नाही!

Punjab Garib Rath Express Fire : अमृतसर-सहरसा गरीब रथ एक्सप्रेस ट्रेनला भीषण आग लागली. ट्रेनच्या १९ क्रमांकाच्या डब्याला आग लागली. हा डबा पूर्णपणे जळून खाक झाला. सोबत दोन डबे प्रभावित झाले.

Punjab Garib Rath Express Fire : शनिवारी पहाटे पंजाबमधील फतेहगढ साहिब जिल्ह्यातील सरहिंद रेल्वे स्टेशनजवळ अमृतसर-सहरसा गरीब रथ एक्सप्रेस (गाडी क्र. १२२०४) मधील एका डब्याला आग लागल्याने घबराट पसरली. त्यानंतर ही आग पसरत इतर डब्यांमध्ये पोहोचली. यात तीन डबे जळून खाक झाल्याचे वृत्त आहे.

अधिकाऱ्यांनी दिलेल्या माहितीनुसार, सकाळी अंदाजे ७.२२ वाजता ही घटना घडली, जेव्हा ट्रेन सरहिंद स्टेशनवरून जात असताना "जी-१९" वातानुकूलित (AC) डब्याला आग लागली. सरहिंद येथे ट्रेनला थांबायचे नव्हते आणि ती अंबाला छावणीकडे जात होती. सरकारी रेल्वे पोलीस (GRP), उत्तर रेल्वे कर्मचारी आणि स्थानिक अग्निशमन दलाने तातडीने प्रतिसाद देत एक मोठी दुर्घटना टाळली.

आग त्वरित विझवण्यात आली आणि सर्व प्रवाशांना सुरक्षितपणे शेजारच्या डब्यात हलवण्यात आले. बाहेर काढण्याच्या वेळी एका महिला प्रवाशाला किरकोळ भाजले आणि तिला फतेहगढ साहिब येथील सिव्हिल हॉस्पिटलमध्ये दाखल करण्यात आले. जीआरपी अधिकाऱ्यांनी तिची प्रकृती स्थिर असल्याचे सांगितले.

रेल्वे अधिकारी काय म्हणाले

जीआरपी फतेहगढ साहिबचे स्टेशन हाऊस ऑफिसर, रतन लाल म्हणाले, "प्राथमिक तपासात विजेच्या शॉर्ट सर्किटमुळे आग लागल्याचे संकेत मिळत आहेत, कारण घटनास्थळी स्फोटके किंवा ज्वलनशील पदार्थांचा कोणताही पुरावा आढळला नाही. नुकसान मर्यादित ठेवण्यासाठी, आग लागलेला डबा आणि इतर दोन प्रभावित डबे तातडीने उर्वरित ट्रेनपासून वेगळे करण्यात आले."

ते म्हणाले, “घटनेची माहिती मिळताच रेल्वे अधिकाऱ्यांनी तातडीने कारवाई करत प्रवाशांना इतर डब्यांमध्ये हलवले आणि आग त्वरित विझवली. कोणतीही जीवितहानी झाली नाही. ही ट्रेन लवकरच आपल्या गंतव्यस्थानाकडे प्रवास पुन्हा सुरू करेल. आग विझवण्यात आली आहे, तरीही धुराचे प्रमाण असल्याने तीन फायर टेंडरसह अग्निशमन दल अजूनही कामावर आहे. 'जी-१९' या जळालेल्या डब्यात इतर प्रवासी शिल्लक नाहीत हे तपासण्यासाठी आम्ही दुसरी शोध मोहीम राबवत आहोत. सर्व प्रवाशांना वाचवण्यात आले आहे. ट्रेनमधील जीआरपी एस्कॉर्ट व्यतिरिक्त, रेल अटेंडंट अमनदीप सिंह यांनी साखळी (चेन) ओढून ट्रेन थांबवण्यात आणि 'जी-१९' डब्याला आग लागल्यावर प्रवाशांना दुसऱ्या डब्यात हलवण्यात महत्त्वाची भूमिका बजावली. त्यानंतर आमचे पथक घटनास्थळी पोहोचले आणि त्यांनी महिला प्रवाशाला रुग्णालयात दाखल करण्यासह इतर प्रवाशांची सुटका केली.”

दुरुस्ती आणि सुरक्षा तपासणीसाठी रेल्वे सेवा तात्पुरती थांबवण्यात आली, त्यामुळे प्रवाशांना अनेक तास ताटकळत राहावे लागले. अधिकाऱ्यांनी परिस्थिती नियंत्रणात असल्याचे सांगितले आणि आगीचे नेमके कारण शोधण्यासाठी सविस्तर चौकशीचे आदेश देण्यात आले आहेत.