भारतीय प्रवाशांचा जीव धोक्यात असतानाही पाकिस्तानचा आडमुठेपणा, वैमानिकाची विनंती फेटाळली

प्रवासादरम्यान विमानाला टर्ब्युलन्सचा सामना करावा लागला. सर्व प्रयत्न निष्फळ ठरत असताना, प्रवाशांचे प्राण वाचवण्यासाठी इंडिगोच्या पायलटने पाकिस्तानला विनंती केली. मात्र, पाकिस्तानने ही विनंती फेटाळल्याची माहिती समोर आली आहे.

नवी दिल्ली- इंडिगोचे विमान 6E 2142 याला अलीकडेच टर्ब्युलन्सचा सामना करावा लागला. दिल्लीहून श्रीनगरला जाणाऱ्या या विमानाचे नियंत्रण टर्ब्युलन्समुळे गमावले होते. गारपीट आणि प्रतिकूल हवामानामुळे विमानाचे नुकसान झाले. विमान नियंत्रणात येत नसल्याने प्रवासी घाबरले होते. अशा परिस्थितीत पायलटने पाकिस्तानच्या हवाई क्षेत्राचा वापर करण्यासाठी लाहोर विमानतळाला विनंती केली होती. मात्र, पाकिस्तानने ही विनंती फेटाळल्याचे वृत्त आहे.

लाहोर नियंत्रण कक्षाला संपर्क साधला
मे २१ रोजी इंडिगोच्या पायलटने श्रीनगर विमानतळावर सुरक्षित लँडिंग करून प्रवाशांचे प्राण वाचवले. मात्र, याआधी पायलटने प्रवाशांचे प्राण वाचवण्यासाठी केलेल्या प्रयत्नांची माहिती समोर आली आहे. तृणमूल काँग्रेसच्या खासदारांसह २२० प्रवासी घेऊन दिल्लीहून श्रीनगरला निघालेल्या विमानाला हवामानाच्या प्रतिकूलतेमुळे अडचणींचा सामना करावा लागला. अमृतसरच्या हवाई क्षेत्रातून जाताना विमानाला टर्ब्युलन्सचा सामना करावा लागला. अमृतसर ते श्रीनगर मार्गावरून प्रवास करणे धोकादायक असल्याचे पायलटला लक्षात आले. त्यामुळे त्याने लाहोर नियंत्रण कक्षाला संपर्क साधून पाकिस्तानच्या हवाई क्षेत्राचा काही मिनिटांसाठी वापर करण्याची परवानगी मागितली. मात्र, लाहोर नियंत्रण कक्षने ही विनंती फेटाळली.

पाकिस्तानच्या हवाई क्षेत्राचा वापर बंदी
पहलगाम हल्ल्यानंतर भारताने ऑपरेशन सिंदूरद्वारे प्रत्युत्तर दिले होते. या संघर्षात पाकिस्तानने आपल्या हवाई क्षेत्राचा वापर भारतासाठी पूर्णपणे बंद केला होता. भारताच्या कोणत्याही विमानांना पाकिस्तानच्या हवाई क्षेत्राचा वापर करण्यास मनाई होती. भारतानेही पाकिस्तानच्या विमानांना भारताच्या हवाई क्षेत्रात येण्यास बंदी घातली होती. सध्या युद्धबंदी जाहीर झाली आहे. मात्र, तणावपूर्ण परिस्थितीत फारसा बदल झालेला नाही. या दरम्यान, आणीबाणीच्या परिस्थितीत भारताच्या पायलटने केलेली विनंती पाकिस्तानने फेटाळली.

श्रीनगरमध्ये सुरक्षित लँडिंग
इंडिगोच्या पायलटने टर्ब्युलन्स असतानाही विमानाचे नियंत्रण मिळवले. यात विमानाच्या पुढील भागाला मोठे नुकसान झाले होते. त्यामुळे विमानाचे लँडिंग करणे आव्हानात्मक होते. श्रीनगर नियंत्रण कक्षाला माहिती देण्यात आली होती. त्यामुळे श्रीनगर विमानतळावर आणीबाणीच्या लँडिंगची सर्व व्यवस्था करण्यात आली होती. अग्निशमन दल, रुग्णवाहिका आदींसह श्रीनगर विमानतळ पूर्णपणे सज्ज होते. पायलटच्या अनुभवामुळे आणि संयमामुळे परिस्थितीचा सामना करण्यात यश आले. पायलटने श्रीनगर विमानतळावर यशस्वीरित्या लँडिंग केले. सर्व प्रवासी सुरक्षितपणे विमानातून बाहेर पडले.